امرناتھ یاترا کی تیاریاں اور سیکورٹی بندو بست|| نئی دہلی میں اعلیٰ سطحی مشاورت وزیر داخلہ، ایل جی ، ہوم سکریٹری، شمالی کمان سربراہ اور ڈائریکٹرانٹیلی جنس بیورو کی شرکت

نیوز ڈیسک

نئی دہلی//مرکزی وزیر داخلہ امیت شاہ نے جمعہ کو جموں و کشمیر میں آئندہ امرناتھ یاترا کے ہموار انعقاد کے لئے کی جا رہی تیاریوں کا تفصیلی جائزہ لیا۔جنوبی کشمیر کے ہمالیہ میں 3,880 میٹر کی بلندی پر واقع امرناتھ گھپا کی 62 روزہ سالانہ یاترا یکم جولائی سے شروع ہو کر 31 اگست تک جاری رہے گی۔ لیفٹیننٹ گورنر منوج سنہا، فوج کی شمالی کمان کے سربراہ لیفٹیننٹ جنرل اوپیندر دویدی، مرکزی داخلہ سکریٹری اجے بھلہ اورانٹیلی جنس بیورو کے ڈائریکٹر تپن ڈیکا نے میٹنگ میں شرکت کی۔ذرائع نے بتایا کہ وزیر داخلہ نے مرکزی حکومت، فوج اور جموں و کشمیر انتظامیہ کے اعلی عہدیداروں کے ساتھ امرناتھ یاترا کی تیاریوں کا جائزہ لیا۔

 

 

انہوں نے کہا کہ شاہ نے یاترا کے لیے فول پروف سیکیورٹی کو یقینی بنانے کے لیے بنائے جانے والے منصوبوں کا بھی جائزہ لیا۔ذرائع کے مطابق انٹیلی جنس اطلاعات ملی ہیں کہ پاکستان میں مقیم ملی ٹینٹ گروپ یاترا میں خلل ڈالنے کی کوشش کر سکتے ہیں۔میٹنگ میں یاترا کے تمام اسٹیک ہولڈرز نے حصہ لیا اور اس کے لیے کئے جانے والے انتظامات سے متعلق تمام امور پر تبادلہ خیال کیا گیا۔انہوں نے کہا کہ پچھلے سال 3.45 لاکھ لوگوں نے یاتراکی تھی اور اس سال یہ تعداد 5 لاکھ تک جا سکتی ہے۔ذرائع نے بتایا کہ پچھلے سال کے سیلاب جیسے کسی بھی واقعے سے بچنے کے لیے جس میں مزار کے قریب 16 افراد ہلاک ہوئے تھے، نیشنل ڈیزاسٹر ریسپانس فورس نے کسی بھی ممکنہ غیر متوقع قدرتی آفت کو مدنظر رکھتے ہوئے یاتریوں کے کیمپ قائم کرنے کے لیے مقامات کی نشاندہی شروع کردی ہے۔

 

 

 

ہندوستانی فضائیہ کے ہیلی کاپٹرز کو برفانی واقعات اور جھیلوں کی تشکیل کی جانچ کرنے کے لیے گھپا کے اوپری حصے میں فضائی پروازیں کرنے کے لیے تعینات کیے جانے کی توقع ہے۔ذرائع نے بتایا کہ پچھلے سال، جون میں اچانک سیلاب آنے کے بعد ہی اس طرح کی چھان بین کی گئی تھی، لیکن اس سال یہ مشق یاترا کے آغاز سے پہلے اور دو ماہ کی یاترا کے دوران مسلسل وقفوں سے کی جائے گی۔فضائی سروے ریموٹ سینسنگ اور سیٹلائٹ، ہائیڈرولوجی اور ڈیزاسٹر رسپانس میں مہارت رکھنے والی ٹیم کے ذریعے کیا جا سکتا ہے۔ انہوں نے مزید کہا کہ ایک بار خطرناک پانی جمع ہونے کے بعد، یاترا کے راستے میں، خاص طور پر گھپا کے قریب کے علاقوں میں ہنگامی اقدامات کیے جائیں گے۔ ذرائع نے بتایا کہ حال ہی میں، بال تل اور پہلگام کے دونوں راستوں کے ساتھ بہت زیادہ برف پائی گئی ہے جو مقدس غار کی طرف جاتی ہے اور اس لیے بارڈر روڈز آرگنائزیشن کو 15 جون تک برف ہٹانے کا کام سونپا گیا ہے۔