رمضان المبارک کی آمد | جامع مسجد سرینگر میں انتظامات کو حتمی شکل

سرینگر//مقدس ماہ رمضان المبارک کی آمد پر مرکزی اور تاریخی جامع مسجد سرینگر میں نمازیوں اور زائرین کی سہولیات کی خاطر حسب  روگرام انجمن اوقاف جامع مسجد کے عہدیداروں،اور اراکین کاایک اہم اجلاس اوقاف کے صدر دفتر پر انجمن اوقاف جامع مسجد سرینگر کے سربراہ اور متحدہ مجلس علماء جموںوکشمیرکے امیر میرواعظ ڈاکٹر مولوی محمد عمر فاروق کی صدارت میں منعقد ہوا۔اجلاس میں حسب سابق مقدس ماہ صیام کے دوران نمازیوں اور زائرین کو ہر طرح کی سہولیات فراہم کرنے کے حوالے سے انتظامات کو حتمی شکل دی گئی تاکہ مرکزی جامع مسجد سرینگر میں دور دراز علاقوں سے آنے والے نمازیوں اور زائرین کو ہرممکن سہولت پہنچائی جاسکے ۔ میرواعظ نے انجمن کے عہدیداروں اور عملے کو ہدایت دی کہ وہ خصوصیت سے ماہ مقدس کے دوران بجلی، پانی ، صفائی ، فرش و فروش، اور دیگر داخلی انتظامات کے تئیں احسن طریقے سے اپنی ذمہ داریاں پوری کریں تاکہ کسی کو بھی تکلیف یا شکایت کا موقعہ نہ ملے۔اجلاس میں فیصلہ کیا گیا کہ کشمیر کے ڈویژنل انتظامیہ سے کہا جائے کہ وہ اس پورے متبرک مہینے کے دوران جامع مسجد میں پاور سپلائی ، پانی کی دستیابی اور ٹریفک نظام میں بہتری کو یقینی بنائیں اور گرمی کے ان ایام میں ارد گرد صفائی اور ستھرائی کاخاص خیال رکھیں۔