یو این آئی
سری نگر// سری نگر کے پارمپورہ علاقے میں آتشزدگی کی ایک بھیانک واردات میں17 رہائشی شیڈ خاکستر ہوئے ۔معلوم ہوا ہے کہ پانچ گھنٹوں کی انتھک کوشش کے بعد آگ پر قابو پایا گیا۔ پارمپورہ علاقے میں اتوار اعلیٰ الصبح رہائشی شیڈ سے آگ نمودار ہوئی جس نے آناًفاناً اپنے متصل مزید کئی ڈھانچوں کو لپیٹ میں لے لیا۔معلوم ہوا ہے کہ مقامی لوگوں اور فائر اینڈ ایمرجنسی عملے نے فوری طورپر آگ بجھانے کی کارروائی شروع کی تاہم آگ اس قدر بھیانک تھی کہ ڈیڑھ درجن شیڈ اس کی زد میں آئے۔
نامہ نگار نے بتایا کہ پانچ گھنٹوں کی انتھک کوشش کے بعد آگ پر قابو پایا گیا تاہم آتشزدگی کی اس واردات میں 17 رہائشی ڈھانچے تباہ ہوئے اور ان میں موجود لاکھوں روپیہ مالیت کا سامان بھی راکھ کے ڈھیر میں تبدیل ہوا۔ذرائع نے بتایا کہ آگ بجھانے کی کارروائی کے دوران فائر مین زخمی ہو۔فائر اینڈ ایمرجنسی محکمہ کے ایک عہدیدار نے بتایا کہ اتوار کی صبح نماز فجر سے قبل پارمپورہ میں رہائشی شیڈ سے آگ نمودار ہونے کی اطلاع موصول ہونے کے بعد فائر اینڈ ایمرجنسی عملے کے اہلکار جائے موقع پر پہنچے۔انہوں نے بتایا کہ 13فائر ٹینڈروں کی مدد سے آگ پر قابوپایا گیا تاہم آگ کی اس واردات میں 17رہائشی شیڈ خاکستر ہوئے ہیں۔ان کے مطابق آگ بجھانے کی کارروائی کے دوران ایک اہلکار بھی زخمی ہوا ہے۔ دریں اثنا پولیس نے آگ لگنے کی وجوہات جاننے کی خاطر کیس درج کرکے مزید تحقیقات شروع کی۔
