شیخ محمد عبداللہ کے یوم وصال پر تقریبات کا انعقاد

سرےنگر// نیشنل کانفرنس کے بانی اور ریاست کے سابق وزیراعلیٰ مرحوم شیخ محمد عبداللہ کے35ویں یوم وصال کے موقعہ پرجمعہ کو ریاست بھر میں تقریبات کا انعقاد کیاگیا جس دوران نیشنل کانفرنس کے صدر ڈاکٹر فاروق عبداللہ اور کارگزار صدر عمر عبداللہ سمیت پارٹی کے متعدد لیڈران اور کارکنان نے مرحوم کے مزار پر حاضری دیکر گلباری کی اور فاتحہ خوانی میں حصہ لیا۔ سب سے بڑی تقریب نسیم باغ حضرت بل میں واقع مرحوم کے مقبرہ پر منعقد ہوئی جس میں پارٹی کے متعدد لیڈران،عہدیداروں اور کارکنوں نے شرکت کی ۔ نسیم باغ میںشیخ محمد عبداللہ کے مزار پر صبح سے ہی قرآن خوانی کااہتما م کیا گیا اورمرحوم کے حق میں خصوصی دعائیہ مجالس کا سلسلہ دن بھر جاری رہا۔پارٹی صدر ڈاکٹر فاروق عبداللہ اور سابق وزیر اعلیٰ عمر عبداللہ نے کئی پارٹی لیڈران کے ہمراہ شیخ محمد عبداللہ کے مزارپر حاضری دی اور انکے علاوہ انکی اہلیہ مرحومہ بیگم اکبر جہاں کے مقبرے پر گلباری کرنے کے بعد اجتماعی فاتحہ خوانی میں حصہ لیا۔اجتماعی فاتحہ خوانی میں پارٹی کے جنرل سکریٹری علی محمد ساگر ، معاون جنرل سکریٹری ڈاکٹر شیخ مصطفےٰ کمال، صوبائی صدر ناصر اسلم وانی، سینئر لیڈران عبدالرحیم راتھر، چودھری محمد رمضان، محمد شفیع اوڑی، میاں الطاف احمد، شریف الدین شارق، مبارک گل، میر سیف اللہ، محمد اکبر لون، نذیر احمد خان گریزی، شمیمہ فردوس، سکینہ ایتو، علی محمد ڈار، عرفان احمد شاہ، شیخ اشفاق جبار، تنویر صادق، ایڈوکیٹ شوکت احمد میر، پیر آفاق احمد، محمد سعید آخون، قیصر جمشید لون، جاوید احمد ڈار، ڈاکٹر بشیر احمد ویری، ایڈوکیٹ عبدالمجید لارمی، شوکت حسین گنائی، ڈاکٹر محمد شفیع، شیخ محمد رفیع، میر غلام رسول ناز، سلمان علی ساگر اورعمران نبی ڈار کے علاوہ کئی سرکردہ لیڈران نے شرکت کی۔ پارٹی کی طرف سے کئی ضلع و تحصیل صدر مقامات اور شیر کشمیر بھون جموں میں بھی خصوصی تقریبات کا انعقاد کیاگیا جس کے دوران مرحوم لیڈرکو شاندار الفاظ میں خراج عقیدت پیش کیاگیا۔ لداخ اور کرگل میں بھی اس حوالے سے خصوصی دعائیہ مجلس کا اہتمام کیاگیا۔