طلباء کوذمہ داریاں نبھانے کے قابل بنانے کی ضرورت:فاروق عبداللہ

 جموں//نیشنل کانفرنس کے صدرڈاکٹرفاروق عبداللہ نے بچوں کی تعلیم وتربیت اوران کی بہترین ذہنی نشوونما کی جانب خصوصی توجہ مرکوزکرنے کی ضرورت پرزوردیا ہے تاکہ وہ مستقبل میں پیش آنے والے چیلنجوں کا بہ حسن خوبی مقابلہ کرنے کے قابل بن سکیں ۔انہوں نے کہاکہ آج کے بچے کل کے قوم کے معمارہیں ۔ فاروق عبداللہ نے ان خیالات کااظہارابھینوتھیٹر میں سلورہلزہائی سکول پلوڑہ کی جانب سے منعقدہ سالانہ تقریب سے خطاب کرتے ہوئے کیا۔ انہوں نے اساتذہ اوروالدین سے کہاکہ وہ بچوں کوملک وریاست کے تہذیب وتمدن ،سیکولرازم ،سوشلزم اورجمہوریت کے اعلیٰ اقدارکے بارے میں جانکاری فراہم کریں تاکہ وہ مستقبل میں ملک کی ذمہ داریاں بخوبی نبھاسکیں۔ اس کے ساتھ انہوں نے اخلاقی تعلیم کی ضرورت پرزوردیاتاکہ ہمارے بچے اعلیٰ تعلیم یافتہ بننے کے ساتھ باادب اوربہترین تربیت یافتہ بھی ہوں ۔سابق وزیراعلیٰ نے امید ظاہر کی کہ یہ سکول بچوں کی ہمہ جہت شخصیت کونکھارنے میں نمایاں رول اداکرے گا۔ نیشنل کانفرنس کے صوبائی صدر دویندرسنگھ رانا نے اس موقعہ پراپنی تقریب میں طالب علموں ،اساتذہ اوروالدین کے درمیان کھلے ذہن کے ساتھ آپسی تبادلہ بنیادی سکول سطح پرخیالات کی ضرور ت پرزوردیا۔انہوں نے امید ظاہر کی کہ سلوربیلز ہائی سکول کی چیئرمین وجے لکشمی دتہ کی کوشش کے نتیجہ میں یہ ادارہ ریاست کاایک بہترین تعلیمی ادارہ بنے گا۔ اس اسکول پراپنے اعتمادکااظہارکرنے کیلئے رانا نے والدین کومبارکباددی اورامید ظاہر کی کہ یہ تعلیمی ادارہ والدین کے تقاضوں کے عین مطابق کام کرے گا۔اس سے قبل ڈاکٹرفاروق عبداللہ نے نمایاں کارکردگی کے لئے طلباء کومبارکباددی ۔سکول کی پرنسپل نے اس موقعہ پرنصابی اورغیرنصابی سرگرمیوں پرمشتمل ایک تفصیلی رپورٹ پیش کی۔