رام بن میں بیوی کو قتل کرنے کے الزام میں شوہر گرفتار

رام بن //جموں و کشمیر کے رام بن ضلع میں ایک شخص کو اپنی 23 سالہ بیوی کو قتل کرنے اور قتل کو خودکشی کے طور پر پیش کرکے تفتیش کاروں کو گمراہ کرنے کی کوشش کرنے کے الزام میںشوہرکو گرفتار کیا گیا۔ پولیس نے بتایا کہ بٹوت کے پسیال دھرالٹا گاؤں کی رہنے والی نشو دیوی 23 جنوری کو اپنے گھر میں لٹکی ہوئی پائی گئی تھی اور موت کی اصل وجہ جاننے کے لیے تفتیشی کارروائی شروع کی گئی تھی۔انہوں نے بتایا کہ متوفی کا پوسٹ مارٹم ضلع اسپتال رام بن میں کیا گیا اور لاش آخری رسومات کے لیے قانونی ورثاء کے حوالے کردی گئی۔ترجمان نے کہا کہ تفتیش کے دوران مقتول کے والدین نے الزام لگایا کہ ان کی بیٹی کو اس کے شوہر اور اس کے اہل خانہ نے قتل کیا کیونکہ وہ اسے تشدد اور ہراساں کر رہے تھے۔متوفی کے شوہر پون کمار کو حراست میں لے کر پوچھ گچھ کی گئی۔ انہوں نے کہا کہ اس نے اپنی بیوی کا گلا دبا کر قتل کرنے کا اعتراف کیا اور بعد میں پولیس کو گمراہ کرنے کے لیے اس کی لاش کو خودکشی کا معاملہ قرار دینے کے لیے لٹکا دیا۔حکام نے بتایا کہ ملزم کو گرفتار کر کے قتل کا مقدمہ درج کیا گیا تھا اور سزا سے بچنے کے لیے ایک سرکاری ملازم کو رشوت دینے کی کوشش کی گئی تھی۔