آنگن واڑی ورکروںکی اجرتوں کو واگزار کیا جائے: تاریگامی

سرینگر/ / سی پی آئی (ایم) کے رہنما  یوسف  تاریگامی نے منگل کو کہا کہ جموں و کشمیر میں آئی سی ڈی ایس اسکیم کے تحت کام کرنے والی آنگن واڑی ورکراور ہیلپر گزشتہ کئی مہینوں سے اجرت کے بغیر ہیں۔ ایک بیان میں انہوں نے کہاکہ یہ سکیم ورکر انتھک محنت کر رہے ہیں کیونکہ زیادہ تر سرکاری سکیمیں ان ہی کے ذریعے لاگو کی جاتی ہیں۔  یہاں تک کہ کووِڈ وبائی بیماری کے خلاف جنگ کے دوران بھی وہ سب سے آگے رہی ہیں۔انہوں نے کہاکہ ان ملازمین کو اپنے خاندان کا پیٹ پالنا ہے لیکن محنت مزدوری کرنے کے باوجود انہیں وقت پر تنخواہ نہیں دی جاتی ہے۔ ان کی کئی ماہ کی اجرت کا مرکزی حصہ ابھی جاری ہونا باقی ہے۔تاریگامی نے کہاکہ  ان کے حقیقی مسائل کے تئیں انتظامیہ کی بے حسی انصاف کے خلاف ہے کیونکہ انہیں سماجی تحفظ کے فوائد بشمول پروموشن، گریجویٹی، پنشن، پراویڈنٹ فنڈ اور طبی سہولیات وغیرہ سے محروم رکھا جا رہا ہے۔ تاریگامی نے یہ معاملہ کمشنرسیکریٹری سماجی بہبود محکمہ کے ساتھ اٹھایا ہے جنہوں نے یقین دلایا کہ اس معاملے پر غور کیا جائے گا اور جلد ہی ان کی اجرتیں اگزار کی جائے گی۔