مزید خبریں

 

 

جموں //مرکزی جوائینٹ سیکرٹری برائے وزارت دیہی ترقی روہت کمار نے جموں میں ایم جی نریگا کے تحت جموں و کشمیر میں جاری مختلف ترقیاتی کاموں کا جائیزہ لیا ۔ روہت کمار نے مختلف پنچائتوں  کا  دورہ کیا تا کہ منریگا کے کاموں کا زمینی سطح پر جائیزہ لے سکیں ۔ ان کے ہمراہ ڈائریکٹر دیہی ترقی جموں کشور سنگھ چب ، ایڈیشنل سیکرٹری اور انچارج منریگا جے اینڈ کے پران سنگھ ، ایڈیشنل ڈسٹرکٹ پروگرام کوارڈینیٹر اشوک کمار ، بی ڈی اوز اور محکمہ کے دیگر فیلڈ افسران موجود تھے ۔ دورے پرآئے آفیسر نے اسکیم کے حوالے سے عوام سے رائے لینے کیلئے مختلف لوگوں اور فائدہ اٹھانے والوں سے بھی ملاقات کی ۔ انہوں نے کام کے معیار اور کام کے ریکارڈ اور فائلوں کی دیکھ بھال کی تعریف کی ۔ انہوں نے معاشرے کے کمزور طبقے بشمول ایس سی /ایس ٹی اور خواتین کو ان کے انفرادی کاموں جیسے پودے لگانے ، زمین کی ترقی وغیرہ سمیت منریگا کا فائدہ پہنچانے کی ضرورت پر زور دیا ۔ انہوں نے پنچائت اور گاؤں کی سطح پر آگاہی کیمپ لگانے کی ضرورت پر زور دیا تا کہ اسکیموں کے فوائد کو اجاگر کیا جا سکے اور انہیں منریگا ایکٹ کے تحت جائیز کاموں کی اقسام سے آگاہ کیا جا سکے ۔ اس سے قبل جوائینٹ سیکرٹری نے سول سیکرٹریٹ جموں میں ایک تفصیلی میٹنگ بھی کی جس میں منریگا کی پیش رفت اور کام کاج کا جائیزہ لیا گیا ۔ میٹنگ میں ڈائریکٹر رورل ڈیولپمنٹ جموں و کشمیر ، ایڈیشنل سیکرٹری اور یو ٹی کے تمام اے سی ڈی نے شرکت کی ۔ میٹنگ میں بتایا گیا کہ جموں و کشمیر سوشل آڈٹ یونٹ قائم کیا گیا ہے جو کہ جنوری 2021 سے مکمل طور پر فعال ہے ۔ 

 

 

 

