انتخابات تعمیری اور موقعہ پرست سیاست کے درمیان مقابلہ

سرینگر// کانگریس کے ریاستی صدر غلام احمد میر نے کہا ہے کہ موجودہ لوک سبھا انتخابات تعمیری اور موقعہ پرست سیاست کے درمیان مقابلہ ہے اور ملکی اور ریاستی عوام فرقہ پرست اور تقسیمی سیاست کے بجائے تبدیلی کی خواہش رکھتے ہیں۔ انہوں نے پی ڈی پی صدر محبوبہ مفتی پر چوٹ کرتے ہوئے کہا کہ لوگ قلم دوات کی سیاسی پینترہ بازیوں سے پوری طرح خبردار ہیں اور عوام اُن کی ٹافی اور دودھ کی سیاست سے غیر مانوس نہیں ہوئے ہیں۔ریاستی کانگریس کے صدر غلام احمد میر نے سنیچروار کو ڈورو اننت ناگ میں روڑ شو کے دوران بتایا کہ ملکی اور ریاستی عوام انتخابات کے ذریعے تبدیلی کے خواہش مند ہیں۔ انہوں نے کہا کہ موجودہ لوک سبھا انتخابات تعمیری اور موقعہ پرست سیاست کے درمیان مقابلہ ہے جس میں دھوکہ بازوں اور موقعہ پرست سیاست دانوں کی ناکامی انتہائی ناگزیر ہے۔انہوں نے پی ڈی پی صدر محبوبہ مفتی کو آڑے ہاتھوں لیتے ہوئے کہا کہ کشمیری عوام بالخصوص جنوبی کشمیر کے کولگام، اننت ناگ، پلوامہ اور شوپیان سے تعلق رکھنے والے لوگ پی ڈی پی کی دودھ اور ٹافی کی سیاست سے پوری طرح باخبر ہے جنہوں نے حصول اقتدار کی خاطر اپنے اصولوں اور ضمیر تک کا سودا کیا۔ انہوں نے کہا کہ پی ڈی پی نے 2014میں عوام سے جو جو وعدے کئے اُن کی پرواہ نہ کرتے ہوئے انہوں نے عوامی خواہشات کے ساتھ کھلواڑ کیا۔ڈورو اننت ناگ میں میگا روڑ شو کے دوران جنوبی کشمیر سے کانگریس پارٹی کے اُمیدوار نے عوام کا تعاون طلب کرتے ہوئے خطہ میں سیاسی استحصال اور دھوکہ دہی پر مبنی سیاست کا خاتمہ کرنے پر زور دیا۔اس موقع پر کانگریس کے سینئر لیڈر اور سابق وزیر عثمان مجید، فاروق اندرابی، ہلال احمد شاہ، بشیر احمد ماگرے، محمد اقبال میر، محمد اقبال آہنگر کے علاوہ دیگر پارٹی لیڈران نے بھی ریلی سے خطابات کئے۔