آمریت، بے روزگاری اور مہنگائی کیخلاف ووٹ دیا: کیجریوال

یواین آئی

نئی دہلی// دہلی کے وزیر اعلی اروند کیجریوال نے اپنے خاندان کے ساتھ ووٹ ڈالنے کے بعد کہا کہ انہوں نے آمریت، بے روزگاری اور مہنگائی کے خلاف ووٹ دیا ہے۔ کیجریوال نے ووٹ ڈالنے کے بعد اپنے خاندان کے ساتھ انسٹاگرام پر ایک تصویر شیئر کی اور لکھا “میں نے آج اپنے والد، بیوی اور بچوں کے ساتھ ووٹ دیا۔ میری والدہ کی طبیعت بہت خراب ہے۔ وہ نہ جا سکیں۔ میں نے آمریت، بے روزگاری اور مہنگائی کے خلاف ووٹ دیا۔ آپ کو بھی ووٹ ڈالنے جانا چاہیے۔ووٹ ڈالنے کے بعد عام آدمی پارٹی (آپ) کے لیڈر گوپال رائے نے لوگوں سے ووٹ ڈالنے کی اپیل کرتے ہوئے کہا “آئین کو مضبوط کرنے، جمہوریت کو مضبوط کرنے اور ملک کو مضبوط کرنے کے لیے، اپنے گھر سے باہر نکل کر ووٹ دیں۔”آپ کے لیڈر سوربھ بھاردواج نے ووٹ ڈالنے کے بعد کہا کہ الیکشن کمیشن کو اس بات کا خیال رکھنا چاہئے کہ الیکشن کے دن کچھ بھی غلط نہ ہو۔ اگر کسی جگہ پر ووٹنگ کی رفتار سست ہے تو ہم پولیس اور حکام سے اسے ٹھیک کرنے کی درخواست کریں گے۔ ووٹنگ کی رفتار سست ہونے کی وجہ سے گرمیوں میں لوگوں کو پریشانی کا سامنا کرنا پڑتا ہے۔آپ کے راجیہ سبھا کے رکن سنجے سنگھ نے کہا کہ انتخابات جمہوریت کا تہوار ہیں اور ہندوستان دنیا کی سب سے بڑی جمہوریت ہے۔ میں ہاتھ جوڑ کر ہندوستان کے لوگوں سے اپیل کروں گا کہ وہ آئین کو مضبوط کرنے، جمہوریت کے تحفظ اور آمریت کے خاتمے کے لیے ووٹ دیں۔ ہم سب جانتے ہیں کہ جب سیاسی، جمہوری نظام ہوتا ہے تو سب کچھ پارلیمنٹ اور اسمبلیوں کے ذریعے چلتا ہے۔ اچھے نمائندے وہاں جائیں گے تو اسکول، اسپتال، بجلی اور پانی کے لیے کام کریں گے۔انڈیا اتحاد نے 300 سے زیادہ سیٹیں جیتنے کا دعوی کرتے ہوئے کہا کہ بھارتیہ جنتا پارٹی (بی جے پی ) اور قومی جمہوری اتحاد ( این ڈی اے ) پورے ملک میں اپنی طاقت کھو چکے ہیں اور اس کے بنیادی اسباب مہنگائی اور بے روزگاری ہیں۔

وائس ایڈمرل سنگھ نے این ڈی اے کمانڈنٹ کا چارج سنبھالا
نئی دہلی/یواین آئی/ وائس ایڈمرل گورچرن سنگھ نے نیشنل ڈیفنس اکیڈمی، پونے کے کمانڈنٹ کے طور پر چارج سنبھال لیا۔وائس ایڈمرل اجے کوچر کی جگہ وائس ایڈمرل سنگھ کو یہ ذمہ داری دی گئی ہے۔ نیشنل ڈیفنس اکیڈمی (کھڑکواسلا) کے سابق طالب علم وائس ایڈمرل سنگھ کو یکم جولائی 1990 کو بحریہ میں کمیشن ملا تھا۔وائس ایڈمرل سنگھ نے اپنے طویل کیریئر کے دوران سمندر اور ساحل دونوں پر بہت سے اہم عہدوں پر فائز رہے ہیں۔ توپ اور میزائل کے ماہر کے طور پر وہ بحری جنگی جہاز رنجیت اور پرہار پر خدمات انجام دے چکے ہیں۔ انہوں نے آئی این ایس ودیوت اور آئی این ایس کھوکھری جیسے جنگی جہازوں کی کمانڈ بھی کی ہے۔ وہ آئی این ایس ڈروناآچاریہ (گنری اسکول) میں انسٹرکٹر اور نیول وار کالج، گوا کے ڈپٹی کمانڈنٹ رہ چکے ہیں۔وائس ایڈمرل سنگھ نے 29 نومبر 2022 کو فلیگ آفیسر کمانڈنگ نیول ایسٹرن فلیٹ کا عہدہ سنبھالا۔