سامبا سیکٹر میں دھماکہ،بی ایس ایف اہلکار ہلاک، کئی زخمی

سرینگر/حکام نے سوموار کو کہا کہ بارڈر سیکورٹی فورسز (بی ایس ایف) کا ایک اہلکار ہلاک اور متعدد اُس وقت زخمی ہوگئے جب سامبا سیکٹر کے سرحدی علاقے میں ایک بارڈر پوسٹ پر دھماکہ ہوا۔ بی ایس ایف کے جموں ترجمان نے اس بات کی تصدیق کی کہ دھماکہ سامبا سیکٹر میں پیش آیا جس کے نتیجے میں ایک اہلکار ہلاک اور کئی زخمی ہوگئے۔ ذرائع کے مطابق دھماکہ منگچوک نامی پوسٹ پر اُس وقت شام5بجکر15منٹ پر ہواجب وہاں حادثاتی طور ایک گرینیڈ پھٹ پڑا۔ ذرائع نے مزید کہا کہ اس دھماکے میں چار بی ایس ایف اہلکار زخمی ہوگئے جنہیں ستواری ملٹری اسپتال منتقل کیا گیا ہے۔  

ایک ہفتہ بعد مغل روڑ یکطرفہ ٹریفک کیلئے کھل گیا

سرینگر/بھاری برفتاری سے ایک ہفتے تک بند رہنے کے بعد تاریخی مغل روڑ سوموار کو یکطرفہ ٹریفک کیلئے کھل گیا۔ ایڈیشنل ڈپٹی کمشنر، شوپیان شبیر احمدبٹ نے کہا کہ سواریوں کو چاہئے کہ پیر کی گلی صبح دس بجے سے شام چار بجے کے  دوران  کراس کریں۔   مغل روڑ کو11نومبر کے روز برفباری کے نتیجے میں پھسلن کی وجہ سے بند کیا گیا تھا۔ یہ شاہراہ راجوری اور پونچھ کو جنوبی کشمیر میں شوپیان سے ملاتی ہے۔  

سرینگر میں لبریشن فرنٹ سربراہ یاسین ملک گرفتار

سرینگر/پولیس نے سوموار کو جموں کشمیر لبریشن فرنٹ کے سربراہ محمد یاسین ملک کو سرینگر میں گرفتار کرلیا۔ اطلاعات کے مطابق پولیس کی ایک ٹیم نے ملک کو آبی گذر میں واقع پارٹی کے صدر دفتر سے گرفتار کیا۔ پارٹی ترجمان نے کہا کہ ملک کو کوٹھی باغ تھانے میں مقید رکھا گیا ہے۔ ترجمان کے مطابق ملک نے گرفتاری سے قبل پنچایتی انتخابات کا' بائیکاٹ'کرنے کی اپیل دہرائی۔ پنچایتی انتخابات کے دوسرے مرحلے میں کل کئی مقامات پر ووٹ ڈالے جارہے ہیں۔  

پنچایتی انتخابات: الیکشن والے علاقوں میں منگل کو ہڑتال کی اپیل

سرینگر/سید علی گیلانی، میر واعظ عمر فاروق اور محمد یاسین ملک پر مشتمل علیحدگی پسند لیڈران کے وفاق ،مشترکہ مزاحمتی قیادت نے سوموار کو عوام سے اپیل کی کہ وہ رواں پنچایتی انتخابات کے دوسرے مرحلے کے موقعہ پر کل یعنی منگلوار کو کلاروس، مژھل، راجوار،  گنستان، نوگام، سنگرامہ، واگورہ، کنگن،  رٹھسن اور بجبہاڑہ علاقوں ہڑتال کریں جہاں پنچایتی الیکشن کے سلسلے میں ووٹ ڈالے جارہے ہیں۔ علیحدگی پسند قائدین نے عوام سے اپیل کی کہ وہ جاری پنچایتی الیکشنوں کا مکمل بائیکاٹ کریں۔ علیحدگی پسند لیڈران نے عوام پر زور دیا کہ وہ انتخابی عمل کو'' گزشتہ مرحلے کی طرح مکمل طور مسترد کریں'' اور ہمہ گیر احتجاجی ہڑتال کریں۔  

