نیشنل کانفرنس خصوصی پوزیشن کی بحالی کیلئے ہر سطح پر برسرجہد

جموں//نیشنل کانفرنس کے جنرل سیکریٹری علی محمد ساگر نے کہا ہے کہ جموں وکشمیر کی وحدت، انفرادیت ، اجتماعیت اور مذہبی ہم آہنگی کا راز نیشنل کانفرنس کی مضبوطی میں ہی مضمر ہے۔وہ شیر کشمیر بھون جموں میں صوبائی سطح کے ایک اجلاس کی صدارت کررہے تھے۔ اجلاس میں صوبائی صدر جموں ایڈوکیٹ رتن لعل گپتا، خالد نجیب سہروردی، صوبہ جموں کے عہدیداران کے علاوہ پارٹی کی مختلف اکائیوں کے سربراہان، زون صدور صاحبان اور ضلع صدور بھی موجود تھے۔ حاجی علی محمد ساگر نے زور دیا کہ صوبہ جموں کی ممبرشپ مہم کے حسابات کو فوری طور پر مکمل کیا جائے اور ڈیلی گیٹوں کے قیام سے متعلق تمام لوازمات بھی پورے کئے جائیں۔ انہوں نے کہاکہ ڈیلی گیٹوں کے قیام کا عمل مکمل ہونے کے ساتھ ہی ریاستی سطح کے ڈیلی گیٹ سیشن کا انعقاد کیا جائے گا۔ اُن کا کہنا تھا کہ جموں وکشمیر کی وحدت، انفرادیت ، اجتماعیت اور مذہبی ہم آہنگی کا راز نیشنل کانفرنس کی مضبوطی میں ہی مضمر ہے ۔انہوںنے کہا کہ ہماری جماعت نے چٹان جیسے چیلنجوں کا سامنا کیا اور نشیب و فراز دیکھے ہیں اور ہمیشہ سرخ رو ہوکر اُبھری ہے، یہ سب اس لئے ممکن ہوپایا کیونکہ اس جماعت کو عوامی حمایت حاصل رہی ہے۔ انہوں نے کہاکہ نیشنل کانفرنس آج بھی تینوں خطوں کے عوام کے دلوں میں راج کرتی ہے اور یہی ایک واحد عوامی نمائندہ جماعت ہے جو تینوں خطوں کے عوام کو درپیش چیلنجوں، مسائل و مشکلات سے نجات دلا سکتی ہے۔ساگر نے کہا کہ نیشنل کانفرنس جموںوکشمیر کی خصوصی پوزیشن کی بحالی کیلئے ہر سطح پر برسرجہد ہے اور ساتھ قانونی لڑائی بھی لڑ رہی ہے۔