سرینگر//ایام فاطمیہ کی مناسبت سے انجمن شرعی شیعیان کے زیر اہتمام مرکزی امام باڑہ بڈگام میں مجلس عزا کا انعقاد ہوا جس میں عقیدت مندوں نے شرکت کی ۔انجمن شرعی شیعیان کے صدر آغا سید حسن نے شہزادی کونین جناب سیدہ فاطم الزھرا ؑ کی سیرت طیبہ اور شان و عظمت کے مختلف پہلووں کا تفصیلی تذکرہ کیا ۔ آغا حسن نے جناب سیدہ کا زہد و تقوی ،سخاوت و کریمی عشق و عرفان الہی اور دین و ملت کے حوالے سے فکرمندی کو اعلی ترین نمونہ عمل قرار دیتے ہوئے واضح کیا کہ ایک صالح اسلامی معاشرے کی تعمیر کے لئے خاتون جنت جناب سیدہ فاطمہ ؑ کے کردار و عمل کے سوا کوئی بھی نتیجہ خیز لائحہ عمل نہیں ہو سکتا ۔انہوں نے کہا کہ سیرت فاطمہ اور اور ان کے مقام و منزلت کی طرف لوگوں کو متوجہ کرکے نہایت آسانی کے ساتھ سماجی بدعات اور اخلاقی بے راہ روی کا خاتمہ کیا جا سکتا ہے ۔انہوں نے کہا کہ سیدہ فاطمہؑ فرائض و حقوق نسواں کی سب سے عظیم المرتبت ترجمان ہیں جس نے خواتین کے لئے اسلام میں مختص کئے گئے حقوق کے قوانین کو بحال رکھنے کے لئے تکلیف دہ حالات کا سامنا کیا رسول اسلام ؐ کی اس برگزیدہ بیٹی اور خواتین عالم کی سردار جناب فاطمہ ؑکے تئیں خراج عقیدت اور انکی سیرت کا ایک اہم تقاضا یہ ہے کہ ہم خواتین کے حقوق کی پاسداری کریں اور ان حقوق کی ادئیگی کے سلسلے میں کسی وسوسے کا شکار نہ ہو جائے ۔
ایام فاطمیہ کی مناسبت سے مرکزی امام باڑہ بڈگام میں مجلس عزا
