سمت بھارگو
راجوری//پہلی باربابا بڈھا امرناتھ کی ویب سائٹ ملک میں شروع کی گئی ہے جس کا مقصد دنیا بھر کے عقیدت مندوں کے لئے مذہبی یاترا کو آسان بنانا ہے۔اب عقیدت مند اور یاتری اس ویب سائٹ سے صرف ایک کلک پر ہر قسم کی معلومات تک رسائی حاصل کر سکتے ہیں اور ساتھ ہی اپنے آپ کو یاترا کیلئے رجسٹر بھی کروا سکتے ہیں۔ضلع انتظامیہ پونچھ جو کہ سرحدی ضلع میں یاترا کے لیے نوڈل اتھارٹی ہے، کی دیکھ بھال میں شروع کی گئی،ویب سائٹ پر یاترا سے متعلق تمام قسم کی معلومات موجود ہیں جس میں یاترا کا راستہ، ہالٹ پوائنٹس، یاترا افسران کی تفصیلات اور اسسٹنٹ یاترا افسران شامل ہیں۔اس کے علاوہ علاقے میں مفت رہائش کے مقامات کی شناخت ودیگر نوعیت کی جانکاری بھی دستیاب رکھی جائے گی ۔اس کے علاوہ، اس ویب سائٹ کے ذریعے، دنیا بھر کے عقیدت مند اور یاتری آن لائن موڈ میں بھی اپنے آپ کو بھی رجسٹر کروا سکتے ہیں۔ضلع ترقیاتی کمشنر پونچھ نے بتایا کہ ’’ہمیں بڈھا امرناتھ جی کیلئے ویب سائٹ شروع کرنے کا اعلان کرتے ہوئے فخر ہے‘‘۔انتظامیہ نے کہاہے کہ ممکنہ یاتری فراہم کردہ آن لائن فارم کے ذریعے پہلے سے خود کو رجسٹر کر سکتے ہیں اور یاترا سے متعلق تمام معلومات بشمول رہائش، روٹ میپس تک رسائی حاصل کر سکتے ہیں۔انتظامیہ کی جانب سے shribudhaamarnath.in نام کی ویب سائٹ شروع کی گئی ہے ۔
یاترا کے پیش نظر سیکورٹی بندوبست میں اضافہ | فورسز نے مشترکہ طورپر منڈی میں حفاظتی مشقیں کیں
عشرت بٹ
منڈی//سرحدی ضلع پونچھ میں سیکورٹی فورسز نے شری بابا بڈھا امرناتھ یاترا سے پہلے اقدامات کو تیز کر دیا ہے جس کے ساتھ اتوار کو منڈی بازار اور راستے کے ارد گرد ایک مشق بھی کی گئی۔شری بابا بڈھا امرناتھ یاترا کی سالانہ یاترا 6-7 اگست کو شروع ہونے جا رہی ہے جس کے ساتھ یاتریوں کے جتھے کو سخت حفاظتی انتظامات کے تحت جموں سے پونچھ منتقل کیا جائے گا اور یاتری پونچھ کے منڈی قصبے کی پہاڑیوں میں واقع مندر میں پونچھ کی عبادت کریں گے۔اتوار کو، سخت حفاظتی اقدام کے ایک حصے کے طور پر سیکورٹی فورسز نے منڈی کے علاقے میں ایک سیکورٹی مشق کا انعقاد کیا جس میں متعدد موبائل وہیکل چیک پوائنٹس (MVCPs) قائم کئے گئے تھے، اس کے علاوہ پولیس، ایس او جی اور نیم فوجی اہلکاروں کی فوج کی ٹیموں کے ساتھ تعیناتی کی گئی تھی۔حکام نے بتایا کہ اس سخت حفاظتی اقدام کے ایک حصے کے طور پر علاقے کی بے ترتیب چھان بین بھی کی گئی۔فورسز کی جانب سے علاقے کے لوگوں سے بھی کہا گیا ہے کہ وہ کسی بھی مشتبہ حرکت یا چیز کی اطلاع فورسز کو دیں۔جڑواں اضلاع راجوری اور پونچھ میں شری بابا بڈھا امرناتھ یاترا اور خطے میں کئی دہشت گرد گروپوں کی مشتبہ موجودگی کے درمیان دہشت گردی کے خطرات کے پیش نظر سیکورٹی فورسز کی طرف سے سیکورٹی ہائی الرٹ کی جا رہی ہے۔
ایس ایس پی راجوری نے یاتراکے انتظامات کا جائزہ لیا
عظمیٰ نیوز سروس
