تازہ ترین

محبوبہ مفتی جنوبی کشمیر سے لوک سبھا کاالیکشن لڑیں گی

سرینگر/پیپلز ڈیمو کریٹک پارٹی (پی ڈی پی) کی صدر محبوبہ مفتی جنوبی کشمیر (اننت ناگ) سے لوک سبھا کاالیکشن لڑیں گی۔ اس بات کا اعلان محبوبہ نے سنیچر کوخود ایک پریس کانفرنس کے دوران کیا۔ انہوں نے اعلان کرتے ہوئے مزید کہا کہ آغا محسن وسطی کشمیر( سرینگر) سیٹ کیلئے پارٹی کے انتخابی اُمیدوار ہونگے۔ انہوں نے تاہم کہا کہ جموں کی دو سیٹوں  پرپی ڈی پی کوئی اُمیدوار کھڑا نہیں کرے گی تاکہ ''سیکولرووٹ کو مضبوط کیا جاسکے''۔ سابق وزیر اعلیٰ نے کہا کہ پارٹی نے فیصلہ کیا ہے کہ جموں میں ''سیکولر ووٹ کو مضبوط کیا جائے''۔ واضح رہے کہ پی ڈی پی نے شمالی کشمیر (بارہمولہ) سیٹ کیلئے پہلے ہی قیوم وانی کو اُمیدوار نامزد کر رکھا ہے۔  

سوپور معرکہ کے مقام سے جاں بحق جنگجوئوں کی لاشیں بر آمد: پولیس

سرینگر/پولیس نے سنیچر کو ایک بیان میں کہا کہ شمالی کشمیر کے وارہ پورہ سوپور میں اُس مقام سے، جہاں فورسز اور جنگجوئوں کے درمیان مسلح تصادم ہوا تھا، جاں بحق جنگجوئوں کی لاشیں بر آمدکی گئی ہیں۔ پولیس بیان کے مطابق فورسز کو یہ اطلاع موصول ہوئی تھی کہ جنگجو وار پورہ سوپور علاقے میں چھپے بیٹھے ہیں ،جس کے بعد پولیس اور فورسز نے مشترکہ طورپر فوراً اس علاقے کو محاصرے میں لے لیا اور جنگجوئوں  کوڈھونڈ نکالنے کیلئے کارروائی شروع کی۔ پولیس نے کہا کہ فرار ہونے کے تمام راستے مسدود پا کر جنگجوئوں نے فورسز پر اندھا دھند فائرنگ شروع کی۔پولیس کے مطابق فورسزنے بھی جوابی کارروائی کا آغاز کیا اور اس طرح طرفین کے مابین جھڑپ شروع ہوئی۔ اس معرکے میں دو جنگجود ہلاک ہوگئے۔ پولیس کے مطابق فورسز نے جائے واردات پر 2جنگجوئوں کی نعشیں برآمد کیں جن کی شناخت اور تنظیمی وابستگی کے بارے میں جانچ پڑتال ہو

پلوامہ میں جنگجوئوں کی کمین گاہ تباہ: پولیس

 سرینگر/پولیس نے سنیچر کو ایک بیان میں کہا کہ ایک مصدقہ اطلاع موصول ہونے کے بعد فورسز اور پولیس نے مشترکہ طورپر ضلع پلوامہ کے بانڈر پورہ علاقے میں قائم جنگجوئوں کی ایک خفیہ کمین گاہ کا پتہ لگایا۔ پولیس بیان کے مطابق جائے موقع پر موجود آفیسران نے کمین گاہ سے بھاری مقدار میں قابلِ اعتراض مواد اور دوسرا سازو سامان برآمد کرکے ضبط کیا۔  پولیس نے معاملے کی نسبت کیس درج کرکے تحقیقات شروع کی ہے۔  