پولیس سربراہ کی رہائش پر تعینات فورسز اہلکار نے خود پر گولی چلائی

سرینگر/جموں کشمیر پولیس سربراہ، دلباغ سنگھ کی جموں رہائش پر تعینات ایک فورسز اہلکار نے سوموار کو خود پر گولی چلائی۔ پولیس ذرائع کے مطابق سبھاش چندر نامی اہلکار نے اپنی سروس رائفل سے خود پر گولی چلائی جس سے وہ بری طرح زخمی ہوگیا۔ زخمی اہلکار کو فوری طور پر جموں کے میڈیکل کالیج اسپتال منتقل کیا گیا جہاں اُس کا علاج کیا جارہا ہے۔  پولیس نے معاملے کا نوٹس لیکر تحقیقات شروع کی ہے۔  

نیشنل کانفرنس خواتین شاخ کا بجلی کی نا معقول سپلائی کیخلاف احتجاج

سرینگر/جموں کشمیرنیشنل کانفرنس کی خواتین شاخ نے سوموار کو سرینگر میں  ایک احتجاجی ریلی کا انعقاد کیاجس کا مقصد وادی کشمیر میں بجلی سپلائی میں نا معقولیت کیخلاف صدائے احتجاج بلند کر نا تھا۔ پارٹی لیڈر اور ایم ایل اے حبہ کدل شمیمہ فردوس کی قیادت میں احتجاجی ریلی نیشنل کانفرنس صدر دفتر واقع نوائے صبح سے پولو ویو تک نکالی گئی۔ پلے کارڈ اٹھائے بیسیوں خواتین مظاہرین نے ریاستی سرکار کیخلاف نعرے بلند کئے۔مظاہرین ہاتھوں میں جلتی موم بتیاں اٹھا کر بھی بجلی کی مایوس کن سپلائی کیخلاف اپنا احتجاج درج کررہی تھیں۔ نامہ نگاروں سے بات کرتے ہوئے شمیمہ فردوس نے کہا کہ وادی کشمیر کے لوگ گورنر راج کے دوران انتہائی مصائب جھیل رہے ہیں۔  

مرحوم اقبال کھانڈے کی نماز جنازہ دن کے4بجے ہمہامہ میں

سرینگر/جموں کشمیر کے سابق چیف سیکریٹری محمد اقبال کھانڈے، جو سوموار کی صبح انتقال کرگئے، کی نماز جنازہ دن کے4بجے ادا کی جائے گی۔ گھریلو ذرائع کے مطابق مرحوم کی آخری رسومات فرینڈس انکلیو  ہمہامہ میں انجام دی جائیں گی۔  کے آئی اے ایس آفیسر نے سرینگر میں آج صبح آخری سانس لی۔1978 کھانڈے نے اپنی سروس کے دوران کئی اہم عہدوں پر کام کیا۔ اُنہوں نے سابق وزیر اعلیٰ مفتی محمد سعید کے پرنسپل سیکریٹری کے طور بھی خدمات انجام دیں۔  

ریاست میں مطلع ابر آلود، رات کے درجہ حرارت میں اضافہ

سرینگر/محکمہ موسمیات نے سوموارکو کہا کہ مطلع ابر آلود رہنے کی وجہ سے جموں کشمیر کے درجہ حرارت میں نمایاں اضافہ ہوا۔محکمہ کے مطابق ریاست میں فی الحال موسم خشک رہنے کا امکان ہے ۔ محکمہ کے مطابق ریاست میں کرگل، سرد ترین علاقہ رہا جہاں درجہ حرارت منفی8.8ڈگری سیلشیس ریکارڈ کیا گیا۔ محکمہ نے کہا کہ ریاست بھر میں رات کے درجہ حرارت میں اضافہ کی توقع ہے۔ سرینگر میں کم سے کم درجہ حرارت4.6ڈگری سیلشیس ریکارڈ کیا گیا جبکہ گلمرگ اور پہلگام میں با الترتیب درجہ حرارت 2.0اور4.4ڈگری سیلشیس ریکارڈ کیا گیا۔ جموں شہر میں درجہ حرارت12.5ڈگری سیلشیس ریکارڈ کیا گیا۔  

