نیوز ڈیسک
نئی دہلی// حکام نے بتایا کہ سی بی آئی نے روشنی اراضی گھوٹالے کے سلسلے میں اتوار کو سرینگر میں ایک ممتازتاجر کے گھر کی تلاشی لی۔سی بی آئی نے 3آئی اے ایس سمیت 6افسران کیخلاف بھی کیس درج کیا ہے۔سی بی آئی نے بتایا کہ 15 جون کو، سی بی آئی نے سرکردہ تاجر چودھری شوکت ریٹائرڈ آئی اے ایس افسران محبوب اقبال(اس وقت کے کشمیر ڈویژنل کمشنر) اور شیخ اعجاز اقبال (اس وقت سرینگر کے ڈپٹی کمشنر) کے خلاف ایک تازہ مقدمہ درج کیا تھا۔سی بی آئی نے ایف آئی آر میں کچھ دیگر ریٹائرڈ افسران کا نام بھی لیا ہے ، جن میںکشمیر ایڈمنسٹریٹو سروس سے محمد افضل بٹ( اس وقت کے کشمیر کے ایڈیشنل کمشنر )مشتاق احمد ملک ( اسسٹنٹ کمشنرریونیو، سرینگر)؛ محمد اکرم خان( اس وقت کے تحصیلدار نزول) اور شیخ منیر اختر( سرینگر کے اس وقت کے تحصیلدار) چوہدری، ہیٹرک فوڈ انڈسٹریز کے مالک، جموں و کشمیر کے تاجروں کے اس وفد کا حصہ تھے، جس نے اس سال اپریل میں وزیر اعظم نریندر مودی سے ملاقات کی تھی۔سی بی آئی نے الزام لگایا ہے کہ چودھری کو روشنی ایکٹ کے تحت ایک پلاٹ کا غیر مجاز قابض قرار دیا گیا تھا اور ایکٹ کی دفعات کی خلاف ورزی کرتے ہوئے انہیں 14.40 لاکھ روپے میں آٹھ مرلہ زمین کی ملکیت دی گئی تھی۔یہ الزام ہے کہ اسٹیٹ نرسنگ گڑھ، تحصیل سرینگر میں چار کنال اراضی جموں و کشمیر حکومت نے 1977 میں محبوب بیگ اور ممتاز افضل بیگ کو لیز پر دی تھی اور لیز کا معاہدہ 2020 میں ختم ہو رہا تھا۔ 2001 میں پاور آف اٹارنی کی بنیاد پر کل چار کنال اراضی میں سے آٹھ مرلہ چوہدری کو دے دی گئی تھی۔ایف آئی آر کے مطابق، “چودھری، پاور آف اٹارنی ہولڈر نے بعد میں 24 فروری 2004 کی درخواست کے ذریعے روشنی ایکٹ کے تحت ملکیتی حقوق کی فراہمی کے لیے درخواست دی۔”سرینگر کے اس وقت کے ڈپٹی کمشنر نے 8 اکتوبر 2004 کو ڈویژنل کمشنر کو لکھے ایک خط میں ذکر کیا کہ اس کیس کو مالکانہ حقوق کے لیے نہیں سمجھا جا سکتا کیونکہ زیر بحث زمین ایک اہم سڑک کے مرکز سے 50 فٹ کے فاصلے پرہے ۔پرائس فکسیشن کمیٹی نے 30 مارچ 2005 کو اپنے اجلاس میں درخواست گزار کے کیس کی اس حد تک سفارش کی کہ سڑک کو چوڑا کرنے کے لیے زمین کی ضرورت نہیں تھی اور وہ اربن ڈویلپمنٹ ایکٹ کی دفعات سے متاثر نہیں تھی۔ایک اور پرائس فکسیشن کمیٹی نے 11 جولائی 2007 کو اس وقت کے کشمیر کے ڈویژنل کمشنر محبوب اقبال اور دیگر ممبران کی صدارت میں ہونے والی اپنی میٹنگ میں اس مسئلے پر بحث کی اور زمین کی ملکیت چوہدری کو دینے کا فیصلہ کیا۔60 لاکھ روپے فی کنال کی شرح کو اپنایا گیا اور درخواست گزار کو جموں و کشمیر اسٹیٹ لینڈز رول 2007 کے تحت غیر مجاز قابض سمجھا گیا۔ایف آئی آر میں الزام لگایا گیا کہ روشنی ایکٹ کے تحت چودھری کو غیر مجاز قابض سمجھا گیا حالانکہ اصل لیز محبوب بیگ اور ممتاز افضل بیگ کے نام تھی۔