لبریشن فرنٹ کو غیر قانونی قرار دینے کیخلاف اتوار کو ہڑتال کی جائے:مشترکہ قیادت

سرینگر/علیحدگی پسندوں کے وفاق، مشترکہ مزاحمتی قیادت نے سنیچر کو اپیل کی کہ کل یعنی اتوار کو لبریشن فرنٹ کو غیر قانونی تنظیم قرار دئے جانے کیخلاف ہڑتال کی جائے۔ سید علی گیلانی، میرواعظ عمر فاروق اور محمد یاسین ملک پر مشتمل مزاحمتی قیادت نے ایک بیان میں لوگوں سے اپیل کی کہ وہ نئی دلی کے اس فیصلے کیخلاف مکمل احتجاجی ہڑتال کریں۔ واضح رہے کہ مرکزی سرکار نے گذشتہ روز لبریشن فرنٹ کو غیر قانونی تنظیم قرار دیدیا۔ اس سے قبل مرکزی سرکار نے جماعت اسلامی کو غیر قانونی قرار دیتے ہوئے اس سے وابستہ سینکڑوں افراد کو گرفتار کرلیا اور اس کے صدر دفتر کو سیل کردیا۔  

شاہ فیصل کی پارٹی لوک سبھا الیکشن میں حصہ نہیں لے گی

سرینگر/سابق آئی اے ایس آفیسر شاہ فیصل نے سنیچر کو اعلان کیا کہ اُن کی قیادت والی پارٹی آنے والے لوک سبھا انتخابات میں حصہ نہیں لے گی۔ ایک پریس کانفرنس کے دوران شاہ نے کہا کہ وہ فی الحال اپنی پارٹی کو مضبوط بنانے کیلئے کام کریں گے جس کے بعد ہی وہ انتخابی میدان میں آئیں گے۔ شاہ نے حال ہی میں ''جموں کشمیر پیپلز مؤمنٹ'' کے نام سے ایک پارٹی لانچ کی۔ وہ2010کے آئی اے ایس بیچ کے سیول سرونٹ آفیسر تھے اور اُنہوں نے رواں برس کے اوائل میں سرکاری نوکری سے استعفیٰ دیدیا۔    

جہاد کونسل انتخابات کے دوران جنگ بندی کا اعلان کرے: نیشنل کانفرنس لیڈر کا مطالبہ

سرینگر./جموں کشمیر نیشنل کانفرنس کے لیڈر یاور مسعودی نے جنگجو تنظیموں کے اتحاد ،متحدہ جہاد کونسل سے اپیل کی ہے کہ وہ کشمیر میں  آنے والے لوک سبھا اور اسمبلی انتخابات کے دوران جنگ بندی کا اعلان کرے۔ مسعودی ، جو پارٹی کے پانپور حلقے کے انچارج ہیں،نے ایک بیان میں کہا کہ تشدد جمہوری عمل کو متاثر کرتا ہے اور اس طرح عام لوگ الیکشن عمل میں شریک ہونے سے رہ جاتے ہیں۔  انہوں نے کہا''جہاد کونسل کو چاہئے کہ عوامی نمائندوں کے انتخاب کے جمہوری عمل کی اہمیت کو سمجھے اور ایسے اقدامات کرے جن سے آنے والے لوک سبھا اور اسمبلی انتخابات میں لوگوں کی زیادہ سے زیادہ شرکت یقینی بن جائے''۔ انہوں نے سماجی و مذہبی جماعتوں پر سرکاری پابندی کوغیر ضروری قراردیتے ہوئے ریاست کی خصوصی پوزیشن کو زک پہنچانے،این آئی اے کے استعمال سے قیدیوں کو وادی سے باہر منتقل کرنے کی مخالفت کرتے ہوئ

سرینگر میں فورسز اہلکار حادثاتی طور گولی چلنے کے بعد داخل اسپتال

سرینگر/ایک ایس ایس بی اہلکار کی بندوق سے سرینگر میں سنیچر کو اچانک اور حادثاتی طور گولی چل گئی جس کی وجہ سے وہ بیہوش ہوگیا۔ یہ واقعہ سرینگر کے سونہ وار علاقے میں پیش آیا جب اہلکار کی سروس رائفل سے حادثاتی طور گولی چل گئی۔ خبر رساں ایجنسی جی این ایس کے مطابق مذکورہ اہلکار بیہوش ہوگیا اور اُسے فوری طور پر فوجی اسپتال منتقل کیا گیا۔  یہ واقعہ ضلع کمشنر سرینگر کی سرکاری رہائش گاہ کے باہر درگا ناتھ مندر، سونہ وار کے نزدیک پیش آیا۔ سٹیشن ہائوس آفیسر رام منشی باغ محمد اسحاق نے واقعہ کی تصدیق کرتے ہوئے کہا کہ گولی نزدیکی دیوار کو لگی ہے اور اسپتال میں اہلکار بالکل ٹھیک حالت میں ہے۔  

