سی آر پی ایف گاڑی ماروتی پر چڑھ گئی

سرینگر //برین نشاط میں جمعہ کی شام اُس وقت تشدد بھڑک اٹھا اور مشتعل ہجوم نے فورسز کی ایک گاڑی نذرآتش کی جب الیکشن ڈیوٹی پر مامور سی آر پی ایف اہلکار وں کی گاڑی کی بریک فیل ہوئی اور وہ ایک ماروتی پر چڑھ گئی جس کے نتیجے میں ماروتی میں سوار ایک شخص کی موقعہ پر ہی موت واقع ہوئی جب کہ ایک اور شدید طور پر زخمی ہوا ۔اس المناک واقعہ کے بعد مظاہرین اور فورسز کے درمیان شدید جھڑپیں بھی ہوئیں اور علاقے میں رات دیر گئے تک کشیدہ صورتحال رہی ۔پولیس کے مطابق برین نشاط میں سید رحمان آستان عالیہ کے قریب الیکشن ڈیوٹی پر مامور سی آر پی ایف اہلکار ایک سول گاڑی میں جا رہے تھے تو ڈرائیور کے قابو سے گاڑی باہر ہوئی اور بریک فیل ہونے کی وجہ سے گاڑی آگے کی بجائے  پیچھے کی طرف چلنی شروع ہوئی جس کے باعث گاڑی کے پیچھے ایک ماروتی کار اس کی زد میں آئی اور تباہ ہوئی ۔گاڑی ماروتی پر چڑھ گئی جس کے نتیجے میں اس میں سوار محمد اشرف عرف پولاڈ ساکن ڈن برین موقعہ پر ہی لقمہ اجل بن گیا جبکہ ماروتی میں سوار اُس کا ساتھی ارشد احمد آہنگر شدید طور پر زخمی ہوا ۔اس موقعہ پر مقامی لوگ مشتعل ہوئے اورانہوں نے فورسز گاڑی کو نذرآتش کیا جس کے بعد یہاں تشدد بھڑک اٹھا ۔پولیس نے فوری طور پر مظاہرین کو قابو میں کرنے کی کوشش کی تاہم مظاہرین نے پتھرائو شروع کر دیا جس کے بعد طرفین کے مابین شدید جھڑپیں ہوئیں ۔رات دیر گئے تک وہاں صورتحال انتہائی کشیدہ تھی اور لوگ مظاہرہ کر رہے تھے ۔