تازہ ترین

پوگل پرستان کے نرتھیال کی گوجر بستی دو مہینے سے بجلی کے بغیر

حلقہ انتخاب رام بن اور تحصیل اْکڑال میں بٹے علاقوں کا کوئی پرسان حال نہیں

12 ستمبر 2018 (00 : 01 AM)   
(      )

محمد تسکین
بانہال // ضلع رام بن میں محکمہ بجلی کی عدم توجہی اور صارفین کے تئیں محکمہ بجلی کی لاپرواہی کی وجہ سے گوجر بستی نرتھیال پنچایت بلیہوت تحصیل اکڑال ضلع رام بن کا علاقہ پچھلے ڈیڑھ مہینے سے بجلی کے بغیر ہے اور تقریبا دو ماہ پہلے خراب ہوا ٹرانسفارمر کو ابھی تک ٹھیک کرنے کے اقدمات نہیں اٹھائے گئے ہیں۔ ویسے بھی تحصیل اکڑال ، پوگل پرستان کے بیشتر علاقوں پوگل پرستان ، سینا بتی ، آلنباس ، مگرکوٹ اور رامسووغیرہ کے صارفین بجلی کو شکایت ہے کہ علاقہ پوگل پرستان ، سینا بتی اور النابس وغیرہ کے علاقوں میں بجلی محکمہ کی طرف سے بجلی کی سپلائی کو یقینی اور باقاعدہ بنانے کیلئے کوئی اقدامات نہیں کئے جارہے ہیں اور لوگوں کی خدمت کے عوض ہر مہینے لاکھوں روپئے کی تنخواہیں خزانہ عامرہ سے وصولنے والے محکمہ بجلی کے ملازمین لمبی تان جا سوئے ہیں۔ تحصیل پوگل پرستان کی ایک پنچایت نرتھیال کے سینکڑوں کنبے حلقہ انتخاب رام بن کا حصہ ہیں اور دو تحصیلوں اور ممبران اسمبلی کے انتظاموں میں بٹ جانے کی وجہ سے تحصیل اْکڑال پوگل پرستان کے اِن علاقوں میں بجلی کا بحران ایک عام سی بات ہے اور لوگ ہفتوں تک گھپ اندھیروں میں ڈوبے رہتے ہیں۔ جبکہ اس علاقے کا سب ڈویژن بجلی بانہال میں واقع ہے اور زمینی سطح پر کام کرنے والا عملہ اپنا فرض ادا کرنے میں سخت کوتاہی کررہا ہے جس کی وجہ سے تحصیل اکڑال ، پوگل پرستان کے علاقوں میں ہفتوں تک بجلی کا پتہ ہی نہیں ہوتا ہے۔ چودھری عبدالطیف کی قیادت میں مقامی لوگوں کے ایک وفد نے کشمیرعظیٰ کو بتایا کہ علاقہ نرتھیال پنچایت بلیہوت بی کی گوجر بستی پچھلے ڈیڑھ مہینے سے بھی زائد عرصے سے بجلی کے بغیر ہے ، کیونکہ اس علاقے کا  25 کلو واٹ کا ٹرانسفارمر ڈیڑھ مہینے پہلے جل چکا ہے لیکن محکمہ بجلی کے حکام کوئی اقدام کرنے کے بجائے چپ چاپ عوام کو مشکلات میں گھیرا دیکھ رہے ہیں۔ انہوں نے کہا کہ راجیو گاندھی کے نام سے منسوب دیہی علاقوں میں بجلی پہنچانے کی اسکیم کے تحت نرتھیال کے علاقے کو 2012 میں بجلی نصیب ہوئی تھی اور تب سے اب تک یہاں نصب 25 کلوواٹ کا ٹرانسفارمر چھ مرتبہ جل چکا ہے اور ہر بار لوگ اسے اپنے کاندھوں پر اْٹھاکر کئی کلومیٹر دور مفت میں سڑک تک پہنچا چکے ہیں۔ انہوں نے کہا کہ دو مہینے کا عرصہ مکمل ہونے کے باوجود بھی نہ محکمہ بجلی سب ڈویژن بانہال کی طرف سے اور ناہی ممبر اسمبلی رام بن کی طرف سے اس علاقے میں بجلی کی بحالی کی طرف کوئی توجہ نہیں دی گئی ہے جبکہ بجلی کے بغیر ہی غریب اور سادھ لوح صارفین سے بجلی فیس ہر ماہ وصولی جاتی ہے۔ انہوں نے کہا کہ ہم نے اس سلسلے میں محکمہ بجلی کے ایک اہلکار سے کئی بار بات کی مگر انہوں نے علاقے میں بجلی کی بحالی کے بجائے لوگوں سے کہا کہ جب تک وہ جلے ہوئے ٹرانسفارمرکو مفت میں سڑک تک نہیں پہنچائیں گے تب تک نیا ٹرانسفارمرنہیں دیا جائے گا۔ انہوں نے گورنز اور ضلع انتظامیہ رام بن سے معاملہ میں مداخلت کی اپیل کی ہے۔ اس سلسلے میں محکمہ بجلی کے اسسٹنٹ ایگزیکٹیو انجینئر سب ڈویژن بانہال راجیش پانڈو نے بات کرتے ہوئے کشمیر عظمیٰ کو بتایا کہ تحصیل اکڑال پوگل پرستان کے دور دراز کے علاقے کا یہ معاملہ ابھی تک ان کی نوٹس میں نہیں لایا گیا ہے اور انہوں نے میڈیا سے یہ جانکاری ملنے کے فورا بعد خراب ٹرانسفارمر کو وہاں سے لے جانے اور نرتھیال کی گوجر بستی میں نیا ٹرانسفارمر نصب کرنے کی ہدایت جاری کی ہے۔ انہوں نے کہا کہ علاقے میں جلد ہی بجلی بحال کی جائے گی ۔