شانگس میں بجلی کی آنکھ مچولی

سرینگر//وادی کشمیر میں سردیاں شروع ہوتے ہی بجلی کی آنکھ مچولی کا سلسلہ شروع ہو گیا ہے۔ ضلع اننت ناگ کے شانگس علاقے میں غیر ضروری بجلی تخفیف کا سلسلہ گزشتہ کئی روز سے جاری ہے جس کی وجہ سے لوگوں کو آئے روز مشکلات کا سامنا کرنا پڑ رہا ہے۔بجلی کی بار بار کٹوتی سے لوگ محکمہ بجلی سے نالاں ہیں۔ مقامی لوگوں کا کہنا ہے کہ متعلقہ محکمہ کی ناقص کارکردگی سے انہیں کافی دقتوں کا سامنا کرنا پڑتا ہے۔ شانگس کے باشندوں نے بتایا کہ سردیوں کے ایام شروع ہوتے ہی وادی میں بجلی کی غیر ضروری تخفیف معمول بن چکا ہے، اور متعلقہ محکمہ بجلی کی معقول سپلائی کو یقینی بنانے میں غیر سنجیدگی کا مظاہرہ کر رہا ہے۔‘‘ مقامی باشندوں نے بتایا کہ ’’بجلی کی آنکھ مچولی سے نہ صرف کاروبار سے جڑے افراد کو نقصان ہو رہا ہے بلکہ عوام الناس سمیت طلبہ کی پڑھائی بھی متاثر ہو رہی ہے۔‘‘مقامی باشندوں نے دعویٰ کیا کہ وہ وقت پر بجلی بلوں کی ادائیگی کرتے ہیں تاہم اس کے باوجود انہیں شیڈول کے مطابق بجلی فراہم نہیں کی جارہی ہے۔انہوں نے متعلقہ محکمہ سے بجلی نظام کو درست کرنے اور بجلی کی معقول سپلائی کو یقینی بنانے کا پر زور مطالبہ کیا تاکہ آنے والے شدید سردیوں کے ایام میں انہیں مزید دقتوں کا سامنا نہ کرنا پڑے۔