فائر اینڈ ایمرجنسی سروس کی اسامیاں

سرینگر// محکمہ فائر اینڈ ایمرجنسی سروسز میں اسامیوں کو پُر کرنے والے امیدواروں نے احتجاج کرتے ہوئے منتخب امیدواروں کی فہرست کو منظر عام پر لانے کا مطالبہ کیاہے۔ وادی کے مختلف علاقوں سے آئے ہوئے امیدواروں نے ہفتہ کو پریس کالونی لالچوک میں گورنر انتظامیہ کی طرف سے فائر اینڈ ایمرجنسی محکمہ میں منتخب امیدواروں کی فہرست کو منظر عام پر نہ لانے کے خلاف احتجاج کیا۔ مظاہرین نے بینئر اور پلے کارڑ اٹھا رکھے تھے جن پر’’ہم کیا چاہتے، انصاف، فائر سروس لسٹ کو اجراء کرو‘‘ کے نعرے درج تھے۔ انہوں نے کہا کہ 2013میں محکمہ فائر اینڈ ایمرجنسی سروسز میں قریب7ہزار امیدواروں نے فائر مین،ڈرائیوروں اور جونیئر اسسٹنٹوں جسمانی اور تحریری امتحانات میں شرکت کی،تاہم  برسوں گزر گئے اورلسٹ کا کوئی بھی نام و نشان نہیں ہے۔امتیاز احمد ایک احتجاجی امیدوار نے کہا کہ2015میں بھرتی مہم کو سرکار نے منسوخ کیا اور بعد میں دسمبر2018میں ایک مرتبہ پھر ’’شفافانہ بھرتی عمل‘‘ طریقے سے دونوں امتحانات نئے سرے سے لئے گئے۔ انہوں نے کہا کہ انہیں امید تھی کہ منتخب امیدواروں کا لسٹ جنوری کے پہلے ہفتہ میں منظر عام پر لایا جائے گا،تاہم ابھی تک کوئی بھی لسٹ اجراء نہیں کیا گیا۔ انہوں نے مطالبہ کیا کہ فوری طور پر منتخب امیدواروں کے لسٹ کو شائع کیا جائے،کیونکہ کئی ایک امیدوار سرکاری نوکری حاصل کرنے کی عمر کی دہلیز پر پہنچ چکے ہیں۔