مسلمانوں پر دہشت گردی کا لیبل ایک بڑی سازش:ڈاکٹر فاروق

سرینگر// نیشنل کانفرنس کے صدر ڈاکٹر فاروق عبداللہ نے  مسلمانوں پر دہشت گردی کا لیبل لگانے کوبڑی سازش سے تعبیرکرتے ہوئے واضح کیاہے کہ قوم اور ملت میں اتفاق ہی کامیابی اور کامرانی کی بڑی کنجی ہے۔مسلمانوں کی یکجہتی کودشمنان ِ اسلام کی سازشوں کا موثر توڑ قراردیتے ہوئے ڈاکٹرفاروق نے خبردارکیاہے کہ  اتحاد و اتفاق کا فقدان اُمتِ مسلمہ کودرپیش مشکلات کی بنیادی وجہ ہے۔سرینگر میں ایک تقریب پر خطاب کرتے ہوئے انہوں نے کہاہے کہ دنیا کے قدیم اور ترقی یافتہ اسلامی ممالک، جو اسلامی تہذیب و تمدن کے گہوارہے رہے ہیں، کو کھنڈرات میں تبدل کرنے کا سلسلہ جاری ہے۔ عراق، شام، لبنان، فلسطین، مصر، ترقی ، افغانستان ، یمن‘ اور دیگر ممالک کی مثال پیش کرتے ہوئے انہوں نے کہا کہ ان ممالک میں میلوں پر اسلامی یونیورسٹیاں، دانشگاہیں، مدارس، اسلامی فن تعمیر کی شاندار عمارتیں اور اسلامی لائبریریاںایک منصوبہ بند سازش کے تحت زمین بوس کی گئیں۔ ڈاکٹر فاروق نے کہاکہ آج ہمارے ان مقدس اور تاریخی اسلامی ممالک میں ہر روز قیمتی جانوں کی تلافی ہورہی ہے، جس سے عالم انسانیت کانپ اُٹھتی ہے۔ڈاکٹر فاروق عبداللہ نے خبردارکیاکہ دنیا بھر کی اسلام دشمن قوتیں متحد ہوکر مسلمانوں کیخلاف سازشوں کے جال بُن رہی ہیں جبکہ ہم (مسلمان) آپس میں مسلکی بنیادوں پر لڑنے میں مصروف ہیں۔انہوں نے کہاکہ یہ سب کچھ ہماری نااتفاقی اور اللہ کی نافرمانیوں کی وجہ سے ہورہا ہے۔ ڈاکٹر فاروق نے کہا کہ اسلام نے دنیا میں ایک صالح نظام کی بنیاد ڈالی اور رنگ و نسل ، ذات پات اور گورے کالے کی تمیز مٹا کر مساوات، انصاف، عدل اور بھائی چارے کی بنیاد ڈالی۔ انہوں نے عالم اسلام کے سربراہوں سے اپیل کی کہ وہ آپسی دوریاں پاٹ کر متحد ہوجائیں اور مسلم دنیا کیخلاف ہورہی سازشوں کا ڈٹ کر مقابلہ کریں۔ انہوں نے کہا کہ ریاستی عوام بھی ایک مشکل اور تباہ کن دور سے گزر رہے ہیں، اہل کشمیر ہر سطح پر عدم تحفظ کا شکار ہیں۔ ریاست کے لوگ بے چینی، لاقانونیت، اقتصادی بدحالی اور سیاسی بحران میں پھنسے ہوئے ہیں۔ انہوں نے اہل کشمیر سے اپیل کی کہ وہ متحد ہوکر اللہ کے دربار میں سربسجود ہوکر اہل کشمیر کو موجودہ پریشانیوں اور مشکلات سے نجات دلانے کیلئے دعا کریں۔