شمالی کشمیر کے گائوں میں پانی کی عدم فراہمی کیخلاف مظاہرہ

سرینگر/شمالی کشمیر کے ضلع کپواہ میں آرمپورہ نامی گائوں کے باشندوں نے سوموار کو علاقے میں پینے کے پانی کی قلت کیخلاف احتجاج کرتے ہوئے کپوارہ۔سرینگر شاہراہ پر دھرنا دیا۔ مظاہرین کا الزام تھا کہ وہ گذشتہ کئی ہفتوں سے پینے کے پانی سے محروم ہیں جس کی وجہ سے وہ سڑکوں پر نکل کر صدائے احتجاج بلندکرنے پر مجبور ہوئے ہیں۔ اُنہوں نے الزام عاید کرتے ہوئے کہا کہ محکمہ پی ایچ ای کو متعدد بار مطلع کرنے کے باوجود اُن کے علاقے میں پانی کی سپلائی بحال نہیں کی گئی ہے۔ محکمہ پی ایچ ای کے ایک آفیسر نے کہا کہ وہ پائپ لائن جو علاقے کو پانی فراہم کرتی ہے، میں کوئی خرابی واقع ہوئی ہے جس کو ٹھیک کرنے کا عمل جاری ہے۔ دریں اثناء عینی شاہدین کے مطابق مظاہرین کے دھرنا کی وجہ سے کپوارہ۔سرینگر شاہراہ پر کچھ  دیر  کیلئے گاڑیوں کی نقل و حمل میں خلل  پڑا۔  

ریاست کے سابق چیف سیکریٹری اقبال کھانڈے کا انتقال

سرینگر/جموں کشمیر کے سابق چیف سیکریٹری محمد اقبال کھانڈے سوموار کو انتقال کرگئے۔ کے آئی اے ایس آفیسر نے سرینگر میں آج صبح زندگی  کی  آخری سانس لی۔1978 کھانڈے نے اپنی سروس کے دوران کئی اہم عہدوں پر کام کیا۔ اُنہوں نے سابق وزیر اعلیٰ مفتی محمد سعید کے پرنسپل سیکریٹری کے طور بھی خدمات انجام دیں۔  

جنوبی کشمیرمیں جھڑپ ، البدر کے دو جنگجو جاں بحق

سرینگر/پولیس نے اتوار کو کہا کہ جنوبی کشمیر کے شوپیان ضلع میں ایک جھڑپ کے دوران البدر تنظیم سے وابستہ دو جنگجوئوں کو جاں بحق کیا گیا ہے۔ یہ جھڑپ شوپیان کے ربن نامی گائوں میں ہوئی جہاں فورسز نے مصدقہ اطلاع ملنے کے بعد آپریشن شروع کیا تھا۔جونہی گائوں میں تلاشی آپریشن شروع ہوا تو چھپے جنگجوئوں نے فورسز اہلکاروں پر فائرنگ کی جس کے جواب میں فورسز  نے بھی فائرنگ کی اور دو جنگجو ئوں کوجاں بحق کیا۔ دونوں جنگجوئوں کی لاشیں بعد میں بر آمد کی گئیں جن کی شناخت نواز احمد وگے ولد غلام قادر وگے ساکنہ ربن اور یاور وانی ولدعلی محمد وانی ساکنہ بٹنور لیتر، پلوامہ کے طور ہوئی ہے۔ دریں اثنا ء حکام نے علاقے میں انٹرنیٹ سروس معطل کی ہے۔  

