عظمیٰ نیوزسروس
جموں//جموں صوبہ بھر میں یوم آزادی سے قبل ترنگا ریلیوں کا انعقاد کیاگیا جن میں عوام کی بھاری شرکت دیکھی گئی۔اس دوران ایک پیڑ شہیدوںکے نام مہم کے تحت شجرکاری مہم کا انعقاد بھی عمل میں لایاگیا جبکہ سوچھتا پکھواڑہ مہم کے تحت صفائی مہم بھی عمل میںلائی گئی۔
کشتواڑ میںترنگا ریلی
ضلع ہیڈ کوارٹر کشتواڑ میں ترنگا ریلی اور کنورٹ میں 20,000 شرکاء کی غیر معمولی شرکت دیکھی گئی جس کی قیادت ڈپٹی کمشنر کشتواڑ دیوانش یادواور ایس ایس پی کشتواڑ عبدالقیوم نے کی ۔ریلی میں تمام شعبہ ہائے زندگی سے تعلق رکھنے والے افراد نے شرکت کی، جو ڈاک بنگلہ چوک سے شروع ہوئی اور بن آستان، ہڈیال چوک، منی بس سٹینڈ، مین بس سٹینڈ سے ہوتی ہوئی گرودوارہ چوک سے ہوتی ہوئی مرکزی بازار سے ہوتی ہوئی چوگان گراؤنڈ میں اختتام پذیر ہوئی۔تقریب کا آغاز ڈاک بنگلو میں پرچم کشائی کی رسمی تقریب سے ہوا، جہاں پرجوش شرکاء کے ہجوم کے درمیان ڈاکٹر دیوانش یادو نے قومی پرچم لہرایا۔ اس ریلی میں ڈسٹرکٹ یوتھ سروسز اینڈ سپورٹس ڈیپارٹمنٹ کی قیادت میں موٹر بائیک ریلی بھی شامل تھی۔ محکمہ پولیس، این سی سی رضاکاروں، اور آئی سی ڈی ایس کشتواڑ اور سی آر پی ایف کے خصوصی دستے نے ریلی میں مزید اضافہ کیا۔ ریلی میں زون ناگسینی اور زون کشتواڑ کے تمام 85اسکولوں کے تقریباً 17,000طلباء نے حصہ لیا۔ ان کے ساتھ 500 اساتذہ بھی تھے، جنہوں نے ایونٹ کی شاندار کامیابی میں اہم کردار ادا کیا۔یہ ریلی چوگان گراؤنڈ پر اختتام پذیر ہوئی، جہاں یہ جشن آزادی کے ایک حصے کے طور پر کلچرل اکادمی کے تعاون سے ضلعی انتظامیہ کے زیر اہتمام ترنگا کنسرٹ میں ضم ہو گئی۔اس کنسرٹ میں گلوکاروں توقیر علی، برہان شیخ، اور مہندر سونی کی شاندار پرفارمنس پیش کی گئی، جنہوں نے حب الوطنی پر مبنی گیتوں سے سامعین کے حب الوطنی کے جذبے کو جلا بخشی۔
رام بن ترنگا یاترا
ضلع انتظامیہ، را م بن نےہندوستان کی آزادی کے لیے اپنی جانوں کا نذرانہ پیش کرنے والے شہیدوں اور آزادی پسندوں کو خراج عقیدت پیش کرنے کے لیے ’ہر گھر ترنگا‘ مہم کے ایک حصے کے طور پر ایک بڑی ’’بائیک اور کار ترنگا یاترا‘‘ کا اہتمام کیا۔ڈپٹی کمشنر رام بن بصیر الحق چوہدری کی قیادت میں تقریب کا آغاز رام بن وائڈکٹ سے چندر کوٹ تک ہوا۔ ریلی رام بن ٹاؤن، چندر کوٹ بازار اور میترا سمیت اہم علاقوں سے گزری۔ اس میں ڈی ڈی سی ممبر رینوکا کٹوچ، ممتاز شہریوں، نوجوانوں، سماجی کارکنوں، بیوپار منڈل کے اراکین اور دیگر معززین کی پرجوش شرکت دیکھی گئی۔ریلی میں 300 سے زیادہ بائک اور کاریں شامل تھیں۔ڈپٹی کمشنر نے لوگوں پر زور دیا کہ وہ “ہر گھر ترنگا، سوچھتا سنگرام، ایک پیڑ ماں کے نام، اور ایک پیڑ شہیدوں کے نام” کے عنوان کو اپناتے ہوئے ماؤں اور شہداء کے لیے شجر کاری مہم میں حصہ لیں۔
بانہال ترنگا اور بائیک ریلی
نامہ نگار محمد تسکین کے مطابق سینٹرل ریزرو پولیس فورس 166 بٹالین کی طرف سے یوم آزادی کی تقریبات کے نسبت سے بانہال میں ایک موٹر سائیکل ترنگا ریلی کا انعقاد کیا گیا۔اس ترنگا ریلی میں نیو کانونٹ ہائر سیکنڈری سکول بانہال کے طلبا ، سول انتظامیہ کے افسروں اور پولیس افسروں نے شرکت کی ۔ یہ مہم بانہال میں تعینات سینٹرل ریزرو پولیس فورس کی طرف سے منعقد کی گئی تھی ۔اس ترنگا بائیکر ریلی کا افتتاح سی آر پی ایف کے کمانڈنگ آفیسر منیش بامولہ نے کیا جبکہ اس موقع پر ایس ڈی پی او بانہال منجیت سنگھ اور پولیس اور انتظامیہ کے افسران بھی موجود تھے۔ اس بائیک ریلی میں تیس بائیکرز اور سینکڑوں طالب علموں نے شرکت کی ۔یہ ریلی نیو کانونٹ سے شروع ہوئی نیشنل ہائے وے پر نویگہ ٹنل تک جانے کے بعد یہ نیو کانونٹ سکول کے پاس ہی اختتام پذیر ہوئی۔ اس ترنگا ریلی میں تقریباً 300 طلباء سی آر پی ایف اور پولیس اہلکاروں کے ساتھ پروگرام میں حصہ لیا۔ طلباء نے ڈرل اور ثقافتی پروگرام کا مظاہرہ کیا۔ اس موقع پر شرکاء میں مٹھائیاں اور بچوں میں انعامات کم تقسیم کئے گئے ۔ریلی میں شامل شرکاء نے ہاتھوں میں ترنگا اٹھا رکھا تھا اور وہ آزاد ہندوستان زندہ بادہ اور جمہوریت زندہ باد کے نعرے بلند کر رہے تھے ۔