سرینگر//جموںو کشمیر کے عوام کے مسائل و مشکلات میں ہر گزرتے دن کیساتھ اضافہ ہوتا جارہا ہے اور حکومتی سطح پر کہیں سے بھی راحت رسانی نہیں ہورہی ہے، صرف زبانی جمع خرچ سے یہاں تعمیر و ترقی، خوشحالی اور امن و امان کے دعوے کئے جارہے ہیں جبکہ زمینی سطح کے حالات انتہائی دگرگوں ہیں۔ ایک بیان کے مطابق ان باتوں کا اظہار نیشنل کانفرنس جنرل سکریٹری علی محمد ساگر نے مختلف عوامی وفود، پارٹی عہدیداروں اور کارکنوں کیساتھ تبادلہ خیال کرتے ہوئے کیا۔ اس دوران صوبائی صدر ناصر اسلم وانی سمیت دیگر لیڈران بھی جنرل سکریٹری سے ملاقی ہوئے۔وفود نے کہا کہ لوگوں کو اُن بنیادی ضروریات کیلئے بھی سڑکوں پر آنا پڑ رہا ہے جو ماضی میں خود بہ خود میسر رہا کرتی تھیں۔ اس کے علاوہ وفود نے حد سے تجاوز کر گئی بے روزگاری، کمر توڑ مہنگائی، اقتصادی بدحالی اور معاشی بحران کے مسائل اُجاگر کئے۔ جنرل سکریٹری علی محمد ساگر نے کہا کہ جموں وکشمیر میں اس وقت بے روزگاری حد سے تجاوز کر گئی ہے کیونکہ انتظامیہ اس جانب کوئی بھی توجہ نہیں دے رہا ہے۔ خصوصی بھرتی عمل تو دور کی بات گذشتہ برسوں سے یہاں معمول کی بھرتیاں نہیں ہورہی ہیں۔ انہوں نے کہا کہ گذشتہ برسوں سے جاری غیر یقینیت اور بے چینی سے یہاں کا نوجوان سب سے زیادہ متاثر ہوا اور بڑھتی ہوئی بے روزگاری نے نئی پود کو مزید پشت بہ دیوار کر کے رکھ دیا ہے ۔یہ ایک سنگین صورتحال ہے اور حکومتی سطح پر بھی اس کا تدارک کرنے کیلئے کچھ نہیں ہورہا ہے۔ علی محمد ساگر نے کہا کہ جموں وکشمیر کے عوام غیر یقینی صورتحال اور کمر توڑ مہنگائی کی دوہری مار سے پریشانِ حال ہیں۔ گذشتہ برسوں سے جاری غیر یقینیت سے یہاں کے لوگوں کی اقتصادی حالت بد سے بدتر ہوتی جارہی ہے اور دوسری جانب اشیائے ضروریہ، پیٹرولیم مصنوعات، رسوئی گیس ،اشیائے خورد و نوش کی آسمان چھوتی قیمتیں اور پینے کے پانی کی فیس میں حد سے زیادہ اضافہ بھی لوگوں کیلئے وبالِ جان بن کر رہ گیا ہے۔ انہوں نے کہا کہ سب سے زیادہ افسوس اس بات کا ہے کہ حکومت ان بنیادی عوامی مسائل کی جانب کوئی بھی توجہ دینے کی زحمت گوارا نہیں کررہی ہے۔ دریں اثناء ایک تعزیتی اجلاس میں پارٹی کارکن  محمد یوسف وانی(حلوائی) ساکن خانقاہِ معلی کو یومِ وصال پر زبردست خراج عقیدت ادا کیا گیا ۔ 

 

 

کنگن//غلام نبی رینہ//ضلع انتظامیہ گاندربل نے سونہ مرگ اور مانسبل میں سنیچروار اور اتوار کو سیلانیوں کی آمد پر پابندی عائد کی ہے۔ تفصیلات کے مطابق کورونا وائرس عالمگیر وباء کے پیش نظر ضلع انتظامیہ گاندربل نے حکم جاری کیا ہے جس میں صحت افزا مقام سونہ مرگ اور مانسبل کی طرف جانے والے سیلانیوں کی آمدورفت پر پابندی عائد کی گئی ہے۔ حکم نامہ میں کہا گیا ہے کہ ان دونوں مقامات پر ا نہی سیاحوں کو جانے کی اجازت دی جائے گی جن کے پاس ہوٹل کی تصدیق شدہ بکنگ ہوگی ۔ضلع انتظامیہ گاندربل نے پولیس کو حکم دیا ہے کہ وہ بارسو اور گنڈ گگن گیر میں ناکہ لگاکر کسی سیلانی کو ان مقامات کی طرف جانے کی اجازت نہ دے۔ضلع انتظامیہ نے حکم نامے میں کہا ہے کہ سونہ مرگ شاہراہ پر صرف لداخ کی طرف جانے والے گاڑیوں کو ہی جانے کی اجازت ہوگی۔ضلع انتظامیہ نے سی ای او سونہ مرگ ڈیولپمنٹ اتھارٹی کو حکم دیا ہے کہ سونہ مرگ کے ہوٹل والوں کوہدایت دیے کہ وہ اپنے ہوٹلوں کو سینی ٹائز کریں اور ایس او پیز کا احترام کریں۔

 

 

 

 

