عظمیٰ نیوز سروس
سرینگر//سردیوں کے آغاز کے ساتھ ہی، جموں و کشمیر کے اعلی تعلیم کے محکمے نے جمعرات کو حکم دیا ہے کہ وہ کشمیر خطے کے تمام سرکاری ڈگری کالجوں میں یکم دسمبر سے آن لائن کلاسز کا انعقاد کرے گا۔ حکومت کے خصوصی سکریٹری ڈاکٹر روی شنکر شرما نے ایک بیان میں کہا، “موسم سرما کے ابتدائی آغاز کی وجہ سے، کشمیر ڈویژن کے سرکاری ڈگری کالجوں میں داخلہ لینے والے طلبا کو کالج جانے اور اس طرح، کلاسوں میں شرکت کرنے میں بڑے چیلنج کا سامنا ہے۔ “اس میں کہا گیا ہے کہ “حرارت کے ناکافی انتظامات کے ساتھ عام کلاس کے کام میں رکاوٹ کی وجہ سے صورتحال مزید پیچیدہ ہو گئی ہے۔”
اعلامیہ میں مزید کہا گیا ہے کہ میرٹ اور پسند کی بنیاد پر داخلوں کے نفاذ سے طلبا کو دور دراز سے سفر کرنا پڑتا ہے یا ہوسٹل یا پھر پرائیویٹ رہائش گاہوں میں رہنا پڑتا ہے جس کی وجہ سے سخت سردی شروع ہونے کی وجہ سے انہیں شدید مشکلات کا سامنا کرنا پڑتا ہے۔ شدید سردی کے حالات میں بلا روک ٹوک تعلیمی فراہمی کو یقینی بنانے کے لیے، کشمیر ڈویژن کے تمام گورنمنٹ ڈگری کالجوں کے پرنسپلوں پر زور دیا جاتا ہے کہ کلاسز کا انعقادیکم دسمبرسے 31دسمبر تک یا موسم سرما کی تعطیلات کا اعلان ہونے تک، جو بھی پہلے ہو، آن لائن موڈ کے ذریعے کیا جائے۔مزید کشمیر ڈویژن کے ڈگری کالجوںکے پرنسپلز کو ہدایت کی گئی ہے کہ وہ اس بات کو یقینی بنائیں کہ اساتذہ اپنے متعلقہ کالجوں میں باقاعدگی سے حاضر ہوں گے اور تعلیمی کیلنڈر کے مطابق نصاب کو مکمل کرنے کے لیے کالجوں سے آن لائن کلاسز لیں گے۔اس نے یہ بھی کہا کہ تمام داخلی امتحانات اور سمسٹر کے آخر کے امتحانات یونیورسٹیوں یا اداروں کے مطلع شدہ شیڈول کے مطابق منعقد کیے جائیں گے۔ادھرNIT میں تعطیلات کا اعلان کردیا گیا ہے اورطلبا کو ہوسٹل خالی کرنے کی ہدایت دی گئی ہے۔انسٹی ٹیوٹ کی طرف سے جاری سرکیولر میں کہا گیا کہ طلبا کے لئے 30 نومبر 2023 سے سرمائی تعطیلات کے مطابق ہوسٹلوں میں قیام پذیر تمام طلبا و طالبات کو ہدایت دی جاتی ہے کہ وہ فوری طور پر ہوسٹلوں کو خالی کریں۔ این آئی ٹی اور اسلامیہ کالج میں جمعرات کو تدریسی سرگرمیاں معطل رہیں۔
