شہریوں کی ہلاکتیں اب معمول : نیشنل کانفرنس

سرینگر //نیشنل کانفرنس نے رنگریٹ اور آرونی بجبہاڑہ میں 2نوجوانوں کی ہلاکتوں پر رنج و الم کا اظہار کرتے ہوئے دلخراش اور دلدوز واقعات کی شدید الفاظ میں مذمت کی ہے۔ پارٹی کے ترجمان اعلیٰ آغا سید روح اللہ نے عشٹینگو بانڈی پورہ کے نصیر احمد اور کھار پورہ بجبہاڑہ کے محمد اشرف کے جملہ لواحقین خصوصاً والدین کے ساتھ دلی تعزیت کا اظہار کیا۔ انہوں نے مطالبہ کیا کہ واقعات کی تحقیقات کرکے اصل حقائق کو عوام کے سامنے لایا جائے اور ملوثین کی نشاندہی کی جائے۔ ترجمان اعلیٰ نے کہا کہ گذشتہ 2سال سے عام شہریوں کی ہلاکت اب معمول بن کر رہ گیا ہے اور حکمران جماعت ٹس سے مس نہیں ہورہی ہے، پی ڈی پی وزیر اعلیٰ اور وزراء خاموش تماشائیوں کا رول نبھا رہے ہیں ۔دریں اثناء پارٹی کے ضلع اسلام آباد ڈاکٹر محمد شفیع ، ڈاکٹر بشیر احمد ویری اور شمالی زون کے سکریٹری میر غلام رسول ناز نے بھی واقعات کی شدید الفاظ میں مذمت کرتے ہوئے کہا ہے کہ پی ڈی پی حکومت نے عام کشمیریوں کیخلاف اعلان جنگ کر رکھا ہے اور کشمیریوں کا خون بہانا اب معمول بن کر رہ گیا ہے۔