پنچایتی انتخابات: کپوارہ میں سب سے زیادہ72فیصد، گاندربل میں 12فیصد ووٹنگ ریکارڈ

سرینگر/پنچایتی انتخابات کے پہلے مرحلے میں سنیچر کی شام چیف الیکٹورل آفیسر شیلن کبرا کی طرف سے جاری اعداد و شمار کے مطابق جموں کشمیر میں مجموعی طور پر74.1فیصد رائے دہندگان نے اپنی رائے کا اظہار کیا۔ سرکاری اعداد و شمار کے مطابق وادی کشمیر میں سب سے زیادہ71.9فیصد ووٹ ضلع کپوارہ میں ڈالے گئے جبکہ سب سے کم11.9فیصد ووٹ ضلع  گاندربل  میں  پڑے۔ ووٹوں کی حتمی شرح فیصد کو لیکرسرکار کی طرف سے جاری اعداد و شمار حسب ذیل ہیں۔ کپوارہ71.9فیصد بانڈی پورہ55.7فیصد بارہمولہ69.1فیصد گاندربل11.9فیصد سرینگر21.8فیصد بڈگام30.1فیصد کرگل70.9فیصد لیہہ59.7فیصد کشتوار74.1فیصد ڈوڈہ80.8فیصد رامبن78.2فیصد اُدھمپور83.6فیصد کٹھوعہ80.0فیصد راجوری78.9فیصد پونچھ78.7فیصد    

شوپیان میں مزید دو شہریوں کا اغوا، لاش بر آمد

سرینگر/جنوبی ضلع شوپیان میں سنیچر کی شام کو مزید دو شہریوں کو نامعلوم اسلحہ برداروں نے اغوا کیا تاہم آج صبح اغوا کئے گئے تین میں سے دو شہریوں کو رہا کیا گیا ہے جبکہ ایک کی لاش بر آمد ہوئی۔ اطلاعات میں بتایا گیا ہے کہ دو شہریوں کو میمندر نامی علاقے سے اغوا کیا گیا ہے۔ پولیس ذرائع نے اغوا شدگان کی شناخت ہاقب جاوید گنائی ساکنہ میمندر اور اشفاق احمد ساکنہ پڈسو کے طور کی ہے۔ اس سے قبل آج صبح شوپیان کے ہی سیدہ پورہ پائین نامی گائوں سے جن تین شہریوں کو نامعلوم اسلحہ برداروں نے اغوا کیا تھا ،اُن میں سے دو کو شام کے وقت رہا کیا گیاہے۔  شاہد احمد گنائی، فاروق احمد ساکنان سیدہ پورہ اور حفیظ احمد کوٹے ساکنہ منزگام کو صبح سویرے اغوا کیا گیا تھا۔ذرائع کے مطابق شاہد اور فاروق کو رہا کیا گیا ہے تاہم شام کو حفیظ کی لاش بر آمد ہوئی۔ جنوبی ضلع میں یہ اغوا کاریاں ندیم منظور نامی ن

پنچایتی انتخابات: کپوارہ ضلع میں 66فیصد ووٹ پڑے

سرینگر/جموں کشمیر میں سنیچر وارکوپنچایتی انتخابات کے پہلے مرحلے میں ووٹ ڈالے گئے۔ ووٹنگ کا عمل علیحدگی پسندوں کی ہڑتال کال کے بیچ دن کے 2بجے تک جاری رہا۔ سرکاری ذرائع نے جو ووٹنگ کی شرح فیصد بتائی اُس کے مطابق دن کے2بجے تک کپوار ہ ضلع کے حلقوں میں64.68 فیصد ووٹ ڈالے گئے۔ سرکاری ذرائع کے مطابق دن کے 12بجے تک ووٹنگ کی شرح حسب ذیل رہی۔ سرینگر19فیصد گاندربل9.7فیصد بڈگام11.9فیصد بارہمولہ36.5فیصد کپوارہ35.2فیصد ہندوارہ28فیصد بانڈی پورہ42فیصد لیہہ23.6فیصد کرگل14.6فیصد کشتوار54.7فیصد ڈوڈہ60.1فیصد رامبن69.4فیصد اُدھمپور50.9فیصد کٹھوعہ62.9فیصد راجوری62.9فیصد پونچھ50فیصد      

