عظمیٰ نیوز سروس
جموں//لیفٹیننٹ گورنر منوج سنہا نے کیلاکھ جیوتش اور ویدک سنستھان ٹرسٹ کے 11 ویں یومِ تاسیس کی تقریب سے خطاب کرتے ہوئے کہا کہ’ سنسکرت ہمارا انمول ثقافتی ورثہ ہے ، جسے اب پوری دُنیا میں تعریف کی نگاہ سے دیکھا جا رہا ہے ۔ یہ سائنس ، طب ، نباتیات ، ادب اور بہت سے دوسرے مضامین میں علم کا سب سے بڑا خزانہ ہے ‘۔ انہوں نے تمام اسٹیک ہولڈروں سے اجتماعی کوششوں پر زور دیا کہ وہ سنسکرت کے علمی نظام کو دنیا کی قدیم زندہ زبانوں میں سے ایک نوجوان نسل تک پہنچائے ۔ ایل جی نے کہا ’’ مختلف موضوعات پر سنسکرت میں بین الضابطہ نقطہ نظر اور وسیع کام علمی معیشت کی ترقی میں معاون ثابت ہو سکتے ہیں اور اقدار ، نظریات کو فروغ دے سکتے ہیں اور معاشرے کی بھلائی کیلئے اس کا استعمال کر سکتے ہیں ‘‘۔ یومِ تاسیس کی تقریب میںلیفٹیننٹ گورنر نے جموں کشمیر میں سنسکرت اور قدر پر مبنی تعلیم کے فروغ کیلئے یو ٹی انتظامیہ کے کلیدی اقدامات کا اشتراک کیا ۔انہوں نے کہا کہ جموں و کشمیر کی یونیورسٹیوں میں ہندی ، سنسکرت اور ہندوستانی فلسفے کیلئے خالی اسامیاں پُر کر دی گئی ہیں ۔ آج یو ٹی کی یونیورسٹیوں میں ہندوستانی فلسفہ پڑھایا جا رہا ہے ۔ انہوں نے کہا کہ یہ جموں کشمیر میں ثقافتی اور لسانی روایات کو فروغ دینے کے ہمارے عزم کا ثبوت ہے ۔ اس موقع پرلیفٹیننٹ گورنر نے بین الاقوامی کوہ پیما کرنل رنبیر سنگھ جموال اور معروف سرجن ڈاکٹر سنجے شرما کو ان کے متعلقہ شعبوں میں نمایاں خدمات انجام دینے پر مبارکباد دی ۔ چوڈامانی سنسکرت سنستھان بسوہلی کے طلباء نے ویدک منگلا چرن پیش کیا ۔ تقریب میں پروفیسر بی این ترپاٹھی وائس چانسلر سکاسٹ جموں ، سابق وزیرشام لال شرما ، صدر شری کیلاکھ جیوتش اینڈ ویدک سنستھان ٹرسٹ مہنت روہت شاستری بھی موجود تھے ۔ تقریب میں جگد گرو شنکر آچاریہ سوامی شری اسھوکشاجاننددیوتیرت جی مہاراج نے بھی شرکت کی ۔لیفٹیننٹ گورنر نے اس موقع پر شری کیلاکھ جیوتش اور ویدک سنستھان ٹرسٹ کے ٹرسٹیوں ، صدر اور تمام ممبران کو مبارکباد دی ۔ انہوں نے سنسکرت کے فروغ کیلئے انتھک کام کرنے اور ضرورتمندوں کی بے لوث خدمت کے خیالات کے لئے اس کے پختہ عزم کیلئے تنظیم کی ستایش کی ۔