شمالی کشمیر کے حاجن میں مسلسل تیسرے روز ہلاکتوں کیخلاف ہڑتال

سرینگر/شمالی کشمیر کے حاجن علاقے میں سنیچر کو مسلسل تیسرے روز ہڑتال کی جارہی ہے۔ یہ ہڑتال علاقے میں جنگجوئوں اور ایک کمسن بچے کی موت کیخلاف کی جارہی ہے۔ عینی شاہدین کے مطابق قصبہ میں تمام دکانیں اور کاروباری ادارے بند ہیں جبکہ ٹریفک بھی نہیں چل رہی ہے۔ ضلع بانڈی پورہ کے حاجن میں جنگجوئوں اور فورسز کے مابین ایک انکائونٹر کے دوران دو جنگجواور ایک کمسن بچہ، عاطف میر جاں بحق ہوگئے۔ پولیس نے جاں بحق جنگجوئوں کی شناخت علی اور حبیب ساکنان پاکستان کے طور کرلی ہے۔ پولیس نے کہا کہ عاطف کو جنگجوئوں نے یرغمال بنا کے رکھا تھا۔  

راجوری میں چھ افراد گرفتار

سرینگر/حکام نے سنیچر کو کہا کہ پولیس نے راجوری ضلع میں چھ افراد کو مبینہ طور امن عامہ کو نقصان پہنچانے کی پاداش میں گرفتار کرلیا ہے۔ پولیس نے چار افراد کو ایک مخصوس علاقے میں دھر لیا۔ مذکورہ افراد کی شناخت شبنم کمار، سنیل کمار،ظفر سفاری اور محمد الطاف کے طور کی گئی ہے۔ مزید دو افرادکوراجوری کے نوشیرا علاقے میں گرفتار کرلیا گیا ہے جن میں گنیش کمار اور تلک راج شامل ہیں ۔  

ڈوڈہ میں ٹرک زمینی تودے کی زد میں،ڈرائیور سمیت2جاں بحق

سرینگر/ضلع ڈوڈہ میں سنیچر کو اُس وقت دو افراد جاں بحق ہوگئے جب ایک ٹرک ایک بھاری زمینی تودے کی زد میں آگئی۔ یہ حادثہ ضلع کے پیاکل گائوں میں ٹھاٹھری۔کیہوتران سڑک پر پیش آیا۔ حکام کے مطابق ایک ٹرک کشتواڑ سے گندوہ جارہی تھی جب ایک بھاری بھرکم زمینی تودے نے گر کر اُس کو پوری طرح اپنی زد میں لایا۔ سب ڈسٹرکٹ مجسٹریٹ ٹھاٹھری محمد انوار بانڈے کے مطابق بچائو کارروائی فوری طور شروع کی گئی جس کے دوران ٹرک کے ڈرائیور شہزار احمد ساکنہ چرالا اور اس کے ساتھی محمد عارف ساکنہ کشتوار کی لاشیں بر آمد کی گئیں۔ ابتدائی اطلاعات میں بتایا جارہا ہے کہ مذکورہ ٹرک گذشتہ رات کے دوران کیچڑ بھری راہ سے گذر رہی تھی ۔ٹرک کا ڈرائیور اور اس کا ساتھی گاڑی سے باہر آئے اور راستہ صاف کرنے لگے جس کے دوران اچانک ایک زمینی تودے نے ٹرک اور مذکورہ افراد کو دفن کردیا۔کسی پتھر نے غالباًڈرائیور کو ٹکر مار کر قریبی

