اے ایم پی انڈیا فاؤنڈیشن کی جانب سے مفت جاب پورٹل متعارف

نئی دلی //اے ایم پی انڈیا فاؤنڈیشن نے ایک ایسا جاب پورٹل متعارف کروایا ہے جس کا طویل عرصے سے انتظار تھا   (www.ampowerjobs.com )صنعتی پیشہ ور رضاکاروں کے ذریعے متعارف انڈیا کا پہلا ایسا جاب پورٹل ہے جو ہر ہندوستانی خصوصا کالج کی پڑھائی مکمل کرنے والوں اور کرونا وباء کے دوران ملازمت سے دستبردار ہونے والوں، طلباء اور پہلی ملازمت کے متلاشی افراد کو مفت ملازمت کے مواقع فراہم کرتا ہے۔ ملازمت مہیا کرانے والی کمپنیوں، ایچ آر کنسلٹنسیز اور ملازمت کے متلاشی بے روزگاروں کو جوڑنے کے علاوہ اس جاب پورٹل کی سب سے اہم خصوصیت یہ ہے کہ اس پورٹل کے ذریعے کالج اور پیشہ وارانہ کورسیز سے متعلق اداروں میں ملازمتی اہلیت کو اجاگر کرنے کیلئے اور طلباء کو ملازمت کے اہل بنانے کیلئے تربیت کا انتظام کرتی ہے۔بامبے اسٹاک ایکسچینج بروکرز فورم کے سی او او ڈاکٹر آدتیہ سرینواس نے پورٹل جاری کئے جانے کی تقریب میں کہا کہ کرونا وباء کے سبب مختلف رسمی اور غیر رسمی شعبوں میں 1.7 کروڑ ملازمتیں ضائع ہوئی ہیں۔یہ پورٹل ایسے لوگوں کیلئے کافی کارآمد ثابت ہوگا۔اس کے علاوہ کالج سے فارغ طلباء اور ملازمت کے متلاشی افراد کو پیشہ وارانہ اہلیت کی تربیت اور اسٹاک مارکیٹ کے مختلف پروگرام کی تربیت کے ذریعے مزید ملازمتیں پیدا کی جاسکتی ہیں۔اے ایم پی کے صدر عامر ادریسی نے کہا کہ یہ ہندوستان کا اولین جاب پورٹل ہے جو نہ صرف ملازمتیں فراہم کرتا ہے بلکہ کارپوریٹ سیکٹر میں داخلے کے متمنی انڈر گریجویٹس کو پیشہ وارانہ اہلیت سے بہرہ ور کرتا ہے۔ انہوں نے مزید کہا کہ آنے والے دنوں میں ملک کے تمام ضلعوں میں امپلائمنٹ گائیڈنس سینٹر قائم کرنا ہمارے مقاصد میں شامل ہے۔