ٹریفک نظام کی باقاعدگی اور حادثات روکنے کیلئے

 سرینگر//ایڈیشنل ڈپٹی کمشنر سرینگر پورنیما متل کی صدارت میں کل منعقدہ ایک میٹنگ کے دوران ڈسٹرکٹ روڈ سیفٹی ایکشن پلان کے لئے تیاریوں کا جائزہ لیا گیا۔میٹنگ میں آر ٹی او کشمیر،ایس پی ٹریفک ،آر اینڈ بی،ایس ایم سی اور پی ڈی ڈی کے ایگزیکٹیو انجینئران ،تعلیمی اداروں کے پرنسپل صاحبان اور این جی اووز کے نمائندوں کے علاوہ دیگر متعلقہ آفیسران بھی موجود تھے۔اس موقعہ پر ایس ایم سی کے ایگزیکٹیو انجینئر نے بتایا کہ کارپوریشن عنقریب ہی شہر میں انٹلجنٹ ٹریفک لائٹس نصب کرے گی جس سے ٹریفک نظام میں باقاعدگی یقینی بن جائے گی اور حادثات میں بھی کمی آئے گی۔میٹنگ سے خطاب کے دوران اے ڈی سی نے کہا کہ ٹریفک حادثات کی وجہ سے آئے د ن کئی قیمتی جانوں کا زیاں ہوتا ہے اور ان جان لیوا حادثات پر روک لگانے کے لئے ہر ممکن اقدامات کرنے کی ضرورت ہے۔میٹنگ میں بتایاگیا کہ روڈ س اینڈ ہائی ویز کی وزارت نے 2017-18کے تحت ڈسٹرکٹ روڈ سیفٹی ایکشن پلان ترتیب دیا ہے جس میں ملک کے ہر ضلع کو فارمیٹ کے تحت پلان کرنے کی ہدایت دی گئی ہے فارمیٹ کے تحت روڈ سیفٹی کے لئے چھ تجاویز پر عملدر آمد کرنے کا فیصلہ کیا گیا ہے۔اے ڈی سی نے تمام متعلقہ محکموں کے وزارتِ روڈس اینڈہائی ویز کے فارمیٹ کے تحت ضلع سرینگر کے لئے ایک ہفتے کے اندر اندر تجاویز پیش کرنے کے لئے کہا ہے تاکہ مسافروں کے تحفظ،لوگوں اور ڈرائیوروں کی سہولیت کے لئے اس پر عملدر آمد کیا جاسکے۔