عشرت حسین بٹ
پونچھ//پونچھ ضلع کے جنگلی حیات کی پناہ گاہ میںمتعلقہ محکمہ کی جانب سے نصب ایک خفیہ کیمرت میں’ مغربی ٹریگوپن‘کے نام سے مشہور انتہائی نایب اور مبہم قسم کا پرندہ قید ہوا ہے ۔متعلقہ حکام نے بتایا کہ خطے میں پہلی بار، محکمہ جنگلی حیات کی طرف سے نصب کیمرہ ٹریپ نے دنیا کے نایاب اور سب سے پرجوش تیتروں میں سے ایک مغربی ٹریگوپن کی تصویر کھینچی ہے۔اسکوخوبصورت پلمیج اور نر کے سر پر مخصوص سینگ نما مانسل اپنڈیجز کیلئے جانا جاتا ہے، جو افزائش کے موسم میں نمایاں ہو جاتے ہیں، مغربی ٹریگوپن کو مقامی طور پر’جوجورانا‘ (Jujurana)کہا جاتا ہے جس کا اصل مطلب پرندوں کا بادشاہ ہے ۔غور طلب ہے کہ مغربی ٹریگو پن یا (Tragopan melanocephalus) ایک نایاب، پرجوش پرندہ ہے جو ہمالیہ میں اونچائی پر رہتا ہے۔ یہ مغربی ہمالیہ میں، پاکستان میں سندھ کوہستان کے علاقے سے لے کر ہندوستان کے اتراکھنڈ تک، اور مشرق میں دریائے بھاگیرتھی تک پایا جاتا ہے۔ پرندے کا ترجیحی مسکن 2,400–3,600 میٹر کی بلندی پر معتدل، سبلپائن اور چوڑے پتوں والے جنگلات کی گھنی افزائش ہے۔حکام کی جانب سے مذکورہ پرندے کی نسل کو ’’خطرناک‘‘ کے طور پر درجہ بندکیا گیا ہے حکام نے بتایا کہ مغربی ٹراگوپن کو پونچھ ضلع کے ’’تتہ کوٹی وائلڈ لائف سینکچری‘‘ میں کیمرے میں قید کیا گیا ہے جو خوبصورتی میں اپنی مثال آپ بیان کر رہا ہے۔ راجوری پونچھ کے وائلڈ لائف وارڈن امیت شرما نے بتایا کہ تقریباً 20-25 دن پہلے ضلع پونچھ کے تتہ کوٹی وائلڈ لائف سینکچری میں پرندوں اور جانوروں کو بالواسطہ دیکھنے کے لئے کیمرے نصب کئے گئے تھے جس نے کامیابی کے ساتھ نایاب مغربی ٹریگوپن (تیتر) کی تصویر کھینچی تھی ۔شرما نے کہاکہ محکمہ جنگلی حیات کی طرف سے لی گئی نایاب پرندے کی یہ پہلی تصویر ہے۔موصوف نے مزید کہا کہ اس علاقے میں چھ کیمرے نصب کئے گئے ہیں، اور بھی مزید کیمرے لگائے جارہے ہیں تاکہ ان نایاب پرندوں کو ان میں قید کیا جائے ۔ انہوں نے کہا کہ کیمرے کی مدد سے ان جنگلوں میں اس سال، ہرن کی بھی ایک نئی نسل دیکھی گئی، جو پورے ہندوستان میں پہلی بار دیکھنے کو ملی۔ ادھر ضلع ترقیاتی کمشنر پونچھ ایم یاسین چودری نے بھی اس حوالے سے سماجی رابطہ سایڈ ایکس پر جانکاری دیتے ہوئے کہا کہ مغربی ٹریگوپن کو تمام زندہ تیتروں میں نایاب سمجھا جاتا ہے اور اس پرندے کو مقامی طور پر ’جوجورانا‘ کہا جاتا ہے جس کا مطلب پرندوں کا بادشاہ ہوتا ہے۔ انہوں نے لکھا ہے کہ ہمیں ضلع پونچھ کے علاقہ ’تتہ کوٹی وائلڈ لائف سینکچری ‘سے مغربی ٹراگوپن کیمرے کی مدد سے اس پرندے کی تصویر مہیا ہوئی ہے۔ بتا دیں کہ ضلع پونچھ کے جنگلوں سے اس سے قبل بھی کیمرے کی مدد سے نایاب ہرن کی تصور بھی کیمرے میں قید ہوئی تھی ۔
