جموں وکشمیر کو تقسیم در تقسیم کرنے والوں سے ہوشیار رہیں | این سی یوٹی کی وحدت اور آپسی بھائی چارے کی ضامن : ڈاکٹر فاروق عبداللہ

جموں//صدرِ جموں وکشمیر نیشنل کانفرنس ڈاکٹر فاروق عبداللہ نے جموں پہنچتے ہی صوبہ جموں کی تنظیمی سرگرمیاں اور پارٹی پروگراموں کا جائزہ لیا۔ ڈاکٹر فاروق عبداللہ نے پارٹی لیڈران کو ہدایت کی کہ وہ عوام کے ساتھ قریبی رابطہ رکھ کر اُن کے دکھ سکھ میں پیش پیش رہیں اور اُن کے مسائل و مشکلات کا ازالہ کرنے میں بھی اپنا دست تعاون جاری رکھیں۔ ڈاکٹر فاروق عبداللہ نے پارٹی سے وابستہ افراد پر زور دیا کہ وہ لوگوں تک نیشنل کانفرنس کا ایجنڈا پہنچائیں اور نیا کشمیر پروگرام کو گھر گھر پہنچائیں۔ انہوں نے پارٹی لیڈران پر زور دیا کہ وہ ایسے دشمن عناصر کی مذموم سازشوں سے بھی لوگوں کو آگاہ کریں جو اس تاریخی ریاست جموں وکشمیر کو تقسیم در تقسیم کرنے پر تُلے ہوئے ہیں۔ انہوں نے کہا کہ نیشنل کانفرنس ہی جموں وکشمیر کی وحدت، انفرادیت، شناخت ، تعمیر و ترقی اور آپسی بھائی چارے کی ضامن عوامی جماعت ہے۔ اس جماعت نے ہر حال میں لوگوں کے جذبات، احساسات اور اُمنگوں کی ترجمانی کی ہے اور آگے بھی کرتی رہے گی۔ دریں اثناء ضلع رام کی معروف سیاسی و سماجی اور بی جے پی تعلق رکھنے والے گجا سنگھ کٹوچ نے جموں میں نیشنل کانفرنس میں شمولیت اختیار کی۔ اس موقعے پر پارٹی کے صوبائی صدر جموں ایڈوکیٹ رتن لعل گپتا اور ضلع صدر رام بن سجاد شاہین نے موصوف کا پارٹی میں خیر مقدم کیا اور انہیں پھولوں کے ہار پہنائے۔ گجا سنگھ نے اس موقعے پر خوشی کا اظہار کرتے ہوئے کہا کہ میں نے نیشنل کانفرنس میں اس لئے شمولیت اختیار کی کیونکہ یہ جماعت واقعی ایک سیکولر جماعت ہے، جس نے ہر ایک خطے ، ہر ایک طبقے اور ہر ایک مذہب سے تعلق رکھنے والے لوگوں کیساتھ مساوی سلوک روا رکھا ہے۔