پنچایتی انتخابات:اُ وڑی میں101 سالہ خاتون نے حق رائے دہی کا استعمال کیا

بارہمولہ/پنچایتی انتخابات کے پہلے مرحلے میں ہونے والی ووٹنگ کے دوران سنیچر وارکو سرحدی قصبہ اُوڑی میں101سالہ خاتون نے اپنے حق رائے دہی کا استعمال کیا۔  روشن بیگم زوجہ محمد غازی، ساکنہ رازر وانی اُوڑی پنے دو بیٹوں کے ہمراہ پولنگ سٹیشن نمبر6 پر پہنچی اور اپنے ووٹ کا استعمال کیا۔ روشن بیگم نے ووٹ ڈالنے کے بعد نامہ نگاروں کو بتایا '' ہم بہت پسماندہ ہیں اور اپنی اسی پسماندگی کو دور کرنے کیلئے ہم نے ووٹ کا استعمال کیا ''۔ روشن اپنے ووٹ کے استعمال کے بعد کافی خوش نظر آرہی تھی۔ اُوڑی کی طرح ہی ریاست کے کئی علاقوں میں آج پنچایتی انتخابات کے پہلے مرحلے میں ووٹ ڈالے جا رہے ہیں ۔  

پنچایتی انتخابات: کئی علاقوں میں ہائی سپیڈ انٹرنیت سروس معطل

سرینگر/وادی کشمیر کے کئی علاقوں میں ،جہاں سنیچر کو پنچایتی انتخابات کے  پہلے  مرحلے  میں ووٹ ڈالے جارہے ہیں، میں ہائی سپیڈ انٹرنیٹ سروس  کو معطل کرکے اس کی رفتار میں کمی لائی گئی۔  اطلاعات کے مطابق بڈگام،بارہمولہ اور بانڈی پورہ اضلاع میں انٹرنیٹ سپیڈ کی رفتار2جی تک گھٹائی گئی جبکہ کپوارہ میں انٹرنیٹ سروس کو مکمل طور پر بند رکھا گیا۔ دریں اثناء پنچایتی انتخابات کے پہلے مرحلے میں آج علیحدگی پسندوں کی بلائی گئی ہڑتال کے بیچ ووٹنگ کا عمل جاری ہے ۔  

پنچایتی انتخابات: کشمیر میں11بجے تک 18فیصد سے زیادہ ووٹ ڈالے گئے

سرینگر/سرکاری اعداد و شمار کے مطابق سنیچر کی صبح گیارہ بجے تک کشمیر میں ووٹنگ کی شرح فیصد مندرجہ ذیل رہی۔یاد رہے کہ آج پنچایتی انتخابات کے پہلے مرحلے کے تحت متعدد حلقوں میں ووٹ ڈالے جارہے ہیں۔  سرینگر13.7فیصد گاندربل8.7 فیصد بڈگام12فیص بارہمولہ12.5فیصد کپوارہ33.6فیصد ہندوارہ28فیصد بانڈی پورہ11.9فیصد سوپور7.6 فیصد لیہہ9.5 فیصد  

