تازہ ترین

کشمیر سے آنے والے بتا

15 مارچ 2020 (00 : 01 AM)   
(      )

 کشمیر سے آنے والے بتا
 
کیسا ہے میرا پیارا چمن
 
کیا اب بھی وہاں پر رِستے اور کباب بنائے جاتے ہیں
 
کیا اب بھی وہاں پر گُشتاب اور پلاؤکھلائے جاتے ہیں
 
کیا اب بھی وہاں پر قہوہ  اور  نُن چائے پلائی جاتی ہے
 
کیا اب بھی وہاں پر تندوری مرغے ہی کھلائے جاتے ہیں
 
     کشمیر سے آنے والے بتا
     کیسا ہے میرا پیارا چمن
کیا اب بھی وہاں پر سلما  اور گلابو ناچاکرتی ہیں
 
کیا ان کی جوانی اب بھی وہاں پر فتنہ برپا کرتی ہیں
 
کیا اب بھی وہاں پردادی جاں’قصابہ‘ لگایاکرتی ہیں
 
کیا پیروجواں کے سر پر اب بھی ٹوپی سجا ئی ہوتی ہے
 
   کشمیرسے آنے والے بتا
    کیسا ہے میرا پیارا چمن
کیسا ہے شالیماروزبرون  ‘ کیسی ہے ڈل جھیل کی شام
 
کیا اب بھی میری اُس گُل واری میں جشنِ بہاراں ہوتا ہے
 
کیا ڈل کے شکارے اب بھی وہاں پانی پر ناچا کرتے ہیں
 
کیا اب بھی ڈھول بتاشے سے شادی میں رنگ وہ بھرتے ہیں
 
    کشمیر سے آنے والے بتا
    کیسا ہے میرا پیارا چمن
کیا اب بھی وہاں پر برفیلے موسم کا حملہ ہوتا ہے
 
کیا اب بھی وہاں پر ’’فرنوں اور کانگر ‘‘کا جھگڑا چلتا ہے
 
کیا اب بھی سیاسی ہنگامے سپنوں کا قتل ہی کرتے ہیں
 
کیا اب بھی وہاں پر کھیتوںمیں بچے کلکاری کرتے ہیں
 
    کشمیر سے آنے والے بتا
    کیسا ہے میرا پیارا چمن
کیا اب بھی وہاں پر لل دید کے اشعار سنائے جاتے ہیں
 
کیاحبہ خاتوںکے گیتوں سے منڈ پ بھی سجائے جاتے ہیں
 
کیا اب بھی وہاں لیلیٰ  مجنوںکے قصے سنائے جاتے ہیں
 
کیا اب بھی فسانے رستم کے راتوں میں گائے جاتے ہیں
 
     کشمیر سے آنے والے بتا
     کیسا ہے میرا پیارا  چمن
 
ڈاکٹر ریاض توحیدی(کشمیر)
وڈی پورہ، ہندوارہ کشمیر،موبائل نمبر؛7006544358