مسلح تصادم کا نتیجہ :بارہمولہ میں بانڈی پائین کے سبھی سکول دس دنوں کیلئے بند

سرینگر/ضلع انتظامیہ بارہمولہ نے بانڈی پائین علاقے کے چندوسہ میں حالیہ معرکہ آرائی کے پس منظر میں سبھی سکول دس دنوں تک بند کرنے کے احکامات صادر کئے ہیں۔ جنگجوئوں اور فورسز کے مابین یہاں ہوئی معرکہ آرائی کے دوران دو جنگجو جاں بحق ہوئے تھے۔ اس سلسلے میں ذرائع کے مطابق ضلع کمشنر بارہمولہ جی این ایتو نے ضلع کے چیف ایجو کیشنل آفیسر کے نام ایک خط لکھا ہے۔ خط میں لکھا ہے'' ایس ایس پی بارہمولہ نے صلاح دی ہے کہ کم سے کم دس دنوں تک بانڈی پائین کے سبھی سکول بند کئے جائیں تاکہ علاقے کو معرکہ آرائی کے بعد بارود کی ممکنہ موجودگی سے صاف کیا جائے ''۔ خط میں اس ضمن میں فوری کارروائی کے احکامات صادر کئے گئے ہیں۔ ایک پولیس آفیسر کے مطابق اُنہوں نے معرکہ آرائی کی جگہ پر چھ گرینیڈ تباہ کئے ہیں۔ انہوں نے مزید کہا کہ بم ناکارہ کرنے کی ٹیم چندوسہ میں ہی خیمہ زن ہے۔ و

گیلانی پرای ڈی کا 14لاکھ روپے سے زائد کا جرمانہ عاید

سرینگر/انفورسمنٹ ڈائریکٹوریٹ (ای ڈی) نے جمعہ کو حریت کانفرنس (گ) کے چیئر مین سید علی گیلانی پر 14.4لاکھ روپے کا جرمانہ عاید کیا۔ یہ جرمانہ اُن کی تحویل سے مبینہ طور غیر قانونی طوربر آمد کئے گئے دس ہزار امریکی ڈالر بر آمد کرنے پر عاید کیا گیا ہے۔ خبر رساں ادارے پی ٹی آئی کے مطابق ای ڈی نے کہا ہے کہ اس سلسلے میں تحقیقات مکمل ہوچکی ہے ۔ ای ڈی نے لبریشن فرنٹ چیئر مین محمدیاسین ملک کی تحویل سے بھی غیر ملکی کرنسی بر آمد کرنے کا دعویٰ کیا ہے۔ اس سلسلے میں ملک کیخلاف کارروائی جاری ہے۔ دلی کی ایک عدالت نے ای ڈی کو گیلانی کے فرزند نسبتی الطاف احمد شاہ کی پوچھ تاچھ کے بھی احکامات صادر کئے ہیں۔ شاہ دلی کے تہار جیل میں مقید ہیں۔  

اننت ناگ میونسپل کونسل کے چیئر مین کا محافظ جنگجو حملے میں زخمی

سرینگر/جنوبی کشمیر میں میو نسپل کونسل اننت ناگ کے چیئر مین ، ہلال احمدشاہ کا سرکاری محافظ جمعہ کو جنگجوئوں کے ایک حملے میں زخمی ہوگیا۔ ذرائع کے مطابق مشتبہ جنگجوئوں نے میونسپل کونسل اننت ناگ کے دفتر کے احاطے میں ہی پولیس پارٹی پر گولیاں چلائیں۔ انہوں نے مزید کہا کہ اس حملے میں شاہ کا محافظ زخمی ہوگیا جس کی شناخت ارشاد احمد کے طور ہوئی ہے۔ زخمی ارشاد کو نزدیکی اسپتال منتقل کردیا گیا ہے جہاں اُس کی حالت نازک بتائی جارہی ہے۔ عینی شاہدین کے مطابق فورسز نے واقعہ کے فوارً بعد علاقے کو محاصرے میں لیکر تلاشی آپریشن شروع کیا ہے۔  

شوپیان معرکہ میں دوسرا جنگجو جاں بحق، آپریشن جاری

سرینگر/جنگجوئوں اور فورسز کے درمیان جنوبی کشمیر کے شوپیان ضلع میں جمعہ کو جو معرکہ شروع ہوا، اُس میں بعد دوپہر دوسراجنگجو جاں بحق ہوگیا ہے جبکہ فورسز کا آپریشن آخری اطلاعات ملنے تک جاری تھا۔ ذرائع کے مطابق یہاں فورسز کی کارروائی میں کم سے کم تین رہائشی مکانوں کو شدید نقصان پہنچ گیا ہے۔ یہ معرکہ گدا پورہ ،رتنی پورہ نامی گائوں میں گذشتہ رات کے دوران شروع ہوا۔ اطلاعات کے مطابق طرفین کے درمیان رات کے تین بجے گولیوں کا تبادلہ ہوا جس کے بعد خاموشی چھاگئی جو صبح ساڑھے سات بجے تک جاری رہی جس کے بعد یہاں پھر گولیاں چلنے کی آوازیں سنی گئیں۔ مقامی ذرائع کے مطابق معرکہ کے آغاز سے ہی ،رتنی پورہ گائوں کی طرف سے، جو گدا پورہ سے کچھ میٹر کے فاصلے پر ہے، نوجوان جمع ہوگئے اور اُنہوں نے فورسز پر پتھرائو شروع کیا۔ان جھڑپوں کے دوران متعدد مظاہرین زخمی ہوئے ہیں۔    

