جموں سے ایودھیا کیلئے آخری آستھا ٹرین کوروانہ کیا گیا

عظمیٰ نیوز سروس

جموں //مذہبی جوش اور عقیدت کے ساتھ آخری آستھا ٹرین، جس میں شری رام کے 1375 عقیدت مند شامل تھے، کو ادھم پور ریلوے اسٹیشن سے ایودھیا کی طرف ہری جھنڈی دکھا کر روانہ کیا گیا۔جموں پہنچنے پر، استھا ٹرین کا پرتپاک استقبال کیا گیا اور سینئر بی جے پی رہنماؤں بشمول جموں و کشمیر بی جے پی کے نائب صدر یودھویر سیٹھی (رام درشن ایودھیا کمیٹی کے کنوینر)، اسیم گپتا (کو کنوینر) اور چندر موہن گپتا، سابق ایم ایل سی نے پرتپاک استقبال کیا۔یودھویر سیٹھی اور اسیم گپتا نے آستھا ٹرین میں سفر کرنے والے عقیدت مندوں کے انتظامات کا جائزہ لیا، اس بات کو یقینی بناتے ہوئے کہ عقیدت مندوں کے بغیر کسی رکاوٹ کے سفر کے لیے سب کچھ موجود ہے۔ ان کا کہنا تھا کہ آستھا ٹرین نے نریندر مودی کی ثابت قدم قیادت اور ان کی حکومت کے لاکھوں لوگوں کے مستقل ایمان کی گواہی دی ہے۔یودھویر سیٹھی نے ٹرین کو ہری جھنڈی دکھاتے ہوئے کہا کہ آستھا ٹرین میں سوار ہونے والے سینکڑوں شری رام بھکتوں کے پرجوش چہروں کو ایک ساتھ دیکھنا دل خوش کرنے والا منظر تھا ۔انہوں نے کہا کہ یہ کسی یاترا کا دوسرا سفر نہیں ہے، بلکہ آستھا کا ایک گہرا احساس ہے جو 500 سال کے انتظار کے بعد نصیب ہوا ہے۔ انہوں نے کہا کہ ٹرین میں سوار لوگ شری رام کی بھکتی میں مگن ہو کر وزیر اعظم نریندر مودی حکومت کی تعریف میں الفاظ کی کمی محسوس کر رہے تھے جس کی وجہ سے یہ دن ممکن ہوا ہے۔