سروڑی کاسرتھل دورہ،عوامی مشکلات کی جانکاری لی

کشتواڑ//رکن اسمبلی اندروال غلام محمدسروڑی نے آج یہاں سرتھل کادورہ کرتے ہوئے عوامی مسائل بارے جانکاری لی اوردیہی علاقہ جات میں تعمیروترقی کی سرگرمیوں کابھی جائزہ لیا۔اس دوران انہوں نے مہارواری، دادا، ٹھکرمحلہ، کاہل، کرول، کریاس اور انگاراعلاقوں کادورہ کیا اور درجنوں مقامی وفودسے ملاقات کی۔ملاقات کے دوران وفودنے درپیش مسائل بارے رکن اسمبلی کوآگاہ کیا۔کرول میں سروڑی نے 100بستروالے گرلزہوسٹل کی تعمیرکے کام کاجائزہ لیا۔یہاں اُنہوںنے ہوسٹل لیبارٹری، ہائیراسکینڈری اسکول میں ٹائلوں کے بچھانے، اور کرول۔داداسڑک پرتال کول بچھانے کے کاموں کابھی معائنہ کیا۔سروڑی نے تعمیروترقی کے تھم گئے سلسلے پرتشویش کااِظہارکرتے ہوئے کہاکہ علاقے میں سابقہ حکومت نے جوترقیاتی پروجیکٹ ہاتھ میں لئے تھے ، موجودہ دورِ حکومت میں ان پرکام ٹھپ کردیاگیاہے جس سے عوام کو پریشانیوں کاسامناہے۔اُنہوں نے پہنے کے پانی کی شدیدقلت پراپنی تشویش کااِظہارکرتے ہوئے متعلقہ محکمے کوصورتحال بہتربنانے اورمعقول پانی سپلائی یقینی بنانے کی تلقین کی۔سروڑی نے کہاکہ موجودہ حکومت کی عوام مخالف پالیسیوں نے پوری عوام کو ان کیخلاف کردیاہے،اورلوگوں میں موجودہ حکمرانوں کولیکرکافی غصے کی لہرپائی جاری ہے۔سروڑی نے وفودسے ملاقات میں درپیش مسائل سنے اوریقین دلایاکہ ان کاجلدازجلدازالہ کیاجائیگا۔اس موقع پرمتعددپی ڈی پی اوربھاجپاکے سرگرم کارکنان نے کانگریس کادامن تھامتے ہوئے پارٹی کومضبوط تربنانے کااعادہ کیااور غلام محمد سروڑی کی قیادت پراطمینان کااِظہارکرتے ہوئے کہاکہ اندروال اسمبلی حلقہ کی نمائندگی سروڑی کے ہاتھ میں ہے اوراسمبلی حلقہ ترقی کی راہوں پرگامزن ہے تاہم موجودہ حکمران جماعتیں سیاسی رنجشوں کاشکارہیں اور سابقہ حکومتوں کے جاری کردہ پروجیکٹوں کوآگے بڑھانے میں اس کی نیت صاف نہیں ہے۔سروڑی نے نئے کارکنان کی کانگریس میں شمولیت پراطمینان کااِظہارکرتے ہوئے ان سے متحرک ہونے کی تلقین کی۔سروڑی نے کارکنان سے کہاکہ وہ عوامی خدمت کے جذبے کیساتھ ہرجگہ پہنچیں اور نہ صرف عوامی مسائل سن کر ازالہ کرائیںبلکہ موجودہ حکمران جماعتوں کی ناکامی ،نااہلی اور غفلت کوبھی عام لوگوں میں بے نقاب کریں۔