جامع مسجد سرینگر میں رواں ماہ کے دوران تیسری بار نماز جمعہ کی اجازت نہیں

سرینگر/حکام نے جمعہ کو رواں ماہ کے دوران تیسری بار جامع مسجد سرینگر میں نماز ادا کرنے کی اجازت نہیں دی۔ ذرائع کے مطابق اس غرض کیلئے جامع مسجد کے گرد و پیش کے سبھی علاقوں میں سخت بندشیں نافذ کی گئی تھیں اور لوگوں کو اُن کے گھروں تک محدود کرکے رکھا گیا تھا۔ سرکاری ذرائع نے کہا کہ یہ بندشیں علیحدگی پسندوں کی اُس اپیل کے پیش نظر عاید کی گئیں تھیں جن میں عوام سے کہا گیا تھا کہ نماز کے بعد اونتی پورہ کے جواں سال استاد رضوان پنڈت کی زیر حراست موت کیخلاف مظاہرے کئے جائیں۔  حکام نے حریت کانفرنس (ع) کے چیئر مین میرواعظ عمر فاروق، جو نماز جمعہ سے قبل جامع مسجد سرینگر میں خطبہ دیتے ہیں، کو خانہ نظر بند کیا تھا  

انجینئر رشید شمالی کشمیر سے لوک سبھا انتخابات لڑیں گے

سرینگر/عوامی اتحاد پارٹی کے صدر انجینئر رشید آنے والے لوک سبھا انتخابات میں بارہمولہ سیٹ سے پارٹی کے اُمیدوار ہونگے۔ اس بات کا  اعلان انجینئر نے جمعہ کو ایک پریس کانفرنس کے دوران کیا۔ انہوں نے کہا کہ پارٹیوں نے اُن کے ساتھ رابطہ کرکے سپورٹ حاصل کرنے کی کوشش کی تاہم اُن کا کسی پارٹی کے ساتھ چناوی اتحاد نہیں ہوسکا۔ انہوں نے کہا کہ وہ خود بارہمولہ نشست کیلئے پارٹی کے اُمیدوار ہونگے جبکہ رائیس راتھر اور شہزاد شبنم دیوان، جموں کی دو سیٹوں کیلئے پارٹی کے اُمیدوار ہونگے۔انجینئر رشید نے کہا کہ زبیر مسعودی اننت ناگ سیٹ کیلئے پارٹی کے اُمیدوار ہونگے۔ واضح رہے کہ لوک سبھا انتخابات کا آغاز11اپریل سے ہونے والا ہے۔  

شوپیان معرکہ کے آس پاس فورسز کے ساتھ جھڑپوں میں دس شہری زخمی

سرینگر/جنوبی کشمیر کے شوپیان ضلع میں فورسز اور مظاہرین کے درمیان ہوئی جھڑپوں کے دوران کم سے کم دس شہری زخمی ہوگئے۔ یہ جھڑپیں گدا پورہ، رتنی پورہ گائوں میں اُس جگہ کے آس پاس ہوئیں جہاں جنگجوئوں اور فورسز کے مابین معرکہ جاری ہے اور جس کے دوران ابھی تک ایک جنگجوجاں بحق ہوگیا ہے۔ اطلاعات کے مطابق زخمی شہریوں میں سے نو کو پیلٹ لگے ہیں جبکہ ایک گولی لگنے سے زخمی ہوا ہے۔ پولیس نے تاہم شہری کے گولی لگنے سے زخمی ہونے کی تصدیق نہیں کی۔ ذرائع کے مطابق تین زخمیوں کو علاج کیلئے سرینگر کے صدر اسپتال منتقل کیا گیا ہے۔ واضح رہے کہ شوپیان کے گائوں میں صبح سے مظاہرین اور فورسز کے درمیان جھڑپوں کا سلسلہ چل رہا ہے جن کا آغاز جنگجوئوں اور فورسز کے مابین معرکہ کے ساتھ ہی ہوا۔  

