سرنکوٹ میں حادثہ، 4افراد زخمی ،ٹریفک حکام پر غفلت کا الزام

بختیار کاظمی

سرنکوٹ// سرنکوٹ میں پیکس آٹو شوروم کے قریب ایک سڑک حادثہ پیش آیا جس کے نتیجے میں چار افراد زخمی ہو گئے۔ اس واقعہ میں ایک کار شامل تھی جو زیر نمبر ۔1362 تھی اور سرنکوٹ سے راجوری کی طرف جارہی تھی۔عینی شاہدین نے بتایا کہ ڈرائیور نے گاڑی پر سے کنٹرول کھو دیا جس کی وجہ سے وہ سڑک سے الٹ گئی اور حادثے کا شکار ہو گئی۔ زخمیوں کو فوری طور پر سب ڈسٹرکٹ ہسپتال سرنکوٹ میں طبی علاج کے لیے منتقل کیا گیا۔ اگرچہ حادثے کی اصل وجہ ابھی بھی زیر ِ تفتیش ہے، ابتدائی رپورٹس بتاتےہیں کہ ڈرائیور کی غلطی اور سڑک کے ممکنہ خطرناک حالات کی وجہ سے حادثہ پیش آیاتاہم معاملہ درج کر لیا گیا۔مذکورہ حادثہ رونما ہونے کے بعد لوگوں نے سرنکوٹ میں مقامی ٹریفک پولیس پر تنقید کی ہے۔ مقامی لوگوں نے اس پر مایوسی کا اظہار کیا جسے وہ ایسے واقعات کی روک تھام کے لیے فعال اقدامات کے فقدان سے تعبیر کرتے ہیں۔دیکھنے والوں کے مطابق ٹریفک پولیس کا ردعمل تصویروں کے ساتھ جائے وقوعہ کو دستاویزی شکل دینے تک محدود ہے جس میں ٹریفک کی حفاظت کے بنیادی مسائل کو حل کرنے کی بہت کم کوشش کی گئی۔ رہائشیوں کا کہنا ہے کہ یہ واقعہ ٹریفک کے انتظام اور نفاذ میں وسیع تر ناکامی کی نشاندہی کرتا ہے، اور مستقبل میں حادثات کو روکنے کے لیے مزید سخت اقدامات اور جوابدہی کا مطالبہ کیا ہے۔