جموں//جموں و کشمیر نیشنل کانفرنس پارٹی کے صدر اور سری نگر سے رکن پارلیمنٹ ڈاکٹر فاروق عبداللہ اور نائب صدر عمر عبداللہ نے ہفتہ کو قاضی گنڈ کے قریب ایک مہلک سڑک حادثے میں ڈوڈہ ضلع کے کوٹلی، کاستی گڑھ علاقے کے چار لوگوں کی موت پر غم کا اظہار کیا۔ڈاکٹر فاروق عبداللہ نے کہا، “مہلک سڑک حادثے میں جانوں کے ضیاع پر مجھے گہرا دکھ ہوا ہے۔ میرے خیالات اور دعائیں متاثرین کے اہل خانہ کے ساتھ ہیں۔‘ عمر نے کہا “میں کل قاضی گنڈ میں ہونے والے المناک سڑک حادثے کے بارے میں جان کرافسردہ ہوں۔خطے میں ہلاکتوں کا دوبارہ ہونا انتہائی تشویشناک ہے، جس پر متعلقہ حکام کو فوری توجہ دینے کی ضرورت ہے۔ مجھے یقین ہے کہ ضلعی انتظامیہ زخمیوں کو ہر ممکن طبی امداد یقینی بنائے گی‘‘۔ اس دوران جنرل سکریٹری حاجی علی محمد ساگر، ڈاکٹر شیخ مصطفی کمال، اجے کمار سدھوترہ ایڈیشنل جنرل سیکرٹریز، صوبائی صدر رتن لال گپتا، ناصر اسلم وانی صوبائی صدر کشمیر، شیخ بشیر احمد صوبائی سیکرٹری، خالد نجیب سہروردی سابق وزیر اور صوبائی نائب صدر سجاد احمد کچلو سابق وزیر اور زون صدر چناب ویلی، ڈاکٹر چمن لال بھگت سابق ایم ایل اے، ڈاکٹر شمشاد شان ڈی ڈی سی چیئرپرسن رام بن، سجاد شاہین ضلع صدر رام بن، بشیر احمد رونیال ڈی ڈی سی، ظفر اللہ راتھر ضلع صدر ڈوڈہ اربن، عبدالقیوم باغوان ضلع صدرڈوڈہ دیہی (بھدرواہ) نے بھی اس المناک سڑک حادثے پر صدمے اور غم کا اظہار کیا ہے۔
جمعیت اہلحدیث کی بھی پسماندگان سے تعزیت
عظمیٰ نیوز سروس
سرینگر//جمعیت اہلحدیث جموں و کشمیر نے قاضی گنڈ میں پیش آئے دل دوز سڑک حادثے پر انتہائی افسوس اور رنج و الم کا اظہار کرتے ہوئے مہلوکین کے لواحقین سے کامل یک جہتی کا اظہار کیا ہے۔جمعیت اہلحدیث ضلع ڈودہ کے صدر بشارت علی ملک کے جواں سال بھانجے کے علاوہ جمعیت حلقہ کاستی گڑھ کے صدر امتیاز احمد بٹ کے کئی اقرباء جان جاں آفرین کے سپرد کر گئے۔جمعیت کے صدر پروفیسر غلام محمد بٹ المدنی نے لواحقین سے ٹیلی فونک رابطہ کرکے اس عظیم صد مے میں کامل یک جہتی کا اظہار کرتے ہوئے اموات کی جنت نشینی کی دعائیں کیں ۔انہوں نے غمزدہ گاں کو صبرو ثبات سے کام لینے کی تلقین کی۔اُنہوں نے اس حادثے میں زخمی افراد کی فوری شفا یابی کے لئے بھی دعائیں کیں۔ نائب صدر ڈاکٹر عبداللطیف الکندی نے سوگواران کو اس انتہائی غم واندوہ کی گھڑی میں صبرو رضا کا دامن تھامے رہنے کی تاکید کرتے ہوئے کہا کہ سانحہ ہوش ربا اور صبر آزما ہے ہم مومن و مسلم ہیں اس لیے اس آزمائش کی گھڑی میں استقامت اور اللہ تعالیٰ کی ذات پر کامل اعتماد ہمارا شیوہ ہو ۔