جنگجوئوں نے حاجن میں کمسن عاطف کو یرغمال بناکر مار ڈالا: پولیس

سرینگر/پولیس نے جمعہ کو کہا کہ شمالی کشمیر کے حاجن علاقے میں ایک معرکہ آرائی کے دوران جو دو جنگجو جاں بحق ہوگئے اُن کا تعلق پاکستان سے تھا۔ پولیس نے ایک بیان میں  دونو ں کی شناخت علی اور حبیب کے طور کی۔ پولیس بیان کے مطابق بانڈی پورہ ضلع کے حاجن علاقے میں جو فورسز آپریشن گذشتہ روز سے جاری تھا اُس میں جنگجو ئوں نے دو شہریوں کو یرغمال بنا کر رکھا تھا تاہم ساٹھ سالہ عبد الحمید کو فورسز نے بحفاظت نکالا مگر کمسن عاطف کو جنگجوئوں نے باہر نہیں جانے دیا۔ پولیس بیان میں یہ بھی کہا گیا ہے کہ مذکورہ جنگجوئوں نے ہی عاطف کو گولی مار کر جاں بحق کردیا۔ ذرائع کے مطابق بارہ سالہ عاطف کی لاش بھی جاں بحق جنگجوئوں کے ساتھ ہی اُس مکان کے ملبے سے بر آمد کی گئی جس کو فورسز نے معرکہ آرائی کے دوران زمین بوس کردیا۔ ایک عورت کی ایک ویڈیو بھی سوشل میڈیا پر وائرل ہوئی ہے جس میں مذکورہ خاتو

شوپیان معرکہ میں ایک جنگجو جاں بحق، علاقے میں جھڑپیں

سرینگر/جنگجوئوں اور فورسز کے درمیان جنوبی کشمیر کے شوپیان ضلع میں جمعہ کو جو معرکہ شروع ہوا، اُس میں ایک جنگجو جاں بحق ہوگیا ہے جبکہ فورسز کا آپریشن جاری ہے۔ فوجی ترجمان راجیش کالیا کے مطابق یہاں ایک جنگجو کو جاں بحق کردیا گیا ہے اور جنگجومخالف آپریشن جاری ہے۔ یہ معرکہ گدا پورہ ،رتنی پورہ نامی گائوں میں گذشتہ رات کے دوران شروع ہوا۔ اطلاعات کے مطابق طرفین کے درمیان رات کے تین بجے گولیوں کا تبادلہ ہوا جس کے بعد خاموشی چھاگئی جو صبح ساڑھے سات بجے تک جاری رہی جس کے بعد یہاں پھر گولیاں چلنے کی آوازیں سنی گئیں۔ مقامی ذرائع کے مطابق معرکہ کے آغاز سے ہی ،رتنی پورہ گائوں کی طرف سے، جو گدا پورہ سے کچھ میٹر کے فاصلے پر ہے، نوجوان جمع ہوگئے اور اُنہوں نے فورسز پر پتھرائو شروع کیا۔ مقامی ذرائع کے مطابق یہاں مظاہرین اور فورسز کے مابین جھڑپوں میں شدت آئی ہے۔  

نماز جمعہ سے قبل میرواعظ عمر فاروق خانہ نظر بند

سرینگر/حریت کانفرنس (ع) کے چیئر مین میرواعظ عمر فاروق کو جمعہ کے روز اُن کی رہائش گاہ واقع نگین میں نظر بند کیا گیا ہے۔ میرواعظ کی نظر بندی علیحدگی پسندوں کی اُس اپیل کے پیش نظر عمل میں لائی گئی ہے جس میں آج اونتی پورہ کے اُستاد رضوان پنڈت کی حراستی موت کیخلاف احتجاج کی کال دی گئی تھی۔ علیحدگی پسندوں کے وفاق ،مشترکہ مزاحمتی قیادت نے لوگوں سے اپیل کر رکھی ہے کہ وہ نماز کے بعد رضوان کی پولیس حراست میں موت کیخلاف احتجاج کریں۔  میرواعظ ہر جمعہ کو سرینگر کی تاریخی جامع مسجد میں نماز سے قبل خطبہ دیتے ہیں۔