سری نگر//ملازم انجمنوں کے مشترکہ پلیٹ فارم ایمپلائز جوائنٹ کنسلٹیٹو کمیٹیEJCCنے سرکاری ملازمین کیخلاف مختلف تحقیقاتی اداروںمیں دائرکی جانے والی بے بنیاد اوربے نامی شکایت پرسخت تشویش ظاہر کرتے ہوئے کہا کہ ایسے مذموم حربوں سے سرکاری محکموں میں معمول کاکام کاج  متاثر ہورہاہے ۔ سینئر ٹریڈیونین لیڈر اورEJCCکے صدر اعجاز احمدخان نے ایک بیان میں کہاکہ یہ بات بڑی پریشان کن ہے کہ کچھ غلط کار عناصر محض اپنے ذاتی اغراض ومقاصد کیلئے سرکاری ملازمین کیخلاف مختلف تحقیقاتی اداروں بشمول انسداد کورپشن بیورئو اور کرائم برانچ میں شکایات درج کرتے ہیں ۔انہوں نے کہاکہ ایسی بیشتر تحریری شکایات بے نامی ہوتی ہیں ،مطلب ان پر شکایت کنندہ کانام نیچے نہیں لکھاہوتا ہے ،جو کہ سراسر غیرقانونی اورملازمین کوبلاوجہ پریشان کرنے کاایک حربہ ہے ۔اعجاز احمدخان نے کہاکہ بیشتر سرکاری محکموں بالخصوص محکمہ خوراک ،رسدات وعوامی تقسیم کاری میں تعینات ملازمین کو بے نامی شکایات کے ذریعے ہراساں وپریشان کیا جارہاہے ،جس وجہ سے ایسے ملازمین کازیادہ تروقت ان شکایات کی سماعت یاتحقیقات میں گزرجاتاہے ،اوروہ اپنے اصل کام اورذمہ داریوں پرتوجہ نہیں دے پارہے ہیں ۔انہوںنے کہاکہ ایسے مذموم حربوں سے سرکاری محکموںکاکام کاج اورورک کلچر اثراندازہورہاہے ۔سینئرٹریڈیونین لیڈ راورEJCCکے صدر اعجاز احمدخان نے جموں وکشمیرمیں31جولائی2014میں جاری کردی ایک سرکیولرزیرنمبر29/GAD(VG)آف 2014اورمرکزی سرکار کے جاری کردہ آرڈروں زیرنمبرات 104/76/7011-ABD-1 بتاریخ18 دسمبر2013اور25نومبر2014کاحوالہ دیتے ہوئے کہاکہ کسی بھی ملازم یاعام شہری کیخلاف کسی بھی تحقیقاتی ادارے میں شکایت درج کرنے والے کانام درج یالکھا ہونا چاہئے ۔انہوںنے بتایاکہ بغیر اپنا نام لکھے کچھ غلط کار عناصر ملازمین کوپریشان کرنے پرتلے رہتے ہیں اورایسے عناصر کے اپنے اغراض اورمفادات ہوتے ہیں ،جن کاتحقیقاتی اداروں کونوٹس لینا چاہئے ۔اعجاز احمدخان نے بتایاکہ مرکزی سرکار کے  احکامات میں یہ واضح کیا گیاہے کہ کسی بھی شخص یاملازم کیخلاف بے نامی شکایت درج یازیرغور نہیں لائی جانی چاہئے جبکہ قانونی اعتبار سے کسی بھی شہری کیخلاف کسی بھی ادارے میں بے بنیادشکایت درج کرنے والے کیخلاف قانونی کارروائی کرنے کی اجازت بھی دی گئی ہے ۔سینئر ٹریڈیونین لیڈراعجاز احمدخان نے کہاکہ ملازم انجمنوں کے مشترکہ پلیٹ فارم ایمپلائز جوائنٹ کنسلٹیٹو کمیٹیEJCC کایہ مشن ہے کہ سرکاری محکموں میں ورک کلچر بہتر ہو اورہم اس ضمن میں اپنا رول نبھاتے ہیں ۔انہوںنے جموں وکشمیرکی حکومت بالخصوص متعلقہ سرکاری حکام سے اپیل کی کہ وہ بے نامی شکایات درج کراکے سرکاری ملازمین کوپریشان اوراُن کی حوصلہ شکنی کرنے والے مفاد پرست اورغلط کار عناصر کیخلاف سخت موقف اختیار کریں ۔

