جموں وکشمیر میں بدعنوانی پر روک لگانے کا کام جاری

جموں// وزیر اعظم دفتر میں وزیر مملکت ڈاکٹر جتیندر سنگھ نے کہا کہ جموں وکشمیر میں 5 اگست 2019 کے بعد ترقیاتی کاموں نے رفتار پکڑی ہے اور بدعنوانی پر روک لگانے کا کام جاری ہے۔ انہوں نے کہا کہ اس یونین ٹریٹری میں آنے والے ایام تعمیر و ترقی کے ہوں گے۔ ڈاکٹر جتیندر سنگھ نے ہفتہ کو ضلع کٹھوعہ میں ایک تقریب کے حاشیہ پر نامہ نگاروں کو بتایا،’’گزشتہ برس 5 اگست اور 31 اکتوبر کے بعد مرکزی اسکیمیں جموں وکشمیر کے کونے کونے تک پہنچ رہی ہیں۔ ترقیاتی کاموں نے رفتار پکڑی ہے۔ کرپشن پر بھی روک لگانے کا کام شروع ہوچکا ہے‘‘۔ ان کا مزید کہنا تھا،’’'مجھے امید ہے کہ جموں وکشمیر آنے والے وقت میں بھارت کی مین اسٹریم کا حصہ بن کر ترقی کی نئی منزلوں کو چھو لے گا‘‘۔اس سے قبل وزیر اعظم کے دفتر میں وزیر مملکت ڈاکٹر جتندر سنگھ نے کٹھوعہ کے میڈیکل کالج میں منعقدہ جن اوشدھی دوس کی تقریب میں شرکت کی۔اِس موقعہ پر وزیر اعظم نریندر مودی کی تقریر ٹیلی کاسٹ کرنے کے لئے مناسب اقدامات کئے گئے تھے۔اِس دِن کی اہمیت پر روشنی ڈالتے ہوئے ڈاکٹر جتندر سنگھ نے کہا کہ آج کا دِن اس سکیم کو مزید فروغ دینے کے لئے منایا جاتا ہے ۔انہوں نے کہا کہ مرکزی سرکار کی جانب سے شروع کی گئی اس سکیم کے بارے میں جانکار ی عام کرنے کے مقصد سے بھی آج تقریبا ت منعقد کی جارہی ہیں۔سکیم کے فوائد کے بارے میں حکومت عام لوگوں کو کفایتی نرخوں پر ادویات فراہم کر رہی ہے۔اُنہوں نے کہا کہ حکومت 2020کے آخر تک ہر بلاک میں جن اوشدھی کیندر قائم کرنے پر غور کر رہی ہے۔مرکزی حکومت کی حصولیابیوں کا تذکرہ کرتے ہوئے مرکزی وزیر مملکت نے کہا کہ کٹھوعہ ضلع میں تعلیم اور صحت شعبے کو مرکزی سرکار کی کوششوں سے کافی فروغ ملا ہے ۔اس سے قبل کٹھوعہ ضلع کے پردھان منتری جن اوشدھی یوجنا کے مستحقین نے اپنے تجربات بانٹیں۔بعد میں مرکزی وزیر مملکت نے بیٹی بچائو بیٹی پڑھائو سکیم کے بارے میں جانکاری عام کرنے کے لئے ریلی کو جھنڈی دکھا کر روانہ کیا۔