یو این آئی
نئی دہلی// وزیر اعظم نریندر مودی کی صدارت میں منعقدہ مرکزی کابینہ کی میٹنگ میں چھت پر سولر لگانے اور ایک کروڑ گھروں کیلئے ہر ماہ 300 یونٹ تک مفت بجلی فراہم کرنے کے لیے کل 75,021 کروڑ روپے کی لاگت والی’ پی ایم سوریہ گھر: مفت بجلی یوجنا‘ کو منظوری دے دی گئی ہے۔ وزیر اعظم نے 13 فروری 2024 کو اسکیم کا آغاز کیا تھا۔رہائشی چھتوں پر شمسی توانائی کیلئے مرکزی مالی امداد ( سی ایف اے )یہ سکیم 2 کلو واٹ سسٹمز کے لیے سسٹم لاگت کا 60 فیصد اور 2 سے 3 کلو واٹ صلاحیت کے درمیان سسٹمز کیلئے اضافی سسٹم لاگت کا 40 فیصد سی ایف اے فراہم کرتی ہے۔ موجودہ بینچ مارک قیمتوں پر سی ایف اے کی حد 3 کلو واٹ ہوگی۔
اس کا مطلب ایک کلو واٹ سسٹم کیلئے 30,000 روپے، 2 کلو واٹ سسٹمز کیلئے 60,000 روپے اور 3 کلو واٹ یا اس سے زیادہ کے سسٹمز کیلئے 78,000 روپے سبسڈی ہوگی۔گھر والے، سبسڈی کیلئے نیشنل پورٹل کے ذریعے درخواست دیں گے اور چھت پر سولر لگانے کے لیے مناسب وینڈر کا انتخاب کر سکیں گے۔ نیشنل پورٹل گھرانوں کو ان کے فیصلہ سازی کے عمل میں مناسب نظام کے سائز، فوائد کیلکولیٹر، وینڈر کی درجہ بندی وغیرہ جیسی متعلقہ معلومات فراہم کر کے مدد کرے گا۔گھر والے 3 کلو واٹ تک کے رہائشی آر ٹی ایس سسٹم کی تنصیب کے لیے فی الوقت تقریباً 7فیصد کے کم سود والے قرض تک رسائی حاصل کر سکیں گے۔اس سکیم کے تحت ملک کے ہر ضلع میں ایک ماڈل سولر ولیج تیار کیا جائے گا تاکہ دیہی علاقوں میں چھت پر شمسی توانائی کو اپنانے کے لیے رول ماڈل کے طور پر کام کیا جا سکے۔اربن لوکل باڈیز اور پنچایتی راج ادارے بھی اپنے علاقوں میں آر ٹی ایس تنصیبات کو فروغ دینے کے لیے مراعات سے مستفید ہوں گے۔یہ سکیم قابل تجدید توانائی سروس کمپنی ( آر ای ایس سی او ) پر مبنی ماڈلز کیلئے ادائیگی کے تحفظ کے لیے ایک جزو فراہم کرتی ہے اور ساتھ ہی آر ٹی ایس میں جدید منصوبوں کے لیے فنڈ فراہم کرتی ہے۔ انوراگ ٹھاکر نے کہا کہ اس اقدام سے سولر مینوفیکچرنگ اور سپلائی چین کو زور ملے گا اور 17 لاکھ لوگوں کو براہ راست روزگار ملے گا۔انہوں نے کہا”یہ سولر انرجی ایکو سسٹم کو مضبوط کرے گا،سکیم مینوفیکچرنگ، لاجسٹکس، سپلائی چین، سیلز، انسٹالیشن اور دیگر خدمات میں تقریبا 17 لاکھ براہ راست ملازمتیں پیدا کرے گی” ۔سکیم کے ذریعے، گھرانے بجلی کے بلوں کو بچانے کے ساتھ ساتھ اضافی بجلی کی ڈسکام کو فروخت کرکے اضافی آمدنی حاصل کرنے کے قابل ہو جائیں گے۔ 3 کلو واٹ کا نظام ایک گھرانے کے لیے ماہانہ اوسطا ً300 یونٹس سے زیادہ پیدا کر سکے گا، “۔
