پونچھ میں اراضی پر تنازعہ | شہری ہلاک، 2زخمی

سرینگر//ضلع پونچھ میں اراضی تنازعے کے نتیجے میں ایک شخص کی جان چلی گئی جبکہ دو افراد زخمی ہوئے ہیں جن میں سے ایک کی حالت ہسپتال میں نازک بنی ہوئی ہے ۔پولیس نے اس سلسلے میں کیس درج کرکے ابتدائی طور پر تین افراد کی گرفتاری عمل میں لائی ہے اور قتل میں استعمال کیا گیا اوزار بھی برآمد کرکے تفتیش شروع کی ہے ۔ سی این آئی کے مطابق جموں کے ضلع پونچھ میں سوموار کو دو گروہوں کے درمیان اراضی تنازعے پر تصادم ہوا جس دوران مار پیٹ کے نتیجے میں ایک شخص محمد لطیف  ساکنہ منڈی جس کی عمر قریب 60برس بتائی جاتی ہے، ہلاک ہوا جبکہ آپسی تصادم آرائی میں دیگر دو زخمی ہوئے ہیں جن کو فوری طور پر ہسپتال پہنچایا گیا جہاں ایک کی حالت نازک بنی ہوئی ہے ۔ اس واقع کی تصدیق کرتے ہوئے ایس ایس پی رمیش انگرال نے کہا کہ زمین کے معاملے پر ہوئے آپسی تصادم کی وجہ سے ایک شخص کی موت ہوئی ہے اور دودیگر زخمی ہوئے ہیں جن کو ہسپتال پہنچایاگیا ہے جبکہ اس قتل میں استعمال کی گئی چیزکو بھی پولیس نے برآمد کرلیا ہے ۔ اس سلسلے میں تین افراد کو ابتدائی طور پر گرفتار کرلیا گیا ہے جبکہ دیگر ملزمان کی تلاش جاری ہے ۔ انہوں نے کہاکہ اس سلسلے میں ڈی ایس پی ہیڈکوارٹر پونچھ کی قیاد ت میں تفتیشی ٹیم جائے واردات پر بھیج دی گئی ہے جو اس سارے معاملے کی تہہ تک جاکر تحقیقات کریں گی ۔