راجوری//سینئرسپرنٹنڈنٹ آف پولیس راجوری،رندیپ کمار نے آنے والے بابا بڈھا امرناتھ یاترا – 2024 کے انتظامات کاجائزہ لیا، جو اگلے دو دنوں میں شروع ہونے والی ہے۔اس بار بھی، پہلے کی طرح، یاترا کے جتھے جموں سے پونچھ تک اپنا مقدس سفر کریں گے اور اس کے برعکس ضلع راجوری سے گزریں گے۔یہ بات قابل ذکر ہے کہ راستے میں متعدد مقامات پر کھانے اور دیگر سہولیات اور ضروریات کی سہولیات بھی قائم کی گئی ہیں۔ایس ایس پی راجوری، رندیپ کمار نے ہالٹ پوائنٹس کا دورہ کیا جہاں انہیں متعلقہ علاقائی افسران نے اس سالانہ یاترا کے ہموار اور پرامن انعقاد کے لئے سیکورٹی اور دیگر لاجسٹک انتظامات کے بارے میں بریفنگ دی۔انہوں نے ان انتظامات کا جائزہ لیا اور یاترا آرگنائزنگ کمیٹی کے نمائندوں سے بھی ملاقات کی۔ایس ایس پی راجوری نے منتظمین پر زور دیا کہ وہ اس بات کو یقینی بنائیں کہ یاترا کے جاری کردہ ایس او پیز میں بتائی گئی تمام ضروری ہدایات پر مکمل طور پر عمل درآمد کیا جائے۔انتظامیہ کی طرف سے جاری کردہ کٹ آف ٹائمنگ جیسا کہ اوپر اور نیچے یاترا کے لئے مخصوص کیا گیا ہے۔قابل ذکر بات یہ ہے کہ ایس ایس پی راجوری نے تمام متعلقہ علاقائی افسران بشمول ایڈیشنل ایس پیز، ایس ڈی پی اوز، ایس ایچ اوز، آئی سی پی پیز اور ان کی ٹیموں کو زمین پر تمام ضروری اقدامات کرنے اور اس سالانہ تقریب کے کامیاب انعقاد کے لئے فول پروف حفاظتی انتظامات کو یقینی بنانے کی ہدایت کی۔
پونچھ میں بڈھا امر ناتھ یاترا کے استقبال کیلئے تیاریاں مکمل
حسین محتشم
پونچھ//پونچھ میں مہارشی پلستیہ پنروتھن سمیتی (ایم پی پی ایس) نے بڈھا امرناتھ یاترا پر آنے والے یاتریوں کے استقبال کی تیاریاں مکمل کی۔اس دوران پرچم کی رسمی طور پر نقاب کشائی یاسین محمد چودھری آئی اے ایس، ضلع ترقیاتی کمشنر پونچھ نے کی ۔اس موقع پر دیپک بھان، بانی اور ایڈمنسٹریٹر ایم پی پی ایس، شری نشو گپتا صدر وی ایچ پی اور سول سوسائٹی کے دیگر اراکین نے موجود رہے۔اس موقع پر بات کرتے ہوئے عہدیداران نے بتایا کہ اس بار بھی پورے ہندوستان سے سرحدی ضلع پونچھ پہنچنے والے یاتریوں کا شاندار استقبال کیاجائے گا۔انہوں نے شری بڈھا امرناتھ جی کی سالانہ یاترا کی تیاریاں مکمل ہوچکی ہیں۔انہوں نے بتایا شری بڈھا امرناتھ راج پورہ، تحصیل منڈی میں واقع ایک قدیم مندر ہے ، پوری دنیا کے یاتری سال بھر اس مندر کا دورہ کرتے ہیں۔ ہر سال ماہِ ساون میں چھڑی یاترا کے نام سے سالانہ یاترا ہوتی ہے جو کہ دشنامی اکھاڑہ مندر پونچھ سے شری بڈھا امرناتھ جی راج پورہ منڈی کو جاتی ہے۔انہوں نے بتایاچھڑی یاترا ہمیشہ رکشا بندھن تہوار سے دو دن پہلے ہوتی ہے۔ مہارشی پلستیا ایک عظیم سنت جن کے نام سے پونچھ شہر اور دریائے پونچھ ان کے نام نکلے، بڑی اہمیت رکھتے ہیں۔انہوں نے بتایا مہارشی پلستیہ پنروتھن سمیتی کا قیام ضلع پونچھ میں قدیم مندر/دیوستھان جیسے شری رام کنڈ مندر، شری شیو مندر بہرام گالہ کی تنظیمیں کاتعاون حاصل ہے، ان کی تنظیمیں سماجی سرگرمیوں میں بھی شامل ہے جیسے تعلیم، سماجی مسائل کے بارے میں آگاہی مفت قانونی امداد وغیرہ۔اس دوران ایم پی پی ایس کے اراکین نے ایل جی انتظامیہ سے یاترا کے ضروری انتظامات کرنے اور پورے ہندوستان سے آنے والے تمام یاتریوں کو مناسب سیکورٹی فراہم کرنے کی درخواست کی۔
