ٹی آر سی کے فٹبال میدان میں فلڈ لائٹسہولیات کاافتتاح

سری نگر// شائقین کی ایک بڑی تعداد کی موجودگی میں ایسٹرو ٹرف ٹی آر سی سرینگرمیں پہلی دفعہ انڈیا سٹار الیون اور جے کے سٹار الیون کے مابین مصنوعی روشنی کے دوران فٹبال میچ کھیلا گیا۔سابق مُلکی فٹبال کھلاڑیوں بائیچینگ بوٹیہ، رینڈی سنگھ اور معراج الدین وُڈو کی جھلک دیکھنے کے لئے سٹیڈیم میں شائقین کی ایک بڑی تعداد موجود تھی۔یہ بات قابل ذکر ہے کہ ٹی آر سی کا ایسٹرو ٹرف ریاست میں فٹبال شائقین کے لئے ایک اہم میدان کے طور پر سامنے آرہا ہے۔ایک مقامی فٹبال کھلاڑی نے بتایا کہ یہ ہم سب کے لئے خوشی کا موقعہ ہے اور ہم سرکار سے استدعا کرتے ہیں کہ ریاست کے اُبھرتے ہوئے کھلاڑیوں کو اپنے کھیل کا مظاہرہ کرنے کے لئے مزید ایسی سہولیات فراہم کی جائیں۔ٹرف پر جے کے سٹار الیون اور انڈیا سٹار الیون کے مابین شام سات بجے ایک نمائشی میچ کھیلا گیا جو انڈیا سٹار الیون نے جیت لیا۔اس سے پہلے گورنر کے صلاحکار کے وجے کمار، کے کے شرما، خورشید گنائی، کے سکندن اور چیف سیکرٹری بی وی آر سبھرامنیم نے میدان میں اس فلڈ لائٹ سہولت کا افتتاح کیا۔ڈپٹی کمشنر سرینگر ڈاکٹر شاہد اقبال چوہدری، سیکرٹری سپورٹس کونسل ڈاکٹر نسیم جاوید چوہدری، ڈائریکٹر جنرل یوتھ سروسز اینڈ سپورٹس ڈاکٹر سلیم الرحمان، ایس ایس پی سرینگر حسیب مُغل کے علاوہ دیگر سینئر افسران بھی مشیروں کے ہمراہ تھے۔صلاحکاروں نے نوجوان طُلباء، کھیل شائقین اور مُلکی فٹبالروں سے بات کر کے اُنہیں ریاست میں کھیل کود کو واپس پٹری پر لانے کے لئے اپنا رول ادا کرنے پر زور دیا۔صلاحکار وجے کمار نے نوجوانوں کو تعلیم کے ساتھ ساتھ کھیل کود کی سرگرمیوں میں بڑھ چڑھ کر حصہ لینے کی تلقین کی۔انہوں نے کہا کہ مختلف کھلاڑیوں کو مختلف سطحوں پر اپنے ہُنر کا مظاہرہ کرنے کا موقعہ نہیں ملتا ہے اس لئے سرکار نے کھیل کود کے فروغ پر خصوصی توجہ مرکوز کی ہے۔انہوں نے کہا کہ ریاست کے نوجوان جموں وکشمیر کا مستقبل بدلنے کی صلاحیت رکھتے ہیں البتہ انہیں موقعہ فراہم کرنے کی ضرورت ہے۔دریں اثنا صلاحکار خورشید احمد گنائی نے میدان میں ڈریسنگ روم اور سٹیٹ فُٹبال اکاڈمی آفس کمپلیکس سمیت کئی دیگر سہولیات کا افتتاح کیا۔اس موقعہ پر15 برس اور13 برس سے کم عمر کے زمروں کی سٹیٹ فٹبال اکاڈمی کے کھلاڑیوں کی عزت افزائی کے علاوہ انہیں گریجویشن سرٹیفکیٹ اور دیگر ایوارڈ بھی فراہم کئے گئے۔سٹیڈیم کو2014 میں قائم کیا گیا تھا اور اس میں15 ہزار شائقین کے بیٹھنے کی گنجائش ہے۔ سٹیڈیم میں حال ہی میں آئی لیگ فٹبال ٹورنامنٹ کھیلا گیا جس میں رئیل کشمیر ایف سی نے شاندار کارکردگی کا مظاہرہ کیا۔ریاست سے معراج الدین وُڈو اور اشفاق احمد جیسے مایہ ناز کھلاڑی سامنے آئے ہیں جنہوں نے مُلک کی معروف ٹیموں کولکتہ جائنٹس، موہن بگان اور دیگر کلبوں میں اپنے کھیل کا مظاہرہ کیا ہے۔