تازہ ترین

رافیل سودا میں حکومت کے جھوٹ کا پردہ فاش

حکومت طیاروں کیلئے تین گنا زیادہ قیمت کیوں دے رہی ہے؟ :کانگریس

9 ستمبر 2018 (00 : 01 AM)   
(      )

نئی دہلی//کانگریس نے رافیل جنگی طیارہ سودا معاملہ میں اضافی تکنیکی آلات کی وجہ سے طیاروں کی قیمتوں میں اضافہ کے مودی حکومت کے دعوے کو غلط بتاتے ہوئے کہا کہ ان طیاروں میں کچھ بھی نیا نہیں لگایا گیا ہے اور حکومت اس ضمن میں ہوئے 41ہزار کروڑ روپئے کے گھوٹالے پر پردہ ڈالنے کی کو شش کر رہی ہے ۔کانگریس کے میڈیا انچارج رندیپ سرجو والا نے  الزام لگایا کہ رافیل سودے کے ضمن میں وزیر اعظم نریندر مودی، وزیر دفاع نرملا سیتا رمن اور وزیر داخلہ ارون جیٹلی نے ملک سے جھوٹ بولا ہے کہ ہندوستان کے لئے ان طیاروں میں خاص قسم اسٹریٹجک سسٹم کو بھی لگایا گیا ہے جس کی وجہ سے یہ طیارے یو پی اے حکومت کے دوران خریدے جانے والے طیاروں سے بالکل الگ ہیں اور اسی لئے ان کی قیمت زیادہ ہے ۔انہوں نے الزام لگایا کہ مودی اور ان کے کابینہ کے معاونین کا یہ دعوی جھوٹا ہے ،انہوں ے دعوی ٰکیا کہ یو پی اے کے دوران جن طیاروں کو خریدنے کا معاہدہ ہوا تھا مودی حکومت اسی سٹم سے لیس طیاروں اور ہتھیاروں کی خریداری کر رہی ہے ۔ترجمان نے کہا کہ جب طیارے اسی سسٹم سے لیس ہیں تو مودی حکومت ان طیاروں کے لئے تین گنا زیادہ قیمت کیوں دے رہی ہے ۔انہوں ے کہا کہ یو پی اے کے وقت جس جنگی طیارے کی قیمت 526 کروڑ روپئے طے کی گئی تھی وہی طیارہ اب 1870 کروڑ روپئے کی قیمت سے خریدا جا رہا ہے اور اس سے سرکاری خزانے کو راست طور سے 41000 کروڑ روپئے کا نقصان ہوا ہے ۔کانگریس ترجمان نے الزام لگایا کہ مودی حکومت نے ہندوستانی فضائیہ سے صلاح و مشورہ کے بغیر ہی خریدے جانے والے طیاروں کی تعداد بھی کم کر دی ہے اور 126 طیاروں کی جگہ صرف 36 جنگی طیاروں کے خریدنے کا اک طرفہ فیصلہ لیا ہے ۔ انہوں نے اس فیصلے کو '' ملک کی سیکورٹی'' کے ساتھ سمجھوتہ قرار دیا اور کہا کہ طیاروں کی پہلی کھیپ 2019 تک آنی ہے جب کی بقیہ طیارے 2022 تک فضائیہ کوسونپے جائیں گے جبکہ چین اور پاکستان کی طرف سے لگاتار بڑھ رہے خطروں کو دیکھتے ہوئے ان طیاروں کی خریداری جلد ہی کی جانی چاہئے ۔انہوں نے کہا کہ پہلے کے معاہدوں میں ان طیاروں کی خرید میں پبلک سیکٹر کی کمپنی،ہندوستان ایئرناٹکس لمیٹیڈ( ایچ اے ایل) کو انکے آلات سازی کا ٹھیکہ ملنا تھا لیکن مودی حکومت نے اسے درکنار کرکے '' ملکی مفاد'' کے ساتھ کھلواڑ کیا ہے ۔انہوں نے کہا کہ وزیر اعظم اور وزیر دفاع کو اس سودے میں ملک کی عوام کو جواب دینا چاہئے ۔کانگریس ترجمان نے طیاروں میں نئی تکنیک اور ہتھیار جوڑنے سے متعلق دعوے پر کہا کہ مودی حکومت اپنے خود ساختہ جھوٹ کے جال میں پھنس گئی ہے ۔یہ بات فرانس کے صدر اور مسٹر مودی کے ذریعہ 10 اپریل 2015 کو جاری ایک مشترکہ بیان سے ثابت ہو گئی ہے ۔