تازہ ترین

سب سنٹرپلیرہ کا افتتاح

شہناز گنائی نے ایمبولینس بھی وقف کی

30 نومبر 2018 (00 : 01 AM)   
(      )

عشرت حسین بٹ
منڈی//ممبر قانون ساز کونسل ڈاکٹر شہناز گنائی نے سب سنٹر پلیرہ کا افتتاح کیا اور اس دوران انہوں نے ایک ایمبولینس گاڑی بھی عوام کے نام وقف کی ۔اس سلسلے میں منعقد ہوئی تقریب میں بلاک میڈیکل آفیسر منڈی کے علاوہ محکمہ صحت کا دیگر عملہ اور پلیرہ کے معززین بھی موجود تھے۔اس موقعہ پر ڈاکٹر شہناز گنائی نے کہا کہ ان کا مقصد ہمیشہ سے یہی رہا ہے کہ لوگوں کی پریشانیوں کا ازالہ کیاجاسکے اور وہ اسی مقصد کے ساتھ آگے بڑھ رہی ہیں۔ انہوں نے کہاکہ انہیں یہ جان کر بہت افسوس ہورہاتھا پلیرہ کے لوگوں کو سب سنٹر میں عمارت و دیگر سہولیات نہ ہونے کی وجہ سے مشکلات کاسامناکرناپڑرہاہے اور معمولی سے علاج کیلئے بھی انہیں یاتولورن، منڈی یاپھر پونچھ ہسپتال کا رخ کرناپڑتاہے ۔انہوںنے کہاکہ انہوں نے مقامی عوام سے یہ وعدہ کیاتھاکہ جلد اس سنٹر کیلئے عمارت تعمیر کی جائے گی اور انہوں نے اپنے حلقہ اختیاراتی فنڈز سے عمارت تعمیر کرواکر یہ وعدہ پورا کردیا۔ انہوںنے کہاکہ وہ مقامی عوام کے نام ایک ایمبولینس گاڑی بھی وقف کررہی ہیں تاکہ مریضوں کو ہسپتال منتقلی میں مشکلات کاسامنا نہ کرناپڑے ۔انہوں نے کہاکہ مقامی لوگوںکے مسائل کے حل کیلئے وہ ہمیشہ کوشاں رہیں گی ۔ اس دوران پلیرہ کے لوگوںنے شہناز گنائی کا شکریہ ادا کیا ۔