سرینگر//پولیس نے وچی شوپیان میں ایک کارروائی کے جنگجوتنظیم جیش محمدکے دوبالائے زمین ورکروں کوگرفتارکرنے اوراُن کے قبضے سے اسلحہ برآمدکرنے کادعویٰ کیا ہے۔ معلوم ہوا ہے کہ عسکری تنظیم جیش محمد کے دو بالائے زمین ورکروں کی نقل و حمل کی اطلاع ملنے کے بعد فوج کے 55آر آر ، سی آر پی ایف اور پولیس نے پیٹرول پمپ وچی کے نزدیک ناکہ لگایا جس دوران وہاں سے گزر رہے دونوجوانوں کو فورسز نے رکنے کا ااشارہ کیا،تاہم دونوں نے فرار ہونے کی کوشش کی جس کے بعد فورسز نے اُن کا تعاقب کیا اور دونوں کی گرفتاری عمل میں لائی ۔ ذرائع سے معلوم ہوا ہے کہ فورسز نے دونوں نوجوانوں سے پستول اور دو گرینیڈ بر آمد کر لئے ۔ پولیس کے ایک افسر نے اس کی تصدیق کرتے ہوئے بتایا کہ دونوں نوجوان عسکری تنظیم جیش محمد کیلئے بالائے زمین کام کر رہے تھے جبکہ انہیں وچی میں تعینات پولیس و فورسز کی پارٹی کو نشانہ بنانے کامنصوبہ تھاجس کی پولیس و فورسز کو پہلے ہی اس کی اطلاع ملی تھی جس کے بعد خصوصی آپریشن کے دوران دونوں کی گرفتاری عمل میں لائی گئی ۔ اس سلسلے میں پولیس اسٹیشن زینہ پورہ میں کیس درج کرکے مزید تحقیقات شروع کر دی گئی ہے ۔
وچی شوپیان میں 2بالائے زمین کارکن گرفتار | پستول اور2ہتھ گولے برآمد
