وراٹ اور رہانے کی بدولت ہندوستان کا آسٹریلیا کو شاندار جواب

پرتھ/کپتان وراٹ کوہلی (ناٹ آوٹ 82) اور نائب کپتان اجنکیا رہانے (ناٹ آوٹ 51) کی شاندار نصف سنچریوں کی بدولت ہندوستان نے دوسرے کرکٹ ٹسٹ کے دوسرے دن ہفتہ کو آسٹریلیا کو شاندارجواب دیتے ہوئے اپنی پہلی اننگز میں تین وکٹ پر 172 رنز بنا لئے ۔ ہندوستان نے صبح آسٹریلیا کو پہلی اننگز میں 326 رن پر سمیٹ دیا تھا اور اب وہ پہلی اننگز میں آسٹریلیا سے 154 رن پیچھے ہے ۔ وراٹ اور رہانے نے چوتھے وکٹ کے لئے 184 گیندوں میں 90 رن کی ناٹ آوٹ ساجھے داری کی۔ وراٹ نے 181 گیندوں پر ناٹ آوٹ 82 رن میں نو چوکے لگائے ہیں جبکہ رہانے نے 103 گیندوں پر ناٹ آوٹ 51 رن میں چھ چوکے اور ایک چھکا لگایا ہے ۔ وراٹ اور رہانے نے اپنی شراکت کے دوران آسٹریلوی گیند بازوں کو غلبہ حاصل کرنے کا کوئی موقع نہیں دیا۔ دونوں نے میدان پر شاندار شاٹ کھیلے ۔ وراٹ اور رہانے کے اسٹریٹ ڈرائیو تو خاص طور پر دیکھنے کے قابل تھے ۔ وراٹ نے تو آسٹریلیا کے خلاف جیسے بڑی اننگز کھیلنے کی عادت ڈال لی ہے ۔ ہندستانی کپتان کا آسٹریلیا کے خلاف یہ 10 واں ففٹی پلس اسکور تھا اور گزشتہ نو میں سے چھ موقعوں کو وراٹ نے سنچری میں تبدیل کیا ہے ۔ وراٹ ابھی سنچریوں کی سلور جوبلی منانے سے صرف 18 رن دور رہ گئے ہیں ۔ وراٹ کا ان کے ڈپٹی رہانے نے اچھا ساتھ دیا اور دونوں نے دن کے اختتام پر ہندستان کو خوشگوار حالت میں پہنچا دیا ہے ۔ صبح آسٹریلیا کو سمیٹنے کے بعد ہندستان نے کافی خراب شروعات کی اور صرف آٹھ رن تک دونوں اوپنروں کو گنوا دیا۔ مرلی وجے اور لوکیش راہل دونوں ناکام رہے ۔وجے کو مشیل اسٹارک نے تیسرے اوور کی آخری گیند پر بولڈ کر دیا۔ وجے 12 گیند کھیل کر اپنا اکاؤنٹ نہیں کھول پائے ۔ راہل کو چھٹے اوور کی آخری گیند پر جوش ہیزل وڈ نے بولڈ کیا۔ راہل نے 17 گیند کھیل کر محض دو رن بنائے ۔ گزشتہ میچ کے سنچری میکر اور مین آف دی میچ رہے چتیشور پجارا نے ایک بار پھر آسٹریلوی گیند بازوں کا ڈٹ کر سامنا کیا۔ پجارا نے وراٹ کے ساتھ تیسرے وکٹ کے لئے 74 رن جوڑے اور ہندستان کو بحران سے باہر نکالا۔ پجارا کے اٹیک کو اسٹارک نے انہیں ٹم پین کے ہاتھوں کیچ کراکر ختم کیا۔ پجارا نے 103 گیندیں کھیلیں اور 24 رن میں صرف ایک چوکا لگایا۔ پجارا کا وکٹ 82 کے اسکور پر گرا لیکن اس کے بعد وراٹ اور رہانے نے ٹیم کو کوئی اور نقصان نہیں ہونے دیا۔ اس سے پہلے آسٹریلیا نے چھ وکٹ پر 277 رن سے آگے کھیلنا شروع کیا۔ کپتان ٹم پین (16) اور پیٹ کمنز (11) نے اپنی اننگز کو آگے بڑھایا۔ دونوں نے ٹیم کے اسکور کو 300 کے پار پہنچا دیا۔ اس وقت ایسا لگ رہا تھا کہ آسٹریلیا 350 سے زیادہ کے اسکور کی طرف گامزن ہو چکا ہے ۔ لیکن ہندوستانی گیند بازوں نے 16 رن کے وقفے میں آسٹریلیا کے آخری چار وکٹ نکال کر میزبان ٹیم کی اننگز 326 رنز پر سمیٹ دی۔ امیش یادو نے کمنز کو بولڈ کیا۔ کمنز نے 19 رن بنائے اور وہ اپنے ا سکور آٹھ رن کا اضافہ کر سکے ۔ جسپریت بمراہ نے پین کو ایل بی ڈبلیو کر ہندوستان کو آٹھویں کامیابی دلا دی۔ پین نے 89 گیندوں میں پانچ چوکوں کی مدد سے 38 رنز بنائے ۔ ایشانت شرما نے مشیل اسٹارک اور جوش ہیزل وڈ کے وکٹ لے کر آسٹریلیا کی اننگز نمٹا دی۔ ایشانت 20.3 اوور میں 41 رن پر چار وکٹ لے کر ہندستان کے سب سے کامیاب گیند باز رہے ۔ بمراہ کو 53 رن پر دو وکٹ، یادو کو 78 رن پر دو وکٹ اور ھنوما وھاري کو 53 رن پر دو وکٹ ملے ۔