پلوامہ میں کرنٹ لگنے سے شہری فوت، بڈگام میں یو پی کانوجوان لقمہ اجل کپوارہ میں بی ایس ایف اہلکار کی خودکشی ،قاضی گنڈ میں نعش بر آمد

عظمیٰ نیوز سروس

سرینگر//پلوامہ ضلع کے تریچھ علاقے میں اپنے گھر میں بجلی کا جھٹکا لگنے سے ایک بزرگ شخص کی موت واقع ہو گئی۔ مقامی لوگوںنے بتایاکہ 75سالہ غلام قادر بٹ ولد محمدعبداللہ بٹ ساکن تریچھ پلوامہ کو اپنے گھر میں بجلی کا جھٹکا لگا جب وہ موٹر سے کچھ گھریلو کام کر رہا تھا۔اسے بے ہوشی کی حالت میں ضلع ہسپتال پلوامہ پہنچایا گیا، جہاں بعد میں اس نے دم توڑ دیا۔ادھر شولی پورہ بڈگام میں ایک اینٹ بھٹے پر اینٹوں کی ایک عارضی دیوار کے نیچے آنے کے بعد ایک غیر مقامی مزدور کی موت ہو گئی۔ایک اہلکار نے بتایا کہ ریاست اتر پردیش کے رہنے والے29 سالہ حسین کے نام سے ایک مزدور جمعہ کی شام دیر گئے عارضی دیوار کے نیچے آ گیا۔ حکام نے بتایا کہ وہ موقع پر ہی دم توڑ گیا۔اس کی لاش کو پولیس نے طبی قانونی کارروائیوں کے لیے لے لیا جس کے بعد اسے یوپی میں اس کے آبائی گاؤں روانہ کر دیا گیا۔اس دوران حضرت بل سرینگرمیں ایک40 سالہ شخص نے مبینہ طور پر پھانسی لگا کر خودکشی کرلی۔حکام نے بتایاکہ یہ واقع کنہ تار حضرت بل میں پیش آیا۔ متوفی کی نعش کو پولیس نے قانونی کارروائی کیلئے اپنی تحویل میں لے لیا۔ پولیس نے عبدالرشید کے انتہائی اقدام کی وجوہات جاننے کے لیے تفتیش شروع کردی ہے۔ادھر قاضی گنڈ کے لوور منڈا علاقے میں بانہال سے تعلق رکھنے والے ایک نوجوان کی لاش ملی۔پولیس نے بتایا کہ قومی شاہراہ پر پرانے ٹول پوسٹ کے قریب 30سالہ ایک نوجوان کی لاش پڑی ہوئی ملی۔انہوں نے بتایا کہ پولیس موقع پر پہنچی اور لاش کو قانونی کارروائی کیلئے ہسپتال بھیج دیا۔ انہوں نے کہا کہ نوجوان کی شناخت یاسر حمید بیگ ولد عبدالحمید بیگ ساکن زنہل بانہال کے طور پر ہوئی ہے۔ادھربانڈی پورہ ضلع کے سرحدی علاقے گریز میں نہانے کے دوران ایک نوعمرلڑکے کی کشن گنگا میں پھسلنے سے موت واقع ہو گئی۔ہفتہ کی دوپہر کشن گنگا میں نہانے کے دوران مذکورہ نوجوان پھسل کر ڈوب گیا۔ مقامی لوگوں نے اسے بچانے کی کوشش کی لیکن وہ بچ نہیں سکا۔ لڑکے کی لاش کی شناخت فرمان مجید ولد مجید لون ساکن مرکوٹ گریز کے طور پر ہوئی ہے۔ بعد میں مقامی لوگوں نے اسے نکالا اور آخری رسومات کیلئے اہل خانہ کے حوالے کر دیا۔ مہلوک نوجوان کی نعش جب آبائی گھر پہنچائی گئی تو وہاں کہرام مچ گیا۔ادھرشمالی کشمیر کے کپوارہ میں بی ایس ایف کے سپاہی نے خود کو گولی مار کر ہلاک کر دیا۔اس کی شناخت 89 بٹالین کے جی ڈی رام کمار کے طور پر ہوئی ہے۔وہ ٹنگڈار میں NITI پوسٹ پر تعینات تھا جب اس نے اپنی سروس رائفل سے خود کو گولی ماردی۔کمار کی لاش کو طبی قانونی کارروائیوں کے لیے سب ڈسٹرکٹ ہسپتال ٹنگڈارمنتقل کیا گیا ۔ پولیس نے دفعہ 194 بی این ایس ایس کے تحت کارروائی شروع کردی ہے۔