پاکستانی وزیر خارجہ کا میر واعظ کو ٹیلی فون

  سرینگر+ اسلام آباد// پاکستانی وزیر خارجہ شاہ محمود قریشی نے کہا ہے کہ 4 اور 5 فروری کو لندن میں برطانوی پارلیمنٹ کے سامنے کشمیر میں مظالم کے خلاف احتجاج کیا جائے گا۔وزیر خارجہ شاہ محمود قریشی کا حریت(ع)  چیئرمین میر واعظ عمر فاروق سے ٹیلی فونک رابطہ ہوا جس میں مسئلہ کشمیر اور بھارتی مظالم کو عالمی سطح پر اجاگر کرنے کے امور پر بات چیت کی گئی۔اس موقع پر وزیر خارجہ کا کہنا تھا کہ پاکستان نے کشمیر میں انسانی حقوق کی خلاف ورزیوں کا معاملہ ہر فورم پر اٹھایا ہے اور اس سلسلے کو برقرار رکھتے ہوئے 4 اور 5 فروری کو لندن میں برطانوی پارلیمنٹ کے سامنے کشمیر میں فورسز کے مظالم کے خلاف احتجاج کیا جائے گا جب کہ ساتھ ہی لندن میں کشمیریوں پر ہونے والے مظالم پر تصویری نمائش کا بھی انعقاد کیا جائے گا۔وزیر خارجہ سے بات چیت میں میر واعظ عمر فاروق نے مسئلہ کشمیر کے حل کے لیے پاکستان کی کوششوں کو سراہتے ہوئے کہا کہ مسئلہ کشمیر عالمی سطح پر اجاگر کرنے کے لئے پاکستان کے اقدامات قابل تحسین ہیں۔میر واعظ عمر فاروق کا کہنا تھا کہ میں لندن کے احتجاجی مظاہرے میں شرکت کا خواہش مند ہوں۔