شوپیان میں نامعلوم اسلحہ برداروں کے ہاتھوں تین شہری اغوا

سرینگر/نامعلوم اسلحہ برداروں نے سنیچر وار کو جنوبی کشمیر کے شوپیان ضلع میں تین شہریوں کو اغوا کرلیا۔ یہ واقع شوپیان کے سیدہ پورہ پائین نامی گائوں میں پیش آگیا۔ تین شہریوں کے اغوا کا واقع شوپیان کے ہی صفنگری گائوں میں ایک نوجوان کی ہلاکت کے 36گھنٹوں بعد پیش آگیا۔ پولیس ذرائع کے مطابق تین شہریوں کی اغواکاری کا واقع آج صبح پیش آیا۔ حکام نے تین اغوا شدہ شہریوں کی شناخت شاہد احمد گنائی،فاروق احمد اور راجا (بلبل) کے طور کی ہے۔ حکام نے کہا کہ تینوں کو نانوائی کی دکان سے اغوا کیا گیا ہے۔  

پنچایتی انتخابات: کرناہ اور ٹیٹوال کے رائے دہندگان میں جوش و خروش

سرینگر /جموں کشمیر میں7برس بعد منعقد ہونے والے پنچایتی انتخابات کے پہلے مرحلے کے تحت سنیچر کو سرحدی قصبہ کرناہ میں بھی ووٹ ڈالے جا رہے ہیں جہاں صبح سے ہی پولنگ مراکز کے باہر رائے دہندگان کی بڑی تعداد اپنی باری کا انتظار کر رہے ہیں ۔ایس ڈی ایم کرناہ ڈاکٹر الیاس نے کہا کہ پولنگ پرامن ماحول میں ہو رہی ہے اور لوگ اس میں بڑھ چڑھ کر حصہ لے رہے ہیں۔ ذرائع سے معلوم ہوا ہے کہ کرناہ کے بلاک ٹنگڈار اور ٹیٹوال میں صبح 10بجے تک 13فیصد پولنگ ہوئی تھی۔ کنڈی بالا کرناہ میں قائم پولنگ سٹیشن نمبر13میں صبح ساڑھے دس بجے تک 666ووٹوں میں سے 80ووٹ ڈالے گے تھے جبکہ دلدار بٹ پورہ ، نہچیاں ، ٹنگڈار، لونٹھا ، شاٹھ پلہ اور دیگر مرکزی علاقوں میں قائم کئے گے پولنگ سٹیشنوں کے باہر بھی رائے دہندگان لمبی قطاروں میںاپنی اپنی باری کا انتظار کر رہے تھے ۔سرکاری ذرائع کے مطابق کرناہ کے 32پنچایتی حلقوں میں سے 27حلقوںکیل

پنچایتی انتخابات کیخلاف ہڑتال سے کشمیر کے معمولات متاثر

سرینگر/سنیچر وار کو وادی کشمیر کے اطراف و اکناف میں علیحدگی پسندوں کی کال پر ہڑتال سے معمولات زندگی متاثر رہے۔ ہڑتال کی اپیل سید علی گیلانی، میرواعظ عمر فاروق اور محمد یاسین ملک پر مشتمل علیحدگی پسندلیڈروں کے وفاق، مشترکہ مزاحمتی قیادت نے پنچایتی انتخابات کیخلاف کی تھی۔ مذکورہ انتخابات کے پہلے مرحلے کے تحت آج ووٹ ڈالے جارہے ہیں۔ گرمائی دارالحکومت سرینگر میں دکان اور دیگر کاروباری ادارے بند ہیں جبکہ وادی کے دیگر اضلاع سے بھی اسی طرح کی اطلاعات موصول ہوئی ہیں۔ان اطلاعات کے مطابق پبلک ٹرانسپورٹ بھی سڑکوں سے غائب ہے تاہم نجی گاڑیاں چل رہی ہیں۔ سرکاری محکموں اور بینکوں میں ملازمین کی حاضری بھی پبلک ٹرانسپورٹ بند رہنے کی وجہ سے متاثر رہی۔ اس دوران پولیس اور سی آر پی ایف کے اضافی اہلکاروں کو شہر سرینگر کے حساس علاقوں  میں احتیاط کے طور تعینات کیا گیا ہے ۔  

تازہ ترین