 

 

 

 

سری نگر// پیپلز کانفرنس نے الزام لگایاہے کہ اپوزیشن جماعتوںکی میٹنگ میں شرکت کرکے فاروق عبداللہ اورمحبوبہ مفتی نے جموں وکشمیرکی خصوصی پوزیشن کے تابوت میں ایک اورکیل ٹھونک دی ۔ پیپلز کانفرنس نے زور دے کر کہا کہ دفعہ 370 اور 35 اے کی منسوخی پر 19 اپوزیشن جماعتوں کی خاموشی ان دفعات کی منسوخی کی توثیق کرنے کے مترادف ہے۔پیپلز کانفرنس کے ترجمان عدنان اشرف نے ایک بیان میں کہاکہ 19جماعتوں کے اجلاس جس میں فاروق عبداللہ اورمحبوبہ مفتی بھی شامل تھیں ،میں دفعہ 370 اور 35 A کی منسوخی پر خاموشی، منسوخی کے اقدام کی توثیق کے مترادف ہے۔انہوں نے کہا کہ19 اپوزیشن جماعتوںکی میٹنگ کے بعد جاری بیان میں بی جے پی حکومت کے5 اگست 2019 کو کئے گئے فیصلوں کو منسوخ کرنے کا کوئی ذکر نہیں تھا۔انہوں نے کہا کہ اپوزیشن نے دفعہ370 ، اور35 اے اور جموں و کشمیر کے ڈومیسائل حقوق واپس لانے کے عوامی مطالبے کو دفن کردیا ہے جبکہ دو سینئر رہنما فاروق عبداللہ اور محبوبہ مفتی نے اجلاس میں شرکت کی۔ انہوں نے کہاکہ فاروق عبداللہ اورمحبوبہ مفتی اپوزیشن جماعتوں کو دفعہ 370اور35Aنیز ڈومیسائل حقوق کی بحالی کے معاملے کو اپنے ایجنڈے میں شامل کرنے پر قائل کرنے میں ناکام رہے۔ انہوں نے سوال کیا کہ یہ سینئر لیڈر میٹنگ میں کیوں شامل ہوئے ،جب وہ اپوزیشن جماعتوں کو گپکار اعلامیہ میں پیش کئے گئے مطالبات کے بارے میں قائل نہیں کر سکے؟۔انہوں نے کہا کہ 19 اپوزیشن جماعتوں کی خاموشی کے ذریعے مجرمانہ ابہام سے تعمیری ابہام بہتر متبادل ہے۔ عدنان اشرف نے کہاکہ اس معاملے کی حقیقت یہ ہے کہ دفعہ 370 اور 35 اے کو بحال کرنے کا سب سے آسان طریقہ پارلیمنٹ ہے، عدالتی عمل وقت طلب ہے۔ بی جے پی ماضی میں یہ واضح کرچکی ہے کہ وہ کبھی بھی جموں و کشمیر کی خصوصی حیثیت بحال نہیں کرے گی۔ اجلاس کے بعد اپوزیشن جماعتوں کی جانب سے اپنایا گیا موقف واضح کرتا ہے کہ وہ پارلیمنٹ میں جموں وکشمیر کی خصوصی حیثیت بحال نہیں کریں گے۔اس بات پر زور دیتے ہوئے کہ پی ڈی پی اور این سی دونوں نے میٹنگ میں شرکت کے ذریعے اپوزیشن جماعتوں کے موقف کی تائید کی ہے ، عدنان اشرف نے کہا کہ اس میٹنگ میں شرکت کرکے فاروق عبداللہ اور محبوبہ مفتی نے جموں و کشمیر کی خصوصی حیثیت کے تابوت پر کیل لگائے ہیں۔انہوں نے کہاکہ ایسا لگتا ہے کہ این سی اور پی ڈی پی فریم میں کودنے اور قومی اپوزیشن کو پیش کرتے ہوئے بہت زیادہ پرجوش ہیں۔ لیکن کس قیمت پر؟ اونچی میز پر ایک نشست تلاش کرنے کیلئے محبوبہ مفتی اور فاروق عبداللہ نے عوام کے حقوق کی بحالی کے اپنے مطالبے کو ختم کر دیا ہے اور سب سے اہم بات یہ ہے کہ جموں و کشمیر کے لوگوں سے کئے گئے وعدوں سے خیانت کی ہے۔انہوں نے کہاکہ اگر یہ 19 اپوزیشن جماعتیں جموں و کشمیر کے لوگوں کے مطالبے کی حمایت نہیں کریں گی تو پھر ایسی میٹنگ میں شرکت کرنے میں کیا مقصد ہے؟۔عدنان اشرف نے کہا کہ این سی اور پی ڈی پی دونوں کو وضاحت کرنی پڑے گی کہ اگر ہندوستانی سیاست کے دونوں سیاسی محاذیعنی حکمران طبقہ اور اپوزیشن جماعتیں خصوصی حیثیت کی بحالی کے خلاف ہیں تو اسے پارلیمنٹ میں کون بحال کرے گا؟۔انہوں نے کہاکہ موجودہ حکمران  اس کی رواداری کے لئے بالکل نہیں جانے جاتے ہے۔ ایک طرف ، مفتی عبداللہ ایک ایسے مخالف گروہ کے ساتھ روٹی توڑتے ہیں جس کے پاس اقتدار میں رہنے کی ضرورت نہیں ہے۔ اس کے باوجود وہ جموں و کشمیر کے لوگوں کے موقف کی تائید سے انکار کرتے ہیں۔ اگر ان جماعتوں کا یہ موقف ہے کہ وہ اقتدار سے باہر ہیں تو یقینا وہ زیادہ سخت گیر ہوں گے جب وہ اقتدار میں ہوں گے۔انہوں نے مزید کہا کہ جے کے پی سی نے ہمیشہ اس بات کو برقرار رکھا ہے کہ بائیں ، دائیں اور مرکزی جماعتوں کے درمیان دفعہ 370 پر قومی اتفاق رائے ہے۔پی سی ترجمان نے کہا کہ جموں و کشمیر کی خصوصی حیثیت کو ختم کرنے میں وہ ایک ہی صف پرکھڑے تھے اور وہ آج بھی اتفاق رائے کا اشتراک کرتے رہتے ہیں۔ انہوں نے مزید کہا کہ جموں و کشمیر کے لوگ اس غیر واضح حقیقت کو جاننے کے مستحق ہیں۔

