سنٹرل جیل واقعہ تشویشناک :گیلانی

سرینگر//حریت (گ)چیئرمین سید علی گیلانی نے سرینگر سینٹرل جیل میں قیدیوں کو زدوکوب کرنے اور انہیں لہولہان کرنے کی پولیس کارروائی کی مذمت کرتے ہوئے کہا کہ کشمیری نہ اپنے گھروں میں محفوظ ہیں اور نہ ہی گھروں سے باہر۔ اپنے ایک بیان میں انہوں نے کہا کہ اب تو جیل خانوں کو بھی کشمیریوں کے لہو سے رنگین بنایا جارہا ہے۔ گیلانی نے کہا کہ کبھی ایک بہانے اور کبھی دوسرے بہانے قیدیوں کو حراساں کرنے کا عمل اگرچہ عرصۂ دارز سے جاری ہے لیکن سینٹرل جیل سرینگر کا حالیہ واقعہ بہت ہی تشویشناک اور افسوسناک ہے۔ حریت رہنما نے کہا کہ قیدی پوری طرح پولیس اور جیل انتظامیہ کے رحم وکرم پر ہوتے ہیں ،اُن کے ساتھ اس طرح کا ناروا سلوک کسی بھی جمہوری یا انسانی معاشرے میں برداشت نہیں کیا جاسکتا ہے۔ انہوں نے انسانی حقوق کے علمبرداروں اور قیدیوں کے حقوق کے حوالے سے اداروں سے اپیل کی کہ وہ ایسے انسان کُش واقعات کا نوٹس لیں اور حکام کو اس کے لیے متنبہ کریں۔