سری نگر//جموں وکشمیر حکومت نے اتوار کو جاری ایک حکم نامے میں کہا ہے کہ 31 اکتوبر 2019 سے پہلے پی ایس سی اور ایس ایس بی کو بھیجی گئی اسامیاں جنہیں حال ہی میں ایک حکومتی حکم نامے کے پیش نظر واپس لے لیا گیا تھا، انہیں جلد ہی مشتہر کیا جائے گا۔
واضح رہے کہ جموں و کشمیر انتظامیہ نے جموں و کشمیر پبلک سروس کمیشن اور سروس سلیکشن بورڈ کو 31 اکتوبر 2019 سے پہلے بھرتی کے لیے بھیجی گئی تمام آسامیاں واپس لے لی ہیں۔
حکومت نے آج جاری ایک حکم نامے میں واضح کیا کہ31اکتوبر2019 سے پہلے پی ایس سی/ایس ایس بی کو بھیجی گئی صرف ان اسامیوںکو واپس لیا گیا ہے جن پر ابھی تک کوئی پیش رفت نہیں ہوئی تھی،
اب، ان آسامیوں کو فاسٹ ٹریک کی بنیاد پر بھرتی کے لیے دوبارہ مشتہر کیا جائے گا تاکہ یہ یقینی بنایا جا سکے کہ ریزرویشن اور ڈومیسائل کے قوانین کو مدنظر رکھتے ہوئے ان کو مقررہ وقت میں پُر کیا گیا ہے۔
ذرائع نے بتایا کہ بعض مقامات پر 2004کے بعدمتعدد پوسٹوں کو مختلف محکموں کی طرف سے پی ایس سی/ایس ایس بی کو بھیجا گیا تھا، لیکن وہ طویل عرصے تک پر نہیں ہو پائی ہیں۔
ان میں سے کچھ پوسٹوں کی تشہیر نہیں کی جا سکتی تھی، کیونکہ وہ بھرتی کے قوانین کے خلاف تھیں۔ اس لیے ان عہدوں پر انتخاب نہیں ہو سکتا تھا۔ ان پوسٹوں کو واپس لینا اس بات کو یقینی بنانے کے لیے ضروری تھا کہ انہیں جموں و کشمیر کے نوجوانوں کے لیے مواقع کھولنے کے لیے عام قوانین کے مطابق پر جا سکے۔
ان آسامیوں کو واپس لینے کی وجہ واضح کرتے ہوئے، حکومت نے کہا: "مزید ، مختلف محکموں کے بھرتی کے قوانین کو تبدیل / اپ ڈیٹ کیا گیا ہے۔ اسامیوں کی تعداد کے لیے مطلوبہ اہلیت اور تجربہ تبدیل ہو گیا ہے۔ مزید ، 31اکتوبر2019 کے بعد، کچھ پوسٹوں کو مرکز کے زیر انتظام علاقہ لداخ میں بھی منتقل کیا گیا تھا۔ لداخ کو منتقل کردہ عہدوں پر اب انتخاب نہیں کیا جا سکتا۔ اس لیے ان عہدوں کی واپسی ضروری تھی۔
انہوں نے کہا کہ ان آسامیوں کو واپس لینے سے نوجوانوں کے لیے ملازمت کے مواقع کم نہیں ہوئے ہیں، کیونکہ جلد ہی ان پوسٹوں کا دوبارہ مشتہر کیا جائے گا۔
حکومت نے مزید کہا، پہلے ہی تمام نئی آسامیاں ریکروٹمنٹ ایجنسیوں کو بھیجی جا رہی ہیں تاکہ تیز رفتار بھرتی کے عمل کو جاری رکھا جا سکے، اور سب کو یکساں مواقع فراہم کیے جا سکیں۔ ان آسامیوں کو تمام محکموں میں پہلے سے شناخت شدہ آسامیوں کے ساتھ بھرتی مہم میں بھی رکھا جائے گا۔ انہوں نے مزید کہا کہ آزادانہ، منصفانہ، میرٹ پر مبنی انتخاب کو یقینی بنایا جائے گا۔
