مغل شاہراہ پر دوسرے روز بھی ٹریفک بند رہی | بحالی کیلئے سرنکوٹ کی جانب سے برف ہٹالی گئی

سرنکوٹ//جموں وکشمیر کے پہاڑی سلسلے میں جمعہ اور سنیچر کی درمیانی شب ہوئی برفباری کی وجہ سے مغل شاہراہ دوسرے روز بھی مسلسل بند رہی جبکہ میکینکل شعبہ کی جانب سے شاہراہ کی بحالی کیلئے اقدامات اٹھائے جارہے ہیں ۔محکمہ موسمیات کی پیشنگوئی کے مطابق موسم میں آئی تبدیلی کی وجہ سے خطہ پیر پنچال میں جہاں بارشیں و برفباری ہوئی ہے وہائیں سردی لہر بھی شروع ہو گئی ہے ۔خطہ پیر پنچال کو وادی کیساتھ جوڑنے والی مغل شاہراہ پیر گلی و ملحقہ علاقوں کیساتھ ساتھ پوشانہ وغیرہ میں ہوئی موسم کی پہلی برفباری کی وجہ سے سنیچر سے ہی گاڑیوں کی آمد ورفت بند ہے۔مغل شاہراہ کی بحالی کا کام کرنے والی امیکینکل ایجنسی کے ایک آفیسر نے بتایا کہ شاہراہ کی بحالی اور برف ہٹانے کیلئے مشینری کو روانہ کردیا گیا تھا جبکہ سرنکو ٹ کی جانب سے پیر گلی تک برف کو ہٹالیا گیا ہے جبکہ شوپیاں کی جانب سے ابھی تک برف نہیں ہٹائی جاسکی ۔انہوں نے امید ظاہر کرتے ہوئے کہاکہ جلد ہی شاہراہ کو بحال کر دیا جائے گا ۔