یو این آئی
نئی دہلی// ہندوستانی تیز گیند باز محمد شامی کا پیر کو لندن میں پیر کا آپریشن ہوا ہے ۔ اس وجہ سے وہ 22 مارچ سے 26 مئی تک ہونے والی انڈین پریمیئر لیگ (آئی پی ایل) 2024 میں نہیں کھیل سکیں گے ۔ شامی نے اپنے پیر کے آپریشن کے بعد کی تصویر سوشل میڈیا ایکس پر جاری کی ہے ۔ ان کی انجری کی وجہ سے شبھمن گل کی قیادت والی گجرات ٹائٹنز کو بڑا دھچکا لگا ہے ۔ کیونکہ اس سے پہلے وہ ہاردک پانڈیا کو کھو چکی ہے ۔ ہاردک ممبئی انڈینز میں چلے گئے ہیں۔ آئی پی ایل 2023 میں رنر اپ رہی گجرات کے لیے انہوں نے سب سے زیادہ وکٹیں حاصل کی تھیں۔ شامی کو جنوری میں گھٹنے میں درد محسوس ہوا لیکن وہ پر امید تھے کہ وہ انگلینڈ کے خلاف ٹیسٹ سیریز میں واپسی کریں گے لیکن نیشنل کرکٹ اکیڈمی جانے کے بعد وہ سیریز سے باہر ہو گئے ۔ شامی دورہ جنوبی افریقہ پر بھی ٹیسٹ ٹیم کا حصہ تھے لیکن گھٹنے میں درد کی وجہ سے انہوں نے اپنا نام واپس لے لیا اور بعد میں وائٹ بال سیریز سے باہر ہو گئے ۔ قابل ذکر ہے کہ شامی نے ون ڈے ورلڈ کپ کے بعد سے کوئی کرکٹ نہیں کھیلی ہے ۔ انہوں نے ورلڈ کپ میں ہندوستان کو فائنل تک پہنچانے میں اہم کردار ادا کیا اور سات میچوں میں 10.70 کی اوسط اور 12.20 کے اسٹرائیک ریٹ سے 24 وکٹیں لے کر ٹورنامنٹ میں سب سے زیادہ وکٹیں لینے والے بولر بنے تھے ۔ آئی پی ایل کے پانچ دن بعد ویسٹ انڈیز اور امریکہ میں ہونے والے ٹی 20 ورلڈ کپ میں شامی کے کھیلنے کا امکان بہت کم ہے ۔