 

 

 

سرینگر//ڈاکٹر ارشدعلی کو ڈاکٹر س ایسوسی ایشن کشمیرکانیاجنرل سیکریٹری منتخب کیا گیا۔سی این آئی کے مطابق ایسوسی ایشن کی ایک میٹنگ میں ڈاکٹر ارشدعلی کو ایسوسی ایشن کا نیا جنرل سیکریٹری منتخب کیا گیا۔سب ڈسٹرکٹ اسپتال چاڈورہ میں سینئر میڈیکل افسر ڈاکٹر ارشد علی نے ابھی تک ایسوسی ایشن کے کام کاج میں اہم رول نبھایا ہے۔ڈاکٹرس ایسوسی ایشن کے صدرڈاکٹر نثارالحسن نے مطابق ڈاکٹر ارشد علی اب ایسوسی ایشن کے جنرل سیکریٹری کے طور بھی فعال کردار اداکریں گے۔ اس موقع پر ڈاکٹر ارشد نے کہا کہ ایک سائنٹیفک باڈی کا جنرل سیکرٹری ہونا اعزازہے جوسماج کی فلاح و بہبود کا خیال رکھتی ہے۔ ڈاکٹر ارشد نے کہا کہ لوگوں کو ڈاکٹروں سے بہت بڑی توقعات ہوتی ہیں اور ہمیں ان توقعات پر پورااُترنے کی پوری کوشش کرنی چاہیے۔ انہوں نے کہاکہ یہ ہم سب کی ذمہ داری ہے کہ ہم عوامی مسائل کو اٹھائیں۔

تارسرماسر ٹریک غیرمقامی کمپنی کی سرگرمیوں سے تباہ

 

 

 

 

