بارش کے باوجود جموں سرینگرقومی شاہرا ہ بحال

رام بن//جمعہ کی صبح ادھم پور کے قریب سمرولی میں لینڈ سلائیڈنگ کی وجہ سے گاڑیوں کی آمدورفت میں کچھ گھنٹوں کے لئے خلل پڑا تھا تاہم ناشری اور بانہال کے درمیان لینڈ سلائیڈنگ اور پتھراؤ کا خطرہ ہونے والا حصہ جمعہ کو وقفے وقفے سے بارش کے باوجود کھلا رہا۔سرکاری ذرائع نے بتایا کہ سینکڑوں ہلکی موٹر گاڑیاں؛ پرائیویٹ کاریں جموں اور سری نگر کی طرف دو طرف سے چلی گئیں جب کہ دھر روڈ ادھم پور پر پھنسے بھاری موٹر گاڑیوں (ٹرکوں)، آئل گیس پٹرول اور ڈیزل ٹینکروں کو جمعہ کو کشمیر کی طرف جانے کی اجازت دی گئی۔سیکٹر آفیسر ٹریفک پولیس ادھم پور نے بتایا کہ جمعہ کی صبح سمرولی ادھم پور کے قریب لینڈ سلائیڈنگ کی وجہ سے گاڑیوں کی آمدورفت میں کچھ گھنٹوں کے لیے خلل پڑا تاہم علاقے میں تعینات متعلقہ ایجنسی کے جوانوں اور مشینری نے فوری طور پر سلائیڈ کو صاف کر دیا اور سڑک کو ٹریفک کے لیے بحال کر دیا گیا۔ڈپٹی سپرنٹنڈنٹ آف ٹریفک پولیس نیشنل ہائی وے رام بن پرفل بھردواج نے بتایا کہ وقفے وقفے سے بارش کے باوجود جموں سری نگر قومی شاہراہ گاڑیوں کی آمدورفت کے لیے کھلی تھی۔انہوں نے کہا کہ دونوں طرف سے مسافر اور ہلکی موٹر گاڑیاں چلتی رہیں جبکہ بھاری موٹر گاڑیاں سری نگر کی طرف جا رہی تھیں۔دریں اثنا، خراب موسم کے پیش نظر جموں و کشمیر ٹریفک پولیس ہیڈکوارٹر نے تازہ ایڈوائزری میں مسافروں کو مشورہ دیا ہے کہ وہ ہفتہ کو ٹریفک کنٹرول یونٹ سری نگر، رام بن، ادھم پور اور جموں سے سڑک کی حالت کی تصدیق کیے بغیر جموں سری نگر نیشنل پر سفر نہ کریں۔تاہم مناسب موسم اور سڑک کے اچھے حالات کے تحت ہلکی موٹر گاڑیوں کو ہائی وے کے دونوں طرف جانے کی اجازت ہوگی۔انہوں نے کہا کہ ہفتہ کی صبح ہائی وے پر ٹریفک کی صورتحال کا جائزہ لینے کے بعد ہیوی موٹر وہیکلز (ٹرکوں) کو جکھینی ادھم پور سے کشمیر کی طرف جانے کی اجازت دی جائے گی۔یہ رپورٹ درج ہونے تک علاقے میں ہلکی بارش ہو رہی ہے اور ٹرکوں کا ایک قافلہ سست رفتاری سے کشمیر کی طرف بڑھ رہا ہے۔