سرینگر//ٹرائول ایجنٹس ایسوسی ایشن آف کشمیرنے تارسر مارسر ٹریک پر سیک واس کے سرسبزمرغزارکوتہس نہس اور برباد کرنے پر تشویش کااظہارکیا ہے۔ایک بیان میں ایسوسی ایشن نے کہا کہ ایک بیرونی ہائیکنگ کمپنی نے کشمیروادی کے بڑے ہائی کنگ ٹریکوں جن میں تارسرمارسر جھیلوں کاٹریک بھی شامل ہے،کوتہس نہس کیا ہے۔بیان میں کہاگیا ہے کہ یہ کمپنی ان ٹریکوں پرگڑھے کھودرہی ہیں اور مستقل ٹینٹ لگارہی ہیںجس سے ماحولیات کوزبردست نقصان ہورہا ہے۔ایسوسی ایشن نے ایسی کمپنیوں پر فوری طور پابندی عائد کرنے کا مطالبہ کیا ہے جوبیت الخلائوں اور دیگر سہولیات کیلئے مستقل ڈھانچے تعمیر کررہی ہیںجس سے ماحول تباہ ہورہا ہے۔ ایسوسی ایشن نے کہا کہ اس کاثبوت وہ ویڈیو کلپس اور تصاویر ہیں جو اس وقت سوشل میڈیا پرچھائے ہیں ۔ایسوسی ایشن نے کہا کہ یہ ثبوت قصوروار کمپنی کے خلاف کارروائی کرنے کیلئے کافی ہونے چاہیے ۔ایسوسی ایشن نے صدرفاروق احمد کٹھو نے حکام پرزوردیا کہ وہ اُن کمپنی پر فوری طور وادی میں کام کرنے پرپابندی عائد کرے،جو اس قسم کی سرگرمیوں میں ملوث ہواور ایک سخت مثال قائم کرے۔اس سے قبل بھی مذکورہ کمپنی نے بلند کیمپنگ  مقامات پرناجائز تجارتی سرگرمیوں سے ماحولیات کوتباہ کیا ہے تاکہ وہ زیادہ سے زیادہ منافع کمائیں،تاہم اس کے خلاف حکومت نے کوئی کارروائی نہیں کی۔

 

 

سرینگر//جی آئی سندیافتہ پشمینہ شالوں پرمحکمہ ہینڈلوم وہینڈی کرافٹس نے کم سے کم قیمت(منیمم سپورٹ پرائز)کااعلان کیا ہے تاکہ دستکاریوں کو فروغ حاصل ہو۔یہ فیصلہ ہاتھ سے بُنے اورتیار کئے گئے پشمینہ شالوںکیلئے جی آئی ٹیگ کو فروغ دینے کیلئے کیاگیاہے۔جی آئی کی اہمیت اس وجہ سے بڑھ گئی ہے کیوں کہ یہ بااعتباراور اصلی مصنوعات کی سند ہے اوراس طرح ایک قیمتی تجارتی اثاثہ ہے۔ابھی تک پشمینہ،سوزنی،کانی،پیپزماشی ،اخروٹ کی لکڑی کاکام ،ختم بند اور قالین بافی کوجیوگرافیکل انڈکیشن آف گڈس قانون1999کے تحت درج کیاگیا ہے۔ 11جون،19جون اور30جون کو منعقدہ میٹنگوں میں پشمینہ کی کم سے کم قیمت مقرر کی گئی جن میں دستکارانجمنوں کے نمائندوں نے بھی شرکت کی۔کمیٹی نے ہاتھ سے بنے پشمینہ شالوں کی تیاری کے دوران مختلف اخراجات کو مدنظررکھتے ہوئے جی آئی ٹیگ سند یافتہ پشمینہ مصنوعات کیلئے کم سے کم قیمت12000روپے مقرر کی۔جلد ہی ہاتھ سے بُنے قالینوں کیلئے بھی کم سے کم قیمت مقرر کی جائے گی۔اس کا مقصد ہاتھ سے بنے شالوں اور قالین بافی کو بحال کرنا ہے تاکہ زمینی سطح پردستکاروں کو بھی